Read Jinghpaw Hanson Version Bible YAWHAN 12 Bible Online

YAWHAN 12 - Jinghpaw Hanson Version Bible bible

YAWHAN 12

¹Dai re ai majaw Yesu gaw, si ai kaw na sharawt la ai Lazaru nga ai Behtani kahtawng de, Shalai wa ai poi du na kru ya naw ra yang, sa du ai.

²Shaloi shanhte gaw shi hpe shana shat hkap daw mu ai rai nna, Marhta gaw shat lusha jau nga ai: Lazaru gaw shi hte dung nga nna lusha ai hta lawm ai wa langai mi, rai nga ai.

³Shaloi Mari gaw hpu la ai mura nardu sau ajet hkan masum daram la nna, Yesu a lagaw hta chya ya nhtawm, shi a kara hte katsut kau wu ai: dai sau a manam pyaw ai gaw, nhku ting hpring chyat rai nga ai.

⁴Rai timung, Yuda Iskarut ngu ai, shi hpe ap kau na ra ai, shi a sape langai mi gaw,

⁵“Dai mura sau hpe gumhpraw lap masum tsa hte dut nna, matsan mayan ni hpe hpa di n karan jaw wu ta?” ngu wu ai.

⁶Shi shing nga ai gaw, matsan mayan ni a matu myit ya nna tsun ai n rai: shi gaw gumhpraw jan jum ai wa rai nga ai rai nna, bang da ai gumhpraw hta na sen di sha ai lagut rai nga ai majaw, tsun ai sha rai nga ai.

⁷Dai majaw Yesu gaw, “Rai nu ga, ngai hpe lajang lup ai shani du hkra, shi dai hpe kyem da u ga:

⁸matsan mayan ni gaw nanhte hte rau tut anga nga ai, ngai chyawm gaw nanhte hte tut tut anga nga na n rai,” ngu wu ai.

⁹Yesu dai yang nga nga ai gaw, Yuda masha ni hta shawa masha law law wa chye ma ai rai nna, shanhte gaw Yesu a majaw sha mung n rai, si ai kaw na shi sharawt la ai Lazaru hpe mung mu yu na nga, du sa shajang ma ai.

¹⁰Dai majaw hkinjawng agyi ni gaw Lazaru hpe mung sat kau na, nga nna bawng nga ma ai:

¹¹kaning rai nme law, shi a lam majaw Yuda masha law law wa pru sa wa nna, Yesu hpe kamsham ma ai.

¹²Dai hpang shani e Yesu gaw Yerusalem mare de sa wa ra ai hpe, dai poi de du sa ai shawa masha law law ni na jang,

¹³shanhte gaw namhtan hpun lakung ni daw lang nna shi hpe sa tau la let, “Hawsanna: Dai Madu a amying hte du sa ai wa ngu ai, Israela a hkawhkam gaw, a nga u ga law,” nga nna garu ma ai.

¹⁴Shaloi Yesu gaw lawze kasha mu nna jawn wu ai: dai gaw,

¹⁵“Ziun shayi sha e, hkum hkrit et; Yu u, na a hkawhkam gaw Lawze kasha jawn nna du sa ra ai,” nga nna ka da ai hte maren rai nga ai.

¹⁶Dai lam ni hpe shawng e gaw shi a sape ni n chye ma ai: rai timung, Yesu gaw hpung shingkang lu la ai hpang e she, shi hpe sha-ang nna shing nga ka da ai mung, dai hku raw shanhte shi hpe di mu ai mung, dum chye ma ai.

¹⁷Dai lam byin ai gaw, Lazaru hpe lup kata na shaga nna, si ai kaw na sharawt la ai shaloi e, shi hte rau nga ai shawa masha ni e sakse hkam ya ai rai nga ai.

¹⁸Dai lam majaw mung, shawa masha ni shi hpe sa tau ai rai nga ai: kaning rai nme law, shi dai lamik kumla madun dan ai gaw, shanhte na masai.

¹⁹Dai re ai majaw Hparishe ni gaw, “Nanhte kaning mung n di lu manit dai gaw, yu mu; gaja wa mungkan ting shi kaw hkan mat wa masai,” nga nna shada da tsun shajang ma ai.

²⁰Dai poi a laman e nawku na nga, lung wa ai ni hta Heleni masha nkau mi lawm ma ai.

²¹Dai ni gaw Galile mung na Betsaida mare masha Hpilip kaw sa nna, “Hkau e, anhte gaw Yesu hpe hkrum mayu ga ai, ngu nna tsun mu ai.

²²Shaloi Hpilip gaw Andre hpe sa tsun nna, Andre yan Hpilip gaw Yesu hpe sa tsun dan mu ai.

²³Dai rai nna Yesu gaw, “Masha Kasha a hpung shingkang dan hkung na ahkying du wa ra ai:

²⁴Nanhte hpe ngai gaja wa teng teng tsun made ai gaw, Mam nhkyep gaw ga hta hkrat nna, n hten mat yang gaw, langai sha a rai nga ai: hten mat yang she, asi law law si wa ai.

²⁵Tinang a asak lahpawt ai wa gaw asak sum na ra ai: ndai mungkan ga e tinang asak hpe n dawng ai wa chyawm gaw, htani htana na asak lu la hkra, tinang a asak hpe makawp ai tai na ra ai.

²⁶Nye a amu gun hpai ai wa rai yang gaw, nye a hpang hkan nang ru ga: ngai nga ai shara e, nye a shangun ma mung nga na ra ai; nye a amu gun hpai ai wa rai yang gaw, nye Wa dai wa hpe shagrau na ra ai.

²⁷“Ya ngai myit ru nga nngai: ngai kaning ngu tsun na i? ‘Wa e, ndai ahkying hta na ngai hpe hkye hkrang la e:’ ning ngu yang mung ndai lam a majaw she, ndai ahkying de ngai du wa ni ai:

²⁸Wa e, na a mying ningsang hpe sha shagrau u law,” nga nna shan hpe tsun wu ai. Shaloi sumsing lamu de na ga nsen gaw, “Ngai shagrau se ai, bai naw shagrau na we ai,” nga nna, ngoi pru wa ai.

²⁹Dai yang e tsap hpawng nga nna, dai lam na ai ni gaw, “Mu ngoi nga ai,” nga ma ai: nkau mi mung, “Lamu kasa shi hpe sa tsun ai rai nga ai,” nga ma ai.

³⁰Yesu gaw, “Nsen ndai gaw nye a matu ngoi pru ai n rai, nanhte a matu mara rai nga ai.

³¹Ndai mungkan ga gaw, ya jeyang ai hkrum nga ai, ndai mungkan Du wa gaw, ya shinggan de shaden kau ai, hkrum na rai wa sai.

³²Ngai chyawm gaw ga kaw nna sharawt tawn da ai hkrum jang, ngai masha yawng hpe, ngai hpang de gang la na we ai,” ngu nna htan mu ai.

³³Shing nga ai gaw, shi si hkam na kumla madun nna, tsun ai rai nga ai.

³⁴Dai nga ai majaw shawa masha ni gaw, “Hkristu gaw htani htana agrin nga na re ai, nga nna she tara laika hta rawng ai anhte na yu ga ai: dai re ai mi, nang gaw, Masha Kasha sharawt da ai hkrum lu na ra ai, nga ai gaw, hpa nga ai rai lit ta? Masha Kasha dai gaw, kadai wa mi rai ta?” ngu nna shi hpe htan mu ai.

³⁵Dai rai nna Yesu gaw, “Dai nhtoi gaw nanhte hta loi hkring mi sha naw nga na sai: dai nsin gaw nanhte hpe n lep myit ga, nanhte hta nhtoi naw nga yang hkawm sa mu: nsin e hkawm sa ai wa gaw tinang gade sa wa ai mung, n chye wu ai.

³⁶Nanhte hta nhtoi naw nga nga yang, nhtoi a kashu kasha ni tai lu myit ga, nhtoi hpe kamsham nga mu,” ngu nna shanhte hpe tsun mu ai. Yesu gaw ndai ga tsun ngut jang pru nna, shanhte kaw na makoi mat nga ai.

³⁷Lamik kumla ndai hte wa shanhte a man e shi madun dan mu timung,

³⁸“Madu e, anhte tsun ai shiga hpe kadai kam ya a ta? Dai Madu a lata mung kadai kaw dan yu a ta?” nga nna myihtoi Esaia tsun ai ga dik wa na re ai majaw, shanhte gaw shi hpe n kam ma ai.

³⁹Bai Esaia tsun ai hta, “Shanhte myi e n mu, myit masin hte n chye na nna, Ngai shanhte hpe n shamai mai gaw, Myit n kayin lu mu ga,

⁴⁰Shanhte a myi hpe shi magap ya nna, Shanhte a myit masin hpe mung, shaja ya wu ai,” nga ai ga majaw, shanhte n kam n sham lu ma ai.

⁴¹Esaia gaw shi a hpung shingkang mu lu ai rai nna, shi a lam shing nga tsun ai rai nga ai.

⁴²Rai timung, du ni hta pyi law law wa shi hpe kamsham shajang ma ai: dai rai timung, Tara jawng na shapraw kau na hpe tsang nna, Hparishe ni a jaw e n yin hkraw ma ai:

⁴³kaning rai nme law, Karai Kasang kaw na arawng sadang lu la na hta, masha kaw na arawng sadang lu la na hpe, grau ra ma ai.

⁴⁴Bai Yesu jahtau nna tsun ai gaw, “Ngai hpe kamsham ai wa gaw, ngai hpe kamsham ai n rai; ngai e shangun dat ai wa hpe kamsham ai rai nga ai.

⁴⁵Ngai hpe mada mu ai wa gaw, ngai e shangun dat ai wa hpe mada mu ai rai nga ai.

⁴⁶Ngai hpe kamsham ai yawng hte gaw, nsin hta n rawng nga mu ga, ngu nna nhtoi tai let, ngai mungkan ga de du sa ring ngai.

⁴⁷Nye a ga na la nhtawm, n hkan nang ai wa kadai hpe mung ngai jeyang na n rai: kaning rai nme law, mungkan ga hpe jeyang na ngu nna, ngai du sa nngai n rai, mungkan ga hpe hkye la na she sa nngai.

⁴⁸Ngai hpe n hkap la ai hte nye a ga n hta la ai wa hpe, jeyang na madu kaga mi nga ai: ngai tsun ai mungga e nan, hpang jahtum na nhtoi hta, dai wa hpe jeyang na ru ai.

⁴⁹Ngai chyawm gaw nye myit hte tsun ai n rai; ngai kaning ngu sharin shaga na gaw, ngai hpe shangun dat ai, nye Wa e matsun jaw dat ni ai.

⁵⁰Shi a ga matsun gaw htani htana na asak rai nga ai, ngai chye nga nngai: dai re ai majaw, ngai tsun matsun gaw, nye Wa e hkang dat ai hte maren she, ngai tsun nngai law,” ngu wu ai.