Read Jinghpaw Hanson Version Bible YAWHAN 21 Bible Online

YAWHAN 21 - Jinghpaw Hanson Version Bible bible

YAWHAN 21

¹Dai hpang Yesu gaw Tiberi nawng makau e, sape ni hpe shi hkum bai madun dan mu ai; dai shaloi na madun dan ai lam gaw, ning rai nga ai:

²Simun Petru hte Didumu ngu ai Htawma, Galile mung Hkana kahtawng na Nahtanela, Zebedi a kasha yan, kaga sape lahkawng, dai hte rau nga ma ai.

³Shaloi Simun Petru gaw, “Ngai nga sa hkan ni ga,” ngu nna shanhte hpe tsun wu ai. Shanhte gaw, “Anhte mung hkan sa na ga ai,” nga ma ai. Shaloi shanhte pru sa nna li hta shang ma ai: dai shana shanhte gaw langai mi muk n lu ma ai.

⁴Nhtoi htoi wa yang, Yesu gaw nawng hkin-gau ntsa e tsap nga ai: rai timung sape ni gaw, Yesu re ai, n chye mu ai.

⁵Dai majaw Yesu gaw shanhte hpe, “Ngai sha ni e, nanhte shahpa lama ma lu myit ni?” ngu nna san wu ai; shanhte gaw, “N lu ga ai,” ngu nna shi hpe htan mu ai.

⁶Shaloi shi gaw, “Dai li a hkra maga de sumgawn jahkrat mu, shaloi lu na myit dai,” ngu nna shanhte hpe tsun mu ai. Dai hte maren shanhte jahkrat nna, nga law law wa magawn la lu ai majaw, sumgawn pyi n gang lu mu ai.

⁷Dai rai nna Yesu a tsawra ai sape gaw, “Madu she rai nga ai,” ngu nna Petru hpe tsun wu ai. Madu re ai nga ai hpe Simun Petru na jang, shi singgu krin rai nga ai majaw, ntsa palawng hta labu nna, nawng de gan shang wa ai.

⁸Kaga sape ni chyawm gaw, hkin-gau hte manga shi lam sha gang nga ai majaw, nga hte hpring chyat re ai sumgawn karawt let, li kaji hte du wa ma ai.

⁹Shanhte gaw hkarang ntsa de du wa ma yang, nra wan mang hta, nga kakang da ai hte, muk tawn da ai hpe, mu mu ai.

¹⁰Shaloi Yesu gaw, “Ya nanhte lu la ai nga hta na la wa marit,” ngu wu ai.

¹¹Dai majaw Simun Petru lung nna, nga kaba latsa e manga shi masum ting rawng ai sumgawn hpe hkarang ntsa de karawt shalun wu ai: dai hte wa law timung, sumgawn gaw n je lu ai.

¹²Shaloi Yesu gaw, “wa marit, jahpawt shat wa sha maru,” ngu nna shanhte hpe tsun mu ai. Shi Madu rai nga ai hpe sape ni chye ma ai majaw, shanhte hta na kadai mung, “Nang kadai rai n ta?” ngu nna n san wam mu ai.

¹³Yesu gaw dai muk la nna sape ni hpe sa jaw mu ai; nga hpe mung dai hte maren sa jaw mu ai.

¹⁴Yesu shi si ai ni kaw na bai hkrung rawt ai hpang, sape ni hpe shi a hkum madun dan ai hta na, ndai gaw masum lang na rai nga ai.

¹⁵Ya shanhte jahpawt shat sha ngut jang, Yesu gaw Simun Petru hpe, “Yawhan a kasha Simun e, ndai ni tsawra ai hta, nang ngai hpe grau tsawra nni?” ngu nna san wu ai. Shi gaw, “Rai sa, Madu e, ngai nang hpe tsawra nga nngai gaw, nang chye nga ndai,” ngu nna htan wu ai. Shaloi Yesu gaw, “Nye a sagu kasha ni hpe bau nga u,” ngu nna shi hpe tsun wu ai.

¹⁶Bai lahkawng lang, “Yawhan a kasha Simun e, nang ngai hpe tsawra nga nni?” ngu nna shi hpe san wu ai. Shi gaw, “Rai sa, Madu e, ngai nang hpe tsawra nga nngai gaw, nang chye nga ndai,” ngu nna bai htan wu ai. Yesu gaw, “Nye a sagu ni hpe rem nga u,” ngu wu ai.

¹⁷Bai masum lang, “Yawhan a kasha Simun e, nang ngai hpe tsawra nga nni?” ngu nna san wu ai. Masum lang du hkra, Nang ngai hpe tsawra nga nni? nga nna shi hpe san wu ai majaw Petru myit yawn nna, “Madu e, nang gaw yawng mayawng hpe chye nga ndai; ngai nang hpe tsawra nga nngai gaw, nang chye nga ndai,” ngu nna, htan wu ai. Yesu gaw, “Nye a sagu ni hpe bau nga u.

¹⁸Nang hpe ngai gaja wa teng teng tsun de ga, Nang shabrang nga ai hte yang, na a hkum hpe nang dai shingkyit kyit nna, sa mayu ai shara shagu de sa lu ndai: rai timung, nang dingla jang chyawm gaw, na a lata yan hpe nang lalam nna, masha kaga gaw nang hpe kyit ya nhtawm, nang n ra ai shara de woi sa wa na rin dai,” ngu nna shi hpe tsun wu ai.

¹⁹Shing nga tsun ai gaw, Petru gaw kaning re ai si lam hte Karai Kasang a hpung shingkang shapraw lu na hpe, tau nna tsun ai rai nga ai. Ga dai tsun ngut jang, Yesu gaw Petru hpe, “Ngai kaw hkan nang rit,” ngu wu ai.

²⁰Shaloi Petru kayin yu wu yang, Yesu tsawra ai sape ngu ai, shawng de shana shat sha nga ai shaloi, Yesu a sinda hta shamyet nna, “Madu e, nang hpe ap kau na wa gaw kadai mahtang rai ta?” nga nna san ai sape hkan nang nga ai hpe, mu wu ai.

²¹Petru gaw dai wa hpe mu jang Yesu hpe, “Madu e, rai taw, ndai wa gaw kaning rai na ra ta?” ngu nna san wu ai.

²²Yesu gaw, “Ngai du sa ai nhtoi du hkra, ngai shi hpe nga nga shangun mayu nngai, dai nang hte hpa seng a ta? nang gaw nye hpang hkan nang rit,” ngu nna htan wu ai.

²³Ga dai majaw, dai sape gaw si na n rai, nga nna hpunau ni hta tsun shajang ma ai: rai timung, dai sape hpe n si na re ai, nga nna Yesu tsun ai n rai; “Ngai du sa ai nhtoi du hkra, ngai shi hpe nga nga shangun mayu nngai, dai nang hte hpa seng a ta?” nga nna tsun ai sha, rai nga ai.

²⁴Dai sape wa gaw ndai lam ni hpe sakse hkam nna, ndai lam ni ka da ai wa rai nga ai: shi a sakse tengman nga ai gaw, anhte chye ga ai.

²⁵Yesu galaw ai amu kaga law law wa naw nga ai; dai amu ni a lam shagu hpe hkan ka da yang, dai ka da ai laika ni gaw mungkan ga hta pyi n shang na re ai, ngu nna ngai myit nngai law.