Read Jinghpaw Hanson Version Bible YAWHAN 17 Bible Online

YAWHAN 17 - Jinghpaw Hanson Version Bible bible

YAWHAN 17

¹Dai lam ni Yesu tsun nga ninglen, lamu de mada yu nna, “Wa e, nye ahkying du sali ai: ngai nsha wa a lata de nang ap ya ai yawng mayawng hpe shi htani htana asak jaw nga u ga, hkrung mahkrung a ntsa e up ai ahkang aya nang shi hpe jaw nit dai hte maren,

²ngai nsha wa e na a hpung shingkang shapraw ya lu n ga, nsha wa a hpung shingkang hpe mung, shapraw ya e law.

³Htani htana asak ngu ai chyawm gaw, langai sha rai nga ai hte tengman re ai nang Karai Kasang hpe mung, nang shangun dat ai wa Yesu Hkristu hpe mung, shanhte chye chyang lu ai hpe, ngu ai, rai nga ai.

⁴Ngai gun hpai na matu, nang ngai e ap ya ai amu hpe, ngai gun hpai ngut se ai rai nna, ga ntsa e na a hpung shingkang shapraw da ya se ai.

⁵Wa e, ginding aga garai n lat kaw nna, nang hte rau ngai lu nga ai hpung shingkang ngu ai, nang hkum hte nan, ya mung ngai hta dan hkung shangun e law.

⁶Mungkan ga na nang ngai e ap ya ai masha ni hpe, na a amying ningsang ngai shadan ya se ai; shanhte gaw na a ni rai ma ai rai nna, nang shanhte hpe ngai e jaw nit dai; shanhte mung na a mungga hkan shatup masai.

⁷Nang ngai hpe jaw majaw yawng, nang kaw na rai nga ai gaw, ya shanhte chye masai:

⁸kaning rai nme law nang ngai e jaw dat ai mungga hpe, ngai shanhte hpe jaw mawe ai rai nna, shanhte mung dai hpe hkap la masai majaw, nang kaw na ngai pru sa nngai gaw, shanhte gaja wa teng teng chye ma ai hte, nang ngai hpe shangun dat ndai mung, kamsham ma ai.

⁹Shanhte a matu mara ngai hpyi nngai: mungkan masha ni a matu mara hpyi nngai n rai; nang ngai hpe jaw ai ni a matu she hpyi nngai; kaning rai nme law, shanhte gaw, na a ni rai nga ma ai:

¹⁰dai hta kaga, ngai lu malu gaw na a rai nga ai; nang lu malu mung, nye a rai nga ai rai nna, nye a hpung shingkang shanhte hta dan hkung li ai.

¹¹Ya kaw nna ngai gaw mungkan ga e n nga nngai, ndai ni chyawm gaw, mungkan ga e nga nga na rai ma ai: ngai gaw nang hpang de wa na rai nga nngai. Chyoi pra ai Wa e, an gaw langai sha rai nga ga ai zawn, ndai ni mung rai nga mu ga, nang ngai e jaw ai ni hpe, na a mying ningsang hta shagrin shangang da u.

¹²Ngai shanhte hte rau nga nga ai hte yang, nang ngai e jaw ai ni hpe, na a amying ningsang hta ngai shagrin shangang da nna, shanhte hpe makawp maga mase ai: shanhte hta na hten bya ai a kasha hta kaga gaw, langai mi muk n hten n bya ma ai; dai wa a hten bya ai chyawm gaw, Chyum laika hta rawng ai ga dik wa na matu rai nga ai.

¹³“Ya gaw nang hpang de ngai wa na rai nna, nye a kabu gara ai gaw shanhte hkum hta nan hpring tup wa malu ga, ngu nna mungkan ga e, ga ndai ngai tsun da nga nngai.

¹⁴Na a mungga ngai shanhte hpe jaw da mase ai: ngai gaw mungkan ga na n rai nngai hte maren, ndai ni mung mungkan ga na n rai ma ai majaw, mungkan masha ni shanhte hpe n dawng nga ma ai.

¹⁵Ndai ni hpe mungkan ga na htawt la na, ngai hpyi nngai n rai, n shawp n kap ai hta na shanhte hpe makawp maga na she, ngai hpyi nngai.

¹⁶Ngai gaw mungkan ga na n rai nngai hte maren, ndai ni mung mungkan ga na n rai ma ai.

¹⁷Na a tengman ai lam hta, shanhte hpe shachyoi shapra ya mu; na a mungga gaw, tengman ai lam rai nga lit dai.

¹⁸Nang ngai hpe mungkan ga de shangun dat ndai zawn, ngai mung shanhte hpe mungkan ga de shangun dat da mawe ai.

¹⁹Shanhte hkum nan, tengman ai lam hta chyoi pra nga mu ga, ngu nna ngai gaw shanhte a matu mara, nye hkum dai shachyoi shapra tawn se ai.

²⁰“Ndai ni a matu sha ngai hpyi nngai n rai; shanhte tsun dan ai ga a majaw, ngai hpe kamsham ai ni a matu mung, ngai hpyi nga nngai:

²¹nang ngai hpe shangun dat ndai gaw, mungkan ga na ni kamsham lu mu ga, dai ni nlang hte gaw langai sha tai nna, Wa e, nang ngai hta nga nga nna, ngai mung nang hta nga nga nngai zawn, dai ni nlang hte gaw, an hta nga nga na matu, ngai hpyi nga nngai.

²²An gaw langai sha rai nga ga ai zawn, ngai gaw shanhte hta nga nga nna, nang mung ngai hta nga nga ai a marang e, shanhte langai sha tai wa nna, langai sha hta hkum tsup wa lu na matu mung,

²³nang ngai hpe shangun dat ndai hte nang ngai hpe tsawra ndai zawn, shanhte hpe mung tsawra nga ndai gaw, mungkan masha ni chye lu na matu mung, nang ngai e jaw ai hpung shingkang hpe, ngai shanhte hpe jaw da mase ai.

²⁴“Wa e, gingding aga garai n lat kaw nna, nang ngai hpe tsawra nga ndai majaw, nang ngai e jaw ai hpung shingkang hpe, ngai hpe jaw da ai ni mung mada mu lu mu ga, ngai nga ai shara e shanhte ngai hte rau nga nga lu na hpe, ngai ra nga nngai.

²⁵Dinghpring ai Wa e, mungkan ga na ni nang hpe n chye ma timung, ngai chye nga nngai: nang ngai hpe shangun dat ndai gaw, ndai ni mung chye nga ma ai:

²⁶nang ngai e tsawra ai n-gaw nwai myit gaw, shanhte hta anga nga u ga mung, ngai shanhte hta anga nga na matu mung, na a mying ningsang hpe ngai shanhte e shachye shachyang mase ai rai nna, a shachye shachyang nga na nngai law,” nga ai.