Read Jinghpaw Hanson Version Bible YAWHAN 19 Bible Online

YAWHAN 19 - Jinghpaw Hanson Version Bible bible

YAWHAN 19

¹Dai re ai majaw Pilat gaw Yesu hpe gang la nna kayat wu ai.

²Hpyen masha ni mung ju hpun hte lagup hkri la nhtawm, shi a baw hta shagup ya nna, palawng ahkyeng mung shi hpe jahpun mu ai:

³shing di nhtawm, shi hpang de shanhte sit sa nna, “Yuda ni a Hkawhkam e, nang a lu nit ga law,” nga nna tsun let shi hpe kahpret ma ai.

⁴Shaloi Pilat gaw shinggan de bai pru nna, shanhte hpe, “Yu mu, ndai wa hta hpa mara mung ngai n mu nngai gaw, nanhte chye lu myit ga, ngu nna ngai shi hpe nanhte hpang de shapraw dan made ai,” ngu wu ai.

⁵Yesu mung, ju lagup gup ai hte palawng ahkyeng hpun let pru wa ai. Shaloi Pilat gaw, “Ndai masha wa hpe yu mu!” ngu nna shanhte hpe tsun mu ai.

⁶Dai majaw hkinjawng agyi ni hte du agyi ni gaw shi hpe mu jang, “Wudang hta jen da u, jen da u,” nga nna jahtau ma ai. Shaloi Pilat gaw, “Nanhte nan shi hpe la nna jen da mu; ngai gaw shi hta hpa mara mung n mu nngai,” ngu nna shanhte hpe tsun mu ai.

⁷Shaloi Yuda masha ni gaw, “Anhte mung tara lu ga ai; ndai wa gaw shi hkum hpe Karai Kasang a Kasha hpyi hpun ai a majaw, dai tara hte maren si ging nga ai,” ngu nna shi hpe htan mu ai.

⁸Pilat gaw dai ga na ai majaw grau hkrit nga ai rai nna,

⁹Htingnu nhku de bai shang nhtawm, Yesu hpe, “Nang kanang na rai n ta?” ngu nna san wu ai. Yesu chyawm gaw ga hkaw mi muk n htan wu ai.

¹⁰Dai majaw Pilat gaw, “Nang ngai hte ga n tsun hkraw nni? Ngai nang hpe dat dat lu ai ahkang hte, wudang hta jen da lu ai ahkang lu nngai, nang n chye nni?” ngu nna shi hpe tsun wu ai.

¹¹Yesu gaw, “Nang hpe ntsa de nna, ahkang jaw da sai n rai taw gaw, nye a ntsa e hpa ahkang mung, nang n lu na ndai: dai majaw ngai hpe nang kaw sa ap ya ai wa gaw, yubak grau kaba lu ai,” ngu nna, shi hpe htan wu ai.

¹²Shing nga ai majaw Pilat gaw Yesu hpe dat dat na lam tam nga ai: Yuda masha ni mahtang, “Nang dai wa hpe dat dat n yang gaw, nang Kehta hkawhkam a jinghku n rai nit dai: tinang dai tinang hkum hpe hkawhkam shatai la ai wa gaw, Kehta hkawhkam hte nhtan shai ai wa rai nga ai,” nga nna jahtau ma ai.

¹³Pilat gaw dai ga na jang, Yesu hpe woi shapraw nhtawm, Hebre ga hte Gabahta ngu ai Nlung nep ai shara e tara tingnyang hta dung nga ai.

¹⁴Ya, Shalai wa ai poi a matu shachyip ai nhtoi rai nga ai hte, hkying kru daram mung rai sai. Shaloi Pilat gaw Yuda masha ni hpe, “Nanhte a hkawhkam wa hpe yu yu mu,” ngu mu ai.

¹⁵Dai re ai majaw shanhte gaw, “La kau u, la kau u, wudang hta jen da kau u!” nga nna jahtau ma ai. Bai Pilat gaw, “Nanhte a Hkawhkam wa hpe wudang hta ngai jen da na rai ni?” ngu nna shanhte hpe san wu ai. Shaloi hkinjawng agyi ni gaw, “Kehta hkawhkam hta kaga, anhte hkawhkam n lu ga ai,” ngu nna htan mu ai.

¹⁶Dai re ai majaw Yesu hpe wudang hta jen da kau mu ga nga, shanhte a lata de ap ya kau wu ai.

¹⁷Dai rai nna shanhte gaw Yesu hpe woi dun wa mu ai: Yesu gaw shi a wudang shi dai hpai nna, Pungkum ngu ai shara de pru sa wa ai; dai shara hpe Hebre ga hte Golgohta nga ma ai:

¹⁸shanhte gaw dai yang e shi hpe wudang hta jen da ma ai; shi hte rau marai lahkawng hpe mung, maga mi de langai ngai di jen da mu ai rai nna, Yesu gaw dai yan a lapran e rai nga ai.

¹⁹Pilat mung masat dingsat laika ka la nna wudang hta shakap da wu ai. Dai ka ai gaw, Yuda ni a Hkawhkam Nazaret wa Yesu, nga ai rai lu ai.

²⁰Yesu hpe jen da ai shara gaw mare hte mung ni nga ai hte, dai laika hpe Hebre ga, Latin ga, Heleni ga hte ka da nga ai majaw, Yuda masha law law wa dai masat dingsat laika hpe hti ma ai.

²¹Shing nga ka da ai majaw, Yuda masha ni a hkinjawng agyi ni gaw, Pilat hpe, “Yuda ni a Hkawhkam nga nna hkum ka, Ngai gaw Yuda masha ni a Hkawhkam rai nngai, nga nna shi tsun ai, ngu nna she ka u,” ngu nna sa tsun mu ai.

²²Pilat gaw, “Ngai ka ai hku ngai ka da se ai,” ngu nna htan mu ai.

²³Hpyen masha ni gaw Yesu hpe jen da ngut jang, shi a hpun palawng hpe la nna, mali brang di ga karan nhtawm, hpyen masha langai mi e daw daw la mu ai: dai kata palawng hpe mung shing di na maw mu ai: rai timung, kata palawng gaw shakung n rawng ai, lawng du nna htum hkra da ai rai nga ai.

²⁴Dai majaw shanhte gaw, “Palawng ndai hpe anhte n gang je ai sha, kadai mahtang la ang na gaw hpaida da ga,” nga nna shada da tsun ma ai; dai gaw, “Shanhte nye a hpun nba hpe shada karan la nna, Nye a kata palawng hpe mung hpaida da ma ai,” nga nna laika hta rawng ai ga dik wa na matu rai nga ai.

²⁵Dai majaw hpyen masha ni shing rai galaw ma ai. Ya Yesu a wudang makau e shi a kanu hte, kanu a nau na Klopa a madu jan Mari hte, Magdala Mari hte tsap nga ma ai.

²⁶Dai majaw Yesu gaw kanu hte shi tsawra ai sape, makau e tsap nga ma ai hpe, mu wu yang, kanu hpe, “Numsha e, ning sha hpe yu u,” ngu wu ai.

²⁷Dai sape hpe mung, “Ning nu hpe yu u,” ngu wu ai. Dai shani kaw nna dai sape gaw, Yesu a kanu hpe shi a nta e woi tawn da wu ai.

²⁸Dai hpang Yesu gaw amu mahkra ngut sai hpe chye wu jang, “Ngai hpang kara nngai,” nga nna laika shadik na matu tsun wu ai.

²⁹Dai yang e ntsin hkri hte hpring nga ai dibu langai mi dung nga ai: dai majaw shanhte gaw hka kamu hta ntsin hkri jahpring la nhtawm, mai-aw ndung hta shakap nna, shi a n-gup hta gawn ya mu ai.

³⁰Yesu gaw dai ntsin hkri hkap lu ngut jang, “Ngut masali ai,” nga nhtawm, baw nga di nna, nsa jahti kau wu ai.

³¹Dai shani gaw shachyip ai nhtoi rai nga ai hte, hpang shani mung Laban nhtoi kaba rai nga ai majaw, laban nhtoi e wudang hta mang n noi nga u ga, Yuda masha ni gaw dai ni a lagaw kayat daw nna, dai mang ni hpe htawm kau na, Pilat kaw ahkang hpyi ma ai.

³²Dai majaw hpyen masha ni sa nna, shi hte rau jen da ai yan a lagaw hpe kayat daw ya mu ai:

³³Yesu kaw du yang, shi si mat boi sai hpe shanhte mu ma ai majaw, shi a lagaw hpe gaw n daw ya mu ai:

³⁴rai timung hpyen masha langai mi gaw, shi a garep hpe ri hte galun waw ya wu ai rai nna, shaloi jang sai hte ntsin pru wa ai.

³⁵Dai lam mu ai wa gaw sakse hkam wu ai rai nna, shi a sakse gaw tengman lu ai: nanhte mung kamsham lu myit ga, tengman ai ga shi tsun nga ai gaw, shi dai chye nga ai.

³⁶Kaning rai nme law, dai lam byin ai gaw, “Shi a nra langai mi muk daw na n rai,” nga ai laika ga dik wa na matu rai nga ai.

³⁷Bai laika langai mi hta, “shanhte galun waw ai wa hpe shanhte mu lu na maru ai,” nga ai.

³⁸Dai hpang, Yuda masha ni hpe hkrit ai majaw, mayun de nna Yesu a sape tai nga ai, Aramahti mare na Yawsep ngu ai wa gaw, Yesu a hkum tsawp hpe shayu la na, Pilat kaw ahkang hpyi wu ai; Pilat mung ahkang jaw dat wu ai: dai re ai majaw shi sa nna dai hkum tsawp shayu la wu ai.

³⁹Shawng de shana e shi kaw sa chyai ai, Nikodi mung sa ai rai nna, mura hte achyaw kayau ai manam pyaw ai baw, joi sumshi dang la sa ai.

⁴⁰Shaloi shan gaw Yesu a hkum tsawp hpe la nhtawm, Yuda masha ni a makoi mayang ai hking hte maren, manam pyaw ai baw hte sumpan e kayawp ahkyen mu ai.

⁴¹Shi hpe jen da kau ai shara e sun langai mi nga ai: dai sun e masha langai mi hpe muk garai n makoi yu ai lup ningnan langai mi nga ai.

⁴²Yuda masha ni a shachyip ai nhtoi rai nga ai hte, lup dai mung ni nga ai majaw, shan gaw Yesu hpe dai yang e tawn da mu ai.