Read Jinghpaw Hanson Version Bible YAWHAN 10 Bible Online

YAWHAN 10 - Jinghpaw Hanson Version Bible bible

YAWHAN 10

¹Ngai nanhte hpe gaja wa teng teng tsun made ai gaw, Sagu lawng de chyinghka lam hku n shang ai, kaga kaw nna shingtawt shang ai wa gaw, lagut, damya rai nga ai.

²Chyinghka lam hku shang ai wa chyawm gaw, sagu ni hpe rem ai wa rai nga ai.

³Chyinghka sin ai wa mung, dai wa hpe gaw hpaw ya ga ai; sagu ni mung shi a nsen madat ma ai rai nna, shi gaw tinang a sagu ni hpe amying hte shaga nna, shinggan de woi shapraw praw di wu ai.

⁴Shi a sagu nlang hte hpe woi shapraw nhtawm, sagu ni a shawng e sa wa wu ai rai nna, sagu ni mung shi a nsen hpe chye chyap ma ai majaw, shi kaw hkan nang ma ai.

⁵Tsasam wa a nsen hpe gaw, sagu ni n chye n chyap ma ai majaw, tsasam wa kaw n hkan hkraw ai she, hprawng mat wa ma ai,” ngu nna, shanhte hpe tsun mu ai.

⁶Yesu gaw dai ga shadawn shanhte hpe tsun mu ai; rai timung shi hpa lam tsun ai gaw, shanhte n chye na ma ai.

⁷Dai re ai majaw Yesu shanhte hpe bai tsun mu ai gaw, “Ngai nanhte hpe gaja wa teng teng tsun dan made ga, Ngai gaw sagu ni shang ai chyinghka hku rai nga nngai.

⁸Nye a shawng e pru ai ni nlang hte gaw, lagut damya rai nga ma ai: sagu ni mung shanhte a ga hpe n madat ya ma ai.

⁹Ngai gaw chyinghka hku rai nga nngai: ngai hta shang ai wa gaw, hkye hkrang la hkrum na wu ai rai nna, shang wa pru wa rai lu ai hte, udat shara mu na wu ai.

¹⁰Lagut gaw, lagu na, sat na, hpya sha na nga nna she sa ga ai: ngai chyawm gaw, sagu ni asak hkrung lu na hte nhpaw n-ya lu la mu ga, ngu nna, sa ring ngai.

¹¹Ngai gaw sagu rem wa kaja rai nngai: sagu rem wa kaja gaw, sagu ni a matu tinang a asak nawng ya kau lu ai.

¹²Sagu ni hpe madu ai wa n re ai, nchyang she rai yang chyawm gaw, chyahkyawn sa wa ai mu jang, sagu ni hpe kau da nna hprawng mat wa ga ai; chyahkyawn mung sagu ni hpe amya sha nna shabra kau nga ai:

¹³dai wa gaw nchyang sha rai nga ai majaw, sagu ni a matu n tsang ai hprawng mat wa ai.

¹⁴Ngai gaw sagu rem wa kaja rai nngai: nye Wa gaw ngai hpe chye ai rai nna, ngai mung Wa hpe chye nngai zawn,

¹⁵nye a sagu ni hpe ngai chye nngai, nye a sagu ni mung ngai hpe chye ma ai: sagu ni a matu mung, nye a asak ngai nawng ya kau nngai:

¹⁶Ndai ulawng hte n seng ai sagu kaga mung ngai naw lu nngai: dai sagu ni hpe mung ngai woi wa lu na rai nna, dai ni mung nye a nsen madat na mara ai; shaloi sagu hpung langai sha, sagu rem wa langai sha, rai na ra ai.

¹⁷Ngai gaw nye a asak hpe bai lu la n ga, ngu nna asak nawng ya kau nngai majaw, nye Wa ngai hpe tsawra nngai.

¹⁸Nye asak hpe gade e kashun la ya lu ai n rai: nye a myit hte ngai nawng ya kau nngai: nawng ya kau na ahkang hte bai lu la na ahkang ngai lu nngai: dai ahkang gaw nye Wa kaw na ngai lu la ni ai,” ngu mu ai.

¹⁹Shaloi dai ga a majaw, Yuda masha ni hta hka bra na lam bai pru wa malu ai.

²⁰Shanhte hta na law law gaw, “Shi nat shung nna mana nga ai: shi a ga hpe hpa rai madat nga myit ta?” nga ma ai.

²¹Nkau mi gaw, “Shi a ga gaw nat shung ai wa a ga n rai: nat gaw myi n mu ai wa a myi hpe hpaw ya lu a ni?” nga ma ai.

²²Ya Yerusalem mare e Engeni poi rai nga ai:

²³nshung ta mung rai nga ai; Yesu gaw nawku Htingnu na Shawlumon a jarawp e htinglet hkawm nga ai.

²⁴Dai shaloi Yuda masha ni gaw shi hpe grup rai nna, “Nang galoi du hkra anhte hpe kam shut shangun nga na n ta? Nang Hkristu rai n yang gaw anhte hpe leng leng tsun dan mi,” ngu mu ai.

²⁵Yesu gaw, Ngai tsun ni ai, nanhte mahtang n kam myit dai; nye Wa a mying hte ngai galaw ai amu ni gaw, nye a lam sakse hkam ya nga ai.

²⁶Rai timung, nanhte gaw nye a sagu n rai myit dai majaw n kam myit dai.

²⁷Nye a sagu ni gaw, nye a nsen madat ma ai rai nna, ngai shanhte hpe chye nngai, shanhte mung nye a hpang hkan nang ma ai:

²⁸ngai shanhte hpe n htum n wai asak jaw da we ai rai nna, shanhte galoi mung hten bya ai hkrum na n rai; nye a lata na shanhte hpe gade e kashun la ya lu na n rai.

²⁹Shanhte hpe nye a lata hta ap ya ai, nye Wa gaw, yawng hta grau kaba nga ai rai nna, kadai mung Wa a lata na shanhte hpe kashun la ya lu na n rai.

³⁰Ngai hte nye Wa gaw langai sha rai nga ai,” ngu nna shanhte hpe htan mu ai.

³¹Shaloi Yuda masha ni gaw, shi hpe kabai na nga, nlung bai hta ma ai.

³²Yesu gaw, “Nye Wa kaw na amu kaja law law wa ngai nanhte hpe madun masade ai: dai amu ni hta na gara mahtang a majaw, ngai hpe nlung hte kabai na myit ta?” ngu nna san wu ai.

³³Yuda masha ni gaw, “Kaja ai amu a majaw nang hpe kabai na n rai, shatan ai ga tsun ndai hte, nang dai masha rai da nna, Karai Kasang hpyi hpun ndai majaw kabai na ga ai,” ngu nna htan mu ai.

³⁴Shaloi Yesu gaw, “Nanhte Karai daw ni rai nga myit dai,” ngu nna ngai tsun made ai, nga nna nanhte a tara laika hta ka da nga ai n rai malit ni?

³⁵Chyum laika hta na ga hpe n kau mai ai rai nna, Karai Kasang a mungga dep la lu ai ni hpe, Karai daw ni ngu lu ai rai yang gaw,

³⁶nye Wa e shachyoi shapra nna, ndai mungkan ga de shangun dat ai wa, Ngai Karai Kasang a Kasha rai nngai, nga nna tsun ai a majaw, dai wa hpe, Nang shatan nhkan ga tsun ndai, mai ngu a ni?

³⁷Ngai nye Wa a amu n galaw nngai rai yang gaw, ngai e hkum kam myit.

³⁸Dai ngai galaw nngai rai yang gaw, ngai e n kam timung, ngai hta nye Wa nga nga ai mung, nye Wa hta ngai nga nga ai mung, nanhte mu chye nna chye na lu myit ga, dai amu ni hpe kamsham mu,” ngu nna shanhte hpe htan mu ai.

³⁹Shaloi shi hpe rim la na shanhte bai tam ma ai: shi chyawm gaw shanhte a lata na pru mat wa ai.

⁴⁰Yawhan baptisma jaw hpang ai shara, Yawdan hka wora hkran de, shi bai rap nna dai yang e sa nga nga ai.

⁴¹Masha law law wa shi kaw du sa nna, “Yawhan gaw gaja wa hpa lamik kumla madun ai n rai: ndai wa a lam Yawhan tsun matsun chyawm gaw tengman nga ai,” nga ma ai.

⁴²Dai yang e mung masha law law wa shi hpe kamsham ma ai.