Read Jinghpaw Hanson Version Bible YAWHAN 11 Bible Online

YAWHAN 11 - Jinghpaw Hanson Version Bible bible

YAWHAN 11

¹Dai shaloi Mari hte kana Marhta nga ai Behtani kahtawng na, Lazaru ngu ai wa langai mi, machyi nga ai.

²Dai Mari gaw Madu hpe mura chya nna, lagaw hpe shi a kara hte katsut kau ai numsha rai nga ai: dai machyi nga ai Lazaru gaw, shi a kayung rai nga ai.

³Dai re ai majaw dai yan nau gaw shi hpang de masha shangun dat nna, “Madu e, yu u, nang tsawra ai wa gaw machyi nga ai,” ngu nna tsun dan mu ai.

⁴Yesu gaw dai ga na jang, “Dai machyi gaw si machyi n rai: de a majaw Karai Kasang a Kasha hpung shingkang dan pru u ga nga nna, Karai Kasang a hpung shingkang matu byin ai rai nga ai,” ngu nna tsun dat wu ai.

⁵Yesu chyawm gaw Marhta hpe mung, shi a kanau hte Lazaru hpe mung tsawra wu ai.

⁶Dai majaw shi machyi nga ai lam na jang, Yesu gaw shi nga ai shara e ni ni naw hkring nga ai.

⁷Dai hpang shi gaw, Anhte Yuda mung de bai sa saga,” ngu nna sape ni hpe tsun wu ai.

⁸Shaloi sape ni gaw, “Rabai e, Yuda masha ni ya pyi nang hpe nlung hte kabai sat na tam nga ma yang me, dai de naw bai sa na nni?” ngu mu ai.

⁹Yesu gaw, “Lani mi hta ahkying shi lahkawng re ai, n rai ni? Shani chyingtung e hkawm sa ai wa gaw, ndai mungkan ga a nhtoi hpe mu lu ai rai nna, ahtu kataw n rai ga ai:

¹⁰shana nsin e hkawm sa ai wa chyawm gaw, shi hta nhtoi n rawng ai majaw, ahtu kataw ga ai,” ngu mu ai.

¹¹Shing nga nhtawm, “Anhte a jinghku wa Lazaru yup nga ai: rai timung, shi hpe jasu na ngai sa na nngai,” ngu nna shanhte hpe bai tsun mu ai.

¹²Dai re ai majaw sape ni gaw, “Madu e, shi yup nga ai she rai yang gaw, bran wa na ra ai,” ngu nna htan mu ai.

¹³Yesu gaw Lazaru si sai lam tsun wu timung, shanhte gaw majoi na yup ai hpe tsun ai rai daw, nga nna myit ma ai.

¹⁴Dai majaw Yesu gaw, “Lazaru si sai:

¹⁵nanhte kamsham lu na matu, dai yang e ngai n nga hkrup ai majaw, nanhte a lam ngai kabu nngai: rai timung shi hpang de sa wa saga,” ngu nna leng leng tsun dan mu ai.

¹⁶Dai rai nna Didumu ngu ai Htawma gaw, “Shi hte rau si nang na, anhte mung hkan nang saga,” ngu nna sape manang ni hpe tsun mu ai.

¹⁷Shing rai Yesu du yang, Lazaru gaw lup hta rawng ai mali ya rai sai hpe, mu wu ai.

¹⁸Behtani kahtawng gaw Yerusalem mare hte mai lahkawng daram sha gang nga ai rai nna,

¹⁹Marhta yan Mari a kayung wa a majaw, shan hpe shalan shabran na nga, Yuda masha law law wa sa ma ai.

²⁰Yesu du ra ai hpe Marhta na jang, shi hpe sa tau la na nga sa wa ai: Mari chyawm gaw nta e naw dung nga ai.

²¹Shaloi Marhta gaw, “Madu e, nang nang e nga ndai rai taw gaw, ngai yung n si na re ai.

²²Ya rai timung Karai Kasang kaw nang hpyi mahpyi hte gaw, Karai Kasang nang hpe jaw na ndai ngai chye nngai,” ngu nna Yesu hpe hkap tsun wu ai.

²³Shaloi Yesu gaw, “Ning yung wa gaw bai rawt na ra ai,” ngu wu ai.

²⁴Marhta gaw, “Hpang jahtum na bai hkrung rawt ai nhtoi hta, shi mung bai rawt na ra ai gaw, ngai chye nngai,” ngu wu ai.

²⁵Bai Yesu gaw, “Ngai gaw bai hkrung rawt ai lam hte asak hkrung ai lam rai nga nngai:

²⁶ngai hpe kamsham ai wa gaw, si mat timung ahkrung nga na ra ai: asak hkrung nna ngai hpe kamsham ai wa kadai mung, si ai galoi mung n hkrum na ra ai. Ga ndai hpe nang kam nni?” ngu nna shi hpe tsun wu ai.

²⁷Shaloi Marhta gaw, “Rai sa, Madu e, nang gaw ndai mungkan ga de du sa sai, Hkristu ngu ai Karai Kasang a Kasha rai nga ndai hpe, ngai kam nga nngai,” ngu nna shi hpe htan wu ai.

²⁸Shing nga nhtawm shi a kanau Mari hpe wa lagyim shaga nna, “Sara nang de nga nga nna, nang hpe shaga nga ai,” ngu wu ai.

²⁹Mari gaw dai ga na jang alawan rawt nna Yesu hpang de sa wa ai.

³⁰Yesu chyawm gaw kahtawng de garai n shang ai sha, Marhta sa tau ai shara e naw rai nga ai.

³¹Dai majaw shalan shabran ga tsun chyai let, Mari hte rau nta e nga nga ai Yuda masha ni gaw, Mari alawan rawt nna pru wa ai hpe mu ma yang, lup de sa hkrap na rai sam ai nga, myit nna shi kaw hkan nang ma ai.

³²Mari gaw Yesu nga ai shara de du nna shi hpe mu jang, shi a lagaw nhpang e dingnyawm dagup let, “Madu e, nang nang e nga ndai rai taw gaw, ngai yung n si na re ai,” ngu wu ai.

³³Mari gaw hkrap ngu hkrap ngoi rai nga ai hpe mung, shi kaw hkan nang ai Yuda masha ni hkrap ngu hkrap ngoi ma ai hpe mung, Yesu mu wu yang, shi a wenyi hta shi yawn madai ai hte, myit law ai rai nna,

³⁴“Shi hpe kanang lup da mu ta?” ngu nna san wu ai. Shan gaw, “Madu e, sa yu rit,” ngu nna htan mu ai.

³⁵Yesu mung myi prwi pru nga ai.

³⁶Dai majaw Yuda masha ni gaw, “Yu mu, shi gaw dai wa hpe grai wa tsawra nga a hka!” nga ma ai.

³⁷Bai nkau mi gaw, “Myi n mu ai wa hpe myi hpaw ya lu ai, ndai wa gaw, Lazaru hpe mung n si u ga nga, n di lu na a ni?” nga ma ai.

³⁸Dai majaw Yesu gaw shi kraw kata e bai yawn madai ai hte lup de sa du ai: dai lup gaw lungpu hku rai nga ai rai nna, lung tawng hte pat da nga ai.

³⁹Yesu gaw, “Nlung dai hpe galau kau mu,” ngu mu ai. Shaloi si ai wa a kajan Marhta gaw, “Madu e, ya gaw manam na sai; shi si ai mali ya rai sai,” ngu nna tsun wu ai.

⁴⁰Yesu gaw, “Nang kam n yang gaw, Karai Kasang a hpung shingkang nang mu lu na rin dai, ngu nna ngai tsun sade ai, n rai ni?” ngu nna shi hpe tsun wu ai.

⁴¹Dai rai nna nlung dai hpe shanhte galau kau mu ai. Shaloi Yesu gaw lamu de mada yu nna, “Wa e, nang nye a ga madat ya ndai majaw, ngai nang hpe shakawn nngai law.

⁴²Nang galoi mung nye a ga a madat ya nga ndai gaw, ngai chye nngai; rai timung, nang ngai hpe shangun dat ndai gaw, ndai grup yin nga ai masha ni kamsham lu mu ga, shanhte a matu ngai ning nga tsun nngai,” nga ai.

⁴³Shing nga tsun ngut jang shi gaw, “Lazaru e, pru wa rit law,” nga nna nsen kaba hte jahtau dat wu ai.

⁴⁴Shaloi si mat sai wa gaw, shi a lagaw lata hta sumpan yan ahkyen nna, myi man e mung hpajet kayawp ai hte pru wa ai, Yesu gaw, “Shi hpe raw nna dat dat mu,” ngu nna shanhte hpe tsun mu ai.

⁴⁵Dai re ai majaw Mari kaw sa hpu ai Yuda masha law law wa, Yesu galaw ai amu hpe mu jang shi e kamsham ma ai.

⁴⁶Nkau mi chyawm gaw, Hparishe ni hpang de wa nna, Yesu galaw ai lam wa tsun dan mu ai.

⁴⁷Dai rai nna hkinjawng agyi ni hte Hparishe ni gaw, du salang ni hpe shaga jahpawng nhtawm, “Anhte kaning re ai rai nga ga ta? dai wa gaw lamik kumla law law madun dan nga ai.

⁴⁸Shi hpe ning di adat da nga ga yang gaw, masha yawng mayawng shi hpe kamsham ma na mara ai rai nna, Roma masha ni mung sa nna, anhte a mungdan hte anhte a amyu hpe kashun la kau na mara ai,” nga ma ai.

⁴⁹Rai timung, shanhte hta na, dai shaning e hkinjawng agyi aya lu ai, Kayahpa ngu ai wa langai mi gaw, “Nanhte hpa mung n chye myit dai:

⁵⁰amyu ting hten bya n hkrum hkra, ndai amyu a matu masha langai mi si hkam yang gaw, nanhte a matu grau mai nga ai hpe, nanhte n myit yu myit hka,” ngu nna tsun wu ai.

⁵¹Ga dai gaw shi a myit hte shi tsun ai n rai: dai shaning e hkinjawng agyi rai nga ai majaw, Yesu gaw amyu masha ni a matu si hkam lu na re ai, nga nna mung,

⁵²dai amyu a matu sha n rai, shara shagu hkan e bra nga ai, Karai Kasang a kashu kasha ni hpe langai sha di nna, shinggyin jahpawng da na matu si hkam lu na re ai, nga nna mung, myihtoi ga hte tsun ai rai nga ai.

⁵³Dai shani kaw nna shi hpe sat kau na lam shanhte bawng nga ma ai.

⁵⁴Dai majaw Yesu gaw Yuda masha ni kaw, dan dan bai n hkawm ai sha, dai yang na pru nhtawm, nam de ni ai ginwang na Ehprim ngu ai mare de sa wa nna, shi a sape ni hte rau dai yang e nga nga ai.

⁵⁵Ya Yuda masha ni a Shalai wa ai poi du magang ra ai rai nna, masha law law wa tinang a hkum jasan jaseng na matu, poi garai n du yang, kahtawng ginwang hkan na Yerusalem mare de lung wa ma ai.

⁵⁶Dai majaw shanhte gaw Yesu hpe tam nna, nawku Htingnu e jawm tsap let, “Nanhte kaning rai myit nga myit ta? Shi gaw ndai poi de n sa na myit a ni?” nga nna shada da san ma ai.

⁵⁷Dai shaloi e hkinjawng agyi ni hte Hparishe ni gaw, shi hpe rim la lu hkra, kadai rai timung shi nga ai shara chye yang gaw, madun lu na re ai, nga nna hkang da masai.