Read Jinghpaw Hanson Version Bible YAWHAN 15 Bible Online

YAWHAN 15 - Jinghpaw Hanson Version Bible bible

YAWHAN 15

¹“Ngai gaw tengman ai tsabyi ru rai nga nngai, nye Wa gaw tsabyi sun madu rai nga ai.

²Ngai hta asi n si ai lakung shagu hpe gaw, shi krum kau wu ai: asi si ai lakung shagu hpe chyawm gaw, asi grau si u ga nga, tsan kau ya wu ai.

³Nanhte chyawm gaw, ngai nanhte hpe tsun dan ai mungga majaw, ya e pyi asan apra rai manit dai. Ngai hta noi nga mu, ngai mung nanhte hta noi nga na nngai.

⁴Tsabyi lakung gaw tsabyi ru madung hta n jung n noi yang gaw, shi chyu sha asi n si lu ai zawn, nanhte mung ngai hta n jung n noi myit yang gaw, asi n si lu na myit dai.

⁵“Ngai gaw tsabyi ru madung rai nga nngai, nanhte gaw lakung lakying ni rai nga myit dai: ngai hta noi nga nna, ngai mung dai wa hta noi nga ai rai yang gaw, dai wa gaw asi law law si wa lu ai: kaning rai nme law, ngai hte hka jang, nanhte hpa mung n galaw lu myit dai.

⁶Ngai hta n jung n noi ai wa gaw, lakung lakying hpe zawn kabai kau ai hkrum nna hkraw mat wa ai hte, masha ni e magawn la nhtawm, wan hta kabai bang nna, hkru krawp mat ai kaw du wa ai.

⁷Nanhte ngai hta noi nga nna, nye ga mung nanhte hta noi nga ai rai yang gaw, nanhte hpa hpyi mayu yang hpyi mu, hpyi ai hte maren nanhte e madat ya na ra ai.

⁸Nanhte asi law law si wa ai a majaw, nye Wa a hpung shingkang dan hkung wa nna, nanhte mung, nye a sape ni teng na myit dai.

⁹Wa gaw ngai hpe tsawra ai zawn, ngai mung nanhte hpe tsawra made ai: nye a tsawra ai hta maju jung nga mu.

¹⁰Ngai gaw nye Wa a ga matsun hkan shatup nna, shi a tsawra ai hta maju jung nga nngai zawn, nanhte mung nye a ga matsun hkan shatup myit yang gaw, nye a tsawra ai hta maju jung na myit dai.

¹¹Nye a kabu gara ai myit nanhte hta rawng nga na hte, nanhte a kabu gara ai gaw hpring tup wa na matu, ga ndai ngai nanhte hpe tsun da made ai.

¹²Ngai nanhte hpe tsawra made ai zawn, nanhte shada da tsawra nga mu, dai gaw nye a ga matsun rai li ai.

¹³Jinghku wa a matu tinang a asak nawng kau hkra tsawra ai myit hta, grau kaba ai tsawra ai myit gaw kadai hta mung n rawng nga ai.

¹⁴Nanhte nye a ga matsun hkan shatup myit yang gaw nanhte nye a jinghku ni rai nga myit dai.

¹⁵Ya kaw nna ngai nanhte hpe mayam n ngu na ni ai; kaning rai nme law, mayam gaw madu galaw ai amu hpe n chye wu ai: nanhte hpe jinghku she ngai ngu na made ai; nye Wa kaw na ngai na la ai hte yawng, ngai nanhte hpe chye shangun masade ai.

¹⁶Nanhte ngai hpe lata la myit dai n rai, ngai she nanhte hpe lata la made ai rai nna, nanhte gaw pru sa nna, asi si na hte, nanhte a asi grin nga u ga, ngu nna mung, nye a amying hte Wa kaw nanhte hpyi mahpyi lu la mu ga, ngu nna mung, ngai nanhte hpe san da masade ai.

¹⁷Nanhte shada da tsawra nga myit ga, ngu nna she, ngai nanhte hpe ndai ga matsun ni jaw da made ai.

¹⁸“Mungkan masha ni nanhte hpe n dawng n yawt myit yang, nanhte hpe garai n rai yang, ngai hpe shawng n dawng ma ai gaw, chye nga mu.

¹⁹Nanhte mungkan ga hte seng ai ni rai myit yang gaw, mungkan ga gaw tinang hte seng ai ni hpe tsawra nga masai: nanhte chyawm gaw mungkan ga hte seng ai ni n rai myit dai hte, ndai mungkan ga na ngai nanhte hpe lata la made ai majaw, mungkan ga gaw nanhte hpe n dawng n yawt ai rai nga ai.

²⁰Mayam gaw madu hta grau kaba ai n rai, ngu nna ngai nanhte e tsun ai ga hpe dum nga mu: ngai hpe pyi zingri zingrat ma ai rai yang gaw, nanhte hpe mung zingri zingrat na mara ai: nye a ga madat mara ma ai rai yang gaw nanhte a ga hpe mung madat mara ya na mara ai.

²¹Rai timung shanhte gaw nye amying a majaw, dai lam yawng nanhte hpe di na mara ai: kaning rai nme law, ngai e shangun dat ai wa hpe shanhte n chye ma ai.

²²Ngai shanhte hpe n sa tsun ai rai taw gaw, shanhte hta mara n nga na re ai: ya chyawm gaw shanhte a mara lawt na lam, ndang shara n nga masalu ai.

²³Ngai hpe n dawng ai wa gaw, nye Wa hpe mung n dawng ai, rai nga ai.

²⁴Masha kaga n di lu ai amu, ngai shanhte hta n di nngai rai taw gaw, shanhte hta mara n nga na re ai: ya chyawm gaw shanhte ngai hte nye Wa hpe mu da ninglen, an lahkawng hpe n dawng n yawt rai masai.

²⁵Rai timung dai gaw, Mara n nga nga timung, shanhte ngai hpe n dawng n yawt ma ai, nga nna shanhte a tara laika hta ka da ai ga dik wa na matu, rai nga ai.

²⁶Nye Wa kaw nna, nanhte hpang de ngai shangun dat ya na ring ngai, Shalan Shabran ai wa ngu ai, Wa kaw nna pru sa ai tengman ai a Wenyi du jang, shi gaw nye a lam sakse hkam ya na ra ai.

²⁷Nanhte mung, shawng nnan kaw nna ngai hte rau nga manit dai majaw, sakse hkam nga myit dai.