Read Jinghpaw Hanson Version Bible YAWHAN 14 Bible Online

YAWHAN 14 - Jinghpaw Hanson Version Bible bible

YAWHAN 14

¹“Nanhte myit hkum ru myit: Karai Kasang hpe kam mu, ngai hpe mung kam mi.

²Nye wa a nta e nga shara law law nga ai; dai n nga yang gaw, N nga, ngu nna ngai n tsun ai, nga na n rai: kaning rai nme law, nanhte a matu nga shara lajang na she, ngai wa na nngai.

³Shing rai ngai wa nna, nanhte a matu nga shara lajang da nhtawm, ngai nga nga ai shara e nanhte mung nga lu hkra, ngai bai sa nna, nanhte hpe ngai hpang de woi la na made ai.

⁴Ngai sa wa ai shara de du ai lam nanhte chye nga myit dai,” ngu mu ai.

⁵Shaloi Htawma gaw, “Madu e, nang gade sa wa na pyi, anhte n chye ga ai mi, lam kaning rai chye ga ta?” ngu nna shi hpe tsun wu ai.

⁶Yesu gaw, “Lam gaw ngai rai nga nngai, tengman ai hte asak mung, ngai rai nga nngai: ngai hta nna n rai yang gaw, kadai mung nye Wa kaw n du wa lu ai.

⁷Nanhte ngai hpe chye manit dai rai yang gaw, nye Wa hpe mung chye na manit dai: ya kaw nna nanhte shi hpe chye manit dai, mu mung mu manit dai,” ngu nna shi hpe tsun wu ai.

⁸Hpilip mung, “Madu e, Wa hpe anhte e madun mi, shaloi anhte myit dik na ga ai,” ngu wu ai.

⁹Yesu gaw, “Hpilip e, ngai nanhte hte nde nlaw na hkra nga nga sa timung, nang ngai hpe n chye nni? Ngai hpe mu yu ai wa gaw, Wa hpe mu yu nu ai: dai re ai mi, Wa hpe anhte e madun mi, nga nna hpa rai tsun n ta?

¹⁰Ngai gaw Wa hta nga nngai mung, Wa gaw ngai hta nga nga ai mung, nang n kam nni? ngai nanhte hpe tsun ai ga gaw nye a myit hte ngai tsun ai n rai: ngai hta rawng ai nye a Wa gaw, shi a amu galaw nga ai.

¹¹Ngai gaw Wa hta nga nngai mung, Wa gaw ngai hta nga nga ai mung, kamsham nga mi: dai n rai yang gaw, dai amu ni hpe tau yu nna pyi, kamsham nga mi.

¹²Nanhte hpe ngai gaja wa teng teng tsun made ai gaw, Ngai hpe kamsham ai wa gaw, ngai galaw ai amu lu galaw na ra ai; dai hta grau kaba ai amu mung, lu galaw na ra ai: kaning rai nme law, ngai gaw Wa hpang de wa na nngai.

¹³Shing rai, Wa gaw Kasha a marang e hpung shingkang lu la hkra, nye a amying gang nna, nanhte hpyi mahpyi, ngai madat ya na nngai.

¹⁴Nanhte nye a amying gang nna, ngai kaw lama ma hpyi myit yang, hpyi ai hte maren ngai madat ya na nngai.

¹⁵Nanhte ngai hpe tsawra myit dai rai yang gaw, nye a ga matsun hkan shatup na myit dai.

¹⁶Ngai mung Wa kaw hpyi nna, Wa mung, nanhte hte prat tup rau nga na matu, tengman ai hte seng ai Wenyi ngu ai Shalan Shabran ai wa kaga, nanhte kaw shangun dat ya na ra ai.

¹⁷mungkan ga gaw dai Wenyi hpe n mu n chye ma ai majaw, n hkap la lu ma ai: nanhte chyawm gaw dai Wenyi hpe chye nga myit dai; kaning rai nme law, shi gaw nanhte hte rau rai nga ai, nanhte hta mung rawng nga na ra ai.

¹⁸Nanhte hpe jahkrai zawn ngai kau da na n rai: nanhte hpang de ngai bai sa na ring ngai.

¹⁹Loi hkring mi rai jang, mungkan ga gaw ngai hpe n mu dat na nu ai: nanhte chyawm gaw naw mu lu na marin dai: kaning rai nme law ngai ahkrung nga nngai majaw, nanhte mung ahkrung nga na marin dai.

²⁰Ngai gaw nye Wa hta nga nga nngai mung, nanhte ngai hta nga nga myit dai mung, ngai nanhte hta nga nga nngai mung, dai shani e nanhte chye lu na marin dai.

²¹Nye a ga matsun lu la nna hkan shatup ai wa gaw, ngai hpe tsawra ai wa rai nga ai: ngai e tsawra ai wa hpe, nye Wa mung tsawra na wu ai: ngai mung dai wa hpe tsawra ai hte, ngai hkum nan shi e shadan dan na we ai,” ngu nna shi hpe tsun wu ai.

²²Yuda Iskarut n re ai, kaga Yuda gaw, “Madu e, na a hkum anhte hpe shadan dan nhtawm, mungkan ga hpe n shadan dan na gaw, hpa majaw rai na a ta?” ngu nna san wu ai.

²³Yesu gaw, “Ngai e tsawra ai wa rai yang gaw, nye ga matsun hkan shatup na ra ai: nye Wa mung dai wa hpe tsawra na wu ai rai nna, an lahkawng gaw dai wa kaw sa nna shi hte rau hpawng de nga na ga ai.

²⁴Ngai e n tsaw n ra ai wa gaw, nye a ga n hkan shatup lu ai, dai hta kaga, nanhte na la lu ai mungga gaw, nye a ga n rai li ai, ngai hpe shangun dat ai, nye Wa a mungga rai nga lu ai.

²⁵Ngai nanhte hte rau naw nga nga yang, ga ndai ngai nanhte hpe tsun da masade ai.

²⁶Nye Wa e nye a amying hte shangun dat na ra ai, Shalan Shabran ai wa ngu ai, Chyoi pra ai Wenyi gaw, nanhte hpe lam magup sharin ya nna, ngai nanhte hpe tsun da ai ga yawng mayawng, nanhte hpe shadum jahprang ya na ra ai.

²⁷Ngwipyaw ai gaw ngai nanhte hta da ya masade ai; nye a ngwipyaw ai nanhte hpe ngai jaw made ai: mungkan ga na ni jaw ai zawn, ngai nanhte hpe jaw made ai n rai. Nanhte myit hkum ru myit, hkrit mung hkum hkrit myit.

²⁸Ngai wa nna, nanhte kaw bai sa na ring ngai, ngu nna ngai nanhte hpe tsun ai gaw, nanhte na manit dai: nanhte ngai hpe tsawra myit dai rai yang gaw, Wa hpang de ngai wa ai majaw, nanhte kabu na rai myit dai; kaning rai nme law, Wa gaw ngai hta grau kaba nga ai.

²⁹Dai amu byin pru wa ai shaloi, nanhte kamsham lu myit ga, ngu nna garai n byin pru yang, ngai nanhte hpe tsun da made ai.

³⁰Ya kaw nna ngai nanhte hte ga law law n tsun lu na ni ai: kaning rai nme law, mungkan ga a Du wa gaw, du magang ra ai: dai wa chyawm gaw nye a ntsa e hpa ahkang mung n lu na wu ai:

³¹rai timung, ngai nye a Wa hpe tsawra nga nngai gaw, mungkan ga chye lu na hte, nye Wa e ngai hpe matsun jaw dat ai hte maren she, ngai galaw nga nngai. Rawt mu, dai yang nna sa wa saga.