Read Jinghpaw Hanson Version Bible YAWHAN 2 Bible Online

YAWHAN 2 - Jinghpaw Hanson Version Bible bible

YAWHAN 2

¹Dai hpang masum ya du ai shani e, Galile mung na Hkana kahtawng e, num hkungran ai poi rai nga ai rai nna, Yesu a kanu gaw dai poi hta lawm nga ai:

²Yesu hpe mung, Shi a sape ni hte nawng, dai poi de shaga mu ai.

³Tsabyi ma mat jang Yesu a kanu gaw, “Shanhte tsabyi n lu masai,” ngu nna shi hpe tsun wu ai.

⁴Shaloi Yesu gaw, “Numsha e, ngai nang hte hpa seng a ta? nye a ahkying garai n du li ai,” ngu nna shi hpe htan wu ai.

⁵Rai timung shi a kanu gaw, “Shi nanhte hpe tsun matsun galaw mu,” ngu nna shangun ma ni hpe tsun da mu ai.

⁶Ya dai yang e, Yuda masha ni a jasan jaseng ai htung hte maren, dang lahkawng masum daram ram shang ai, nlung yam kru shadun tawn ai nga malu ai.

⁷Yesu gaw, “Ndai yam ni hta ntsin ja bang jahpring mu,” ngu nna shangun ma ni hpe tsun mu ai: dai rai nna shanhte gaw, yam nten dem rai hkra hkra ja bang ma ai.

⁸Bai Yesu gaw, “Ya kamai la nna poi up wa hpe wa jaw mu,” ngu nna shanhte hpe tsun wu yang, shanhte wa jaw ma ai.

⁹Poi up wa gaw ntsin na byin ai tsabyi hpe chyim yu nhtawm, dai kanang na lu la ai gaw, ntsin ja ai ma ni chye ma timung, poi up wa gaw n chye wu ai majaw, la nnan wa hpe shaga la nna,

¹⁰“Masha ni kadai mung tsabyi kaja shawng jaw ga ma ai; dai lu law ma jang she, n jet ai baw jaw ma ai: nang gaw tsabyi kaja hpe ya du hkra kyem da ndai,” ngu wu ai.

¹¹Shing rai Yesu gaw shi dan ai lamik kumla ni hta, shawng dan hpang ai gaw, Galile mung na Hkana kahtawng e dan nna, shi a hpung shingkang dan shapraw wu ai: shi a sape ni mung, shi hpe kamsham ma ai.

¹²Dai hpang shi gaw, kanu, kanau ni hte shi a sape ni hte nawng, Kaperna-um mare de yu wa nna, dai yang e mung, gade ya wa n hkring nga ma ai.

¹³Ya Yuda masha ni a Shalai wa ai poi du wa ra ai rai nna, Yesu gaw Yerusalem mare de lung wa sai.

¹⁴Shaloi nawku Htingnu e sagu, dumsu, hkrudu dut ai ni hte, gumhpraw byan sha ai ni dung nga ma ai hpe, shi mu wu ai rai nna,

¹⁵shingri hte galaw ai lasik la nhtawm, shanhte mahkra hpe mung, sagu dumsu ni hpe mung, dai nta na shachyut nna, gumhpraw byan sha ai ni a gumhpraw ni hpe ru kau ya ai hte, shanhte a ku ni hpe kanawng kadawng kau ya mu ai:

¹⁶hkrudu dut ai ni hpe mung, “Ndai rai ni la wa mu; nye Wa a nta hpe hpaga nta hkum shatai mu,” ngu nna tsun mu ai.

¹⁷Dai shaloi, “Na nta hta manoi ai nja nhpra myit gaw, ngai e sha kau na ra ai,” nga nna ka da ai ga hpe, sape ni dum ma ai.

¹⁸Shing re ai majaw Yuda masha ni gaw, “Nang ning rai galaw ai gaw, anhte hpe hpa lamik kumla madun dan n ta?” ngu nna shi hpe tsun mu ai.

¹⁹Yesu gaw, “Ndai htingnu hpya kau mu; masum ya laman e ngai dai hpe sharawt na we ai,” ngu nna shanhte hpe htan mu ai.

²⁰Shing nga ai majaw, Yuda masha ni gaw, “Ndai nawku Htingnu hpe mali shi kru ning tup galaw ai re ai, nang chyawm gaw masum ya laman e sharawt lu na wu ni?” ngu mu ai.

²¹Rai timung, Yesu tsun ai gaw, shi a hkumhkrang ngu ai htingnu hpe, sha-ang nna nga ai, rai nga ai.

²²Dai re ai majaw si ai ni kaw na hkrung sharawt la ai hkrum wu ai shaloi, sape ni gaw shi shing nga tsun ai ga hpe dum ma ai rai nna, Chyum laika hpe mung, Yesu tsun da ai ga hpe mung, kamsham ma ai.

²³Dai Shalai wa ai poi nhtoi ni a laman e Yerusalem mare hta shi naw nga nga yang, masha law law wa, shi dan ai lamik kumla mu lu ma ai majaw, shi a mying ningsang hpe kamsham ma ai.

²⁴Yesu chyawm gaw, masha yawng mayawng a lam chye da wu ai majaw mung, masha kraw kata e kaning nga ai myit rawng nga ai hpe, shi nan chye nga ai rai nna,

²⁵masha wa a lam hpe gade e muk sakse sa hkam ya na, n ra ai majaw mung, shi hkum nan shanhte hta myit n krem da wu ai.