Read Jinghpaw Hanson Version Bible YAWHAN 4 Bible Online

YAWHAN 4 - Jinghpaw Hanson Version Bible bible

YAWHAN 4

¹Yesu gaw shi hkum nan baptisma n jaw timung, shi a sape ni jaw ma ai rai nna,

²Yesu gaw Yawhan hta grau nna sape shatai ai hte baptisma jaw nga ai gaw, Hparishe ni na masai hpe, dai Madu chye wu jang,

³Yuda mung na shi pru nhtawm, Galile mung de bai wa ai.

⁴Shaloi shi Samari mung ka-ang hku ga wa lu na rai nga ai.

⁵Dai majaw shi gaw, Yaku e shi a kasha Yawsep hpe jaw ai ga dachyawk makau na, Suhka ngu ai Samari mung na mare langai mi de du wa ai: dai yang e Yaku a hka htung nga nga ai.

⁶Yesu gaw lam hkawm ba ai majaw, dai hka htung makau e dung nga ai: dai aten gaw hkying kru daram rai nga ai.

⁷Shaloi Samari numsha langai mi hka ja na pru sa ai: Yesu gaw, “Ngai hpe ntsin jaw lu e,” ngu nna shi hpe hpyi wu ai:

⁸shi a sape ni chyawm gaw shahpa mari na matu, mare de sa mat ma ai.

⁹Dai rai nna Samari numsha gaw, “Nang Yuda masha rai da nhtawm me, ngai Samari numsha hpe, hpa rai ntsin hpyi n ta?” ngu nna shi hpe tsun wu ai: kaning rai nme nga yang, Yuda masha ni gaw Samari masha ni hte n kanawn ga ma ai.

¹⁰Shaloi Yesu gaw, Karai Kasang a kumhpa hte, “Ngai hpe ntsin jaw lu e, nga nna nang kaw hpyi ai wa hpe, nang chye wu taw gaw, nang shi kaw hpyi nna, shi gaw nang hpe hkrung ai ntsin jaw na nit dai,” ngu nna shi hpe htan wu ai.

¹¹Dai numsha mung, “Madu e, nang ntsin ja na rai hpa mung n lu ndai, hka htung mung sung nga ai; dai re ai majaw dai hkrung ai ntsin gaw, nang kanang na lu n ta?

¹²Anhte a wa Yaku gaw ndai hka htung anhte hpe jaw da ma ni ai rai nna, shi hkum nan hte shi a kashu kasha ni, shi a yamnga ni, ndai hta na lu masai: nang gaw shi hta grau kaba nni?” ngu nna shi hpe tsun wu ai.

¹³Shaloi Yesu gaw, “Ntsin ndai lu ai wa kadai mung, hpang bai gara na ra ai; ngai jaw ai ntsin lu ai wa chyawm gaw, galoi mung hpang gara na n rai:

¹⁴dai ngai jaw ai ntsin gaw, dai wa hta htani htana asak a matu lwi pru ai hka hpawk tai na ra ai,” ngu nna shi hpe htan wu ai.

¹⁵Shaloi dai numsha gaw, “Madu e, ngai hpang mung n gara, nang de mung hka n sa ja ra n ga, ntsin dai jaw e,” ngu nna shi hpe hpyi wu ai.

¹⁶Yesu gaw, “Na madu wa hpe naw wa shaga la nna, nang de sa rit,” ngu wu ai.

¹⁷Dai numsha gaw, “Ngai la n lu nngai,” ngu nna htan wu ai. Yesu gaw, “Ngai la n lu nngai, nga nna nang tsun ai ga gaw, rai nga lit dai:

¹⁸kaning rai nme law, nang la manga lu yu nit dai; ya na la gaw, na a madu wa n rai lit dai; ndai lam hta nang teng ai ga tsun nit dai,” ngu nna shi hpe tsun wu ai.

¹⁹Shaloi dai numsha gaw, “Madu e, nang myihtoi rai nga ndai ngai dum se ai:

²⁰anhte a ji wa ni gaw ndai bum e nawku ga ma ai; nanhte chyawm gaw, nawku mai ai shara, Yerusalem mare e sha rai nga ai, nga nna tsun ga myit dai,” ngu wu ai.

²¹Yesu gaw, “Numsha e, nye ga hpe kam u: ndai bum e mung n rai, Yerusalem mare e mung n re ai, Wa hpe nawku na aten gaw du na ra ai.

²²Nanhte gaw tinang n chye ai hpe nawku myit dai; anhte chyawm gaw tinang chye ai hpe nawku ga ai: kaning rai nme law, hkye hkrang la ai lam gaw, Yuda amyu hta na rai nga ai.

²³Rai timung, tengman ai hku nawku ai ni gaw, wenyi hta mung, tengman ai hta mung, Wa hpe nawku na aten gaw, du wa ra ai rai nna, ya e pyi rai nga ai: Wa gaw shing rai nawku ai ni hpe tam nga ai.

²⁴Karai Kasang gaw Wenyi rai nga ai: shi hpe nawku ai ni gaw, wenyi hta mung, tengman ai hta mung, nawku lu na rai nga ai,” ngu nna shi hpe tsun wu ai.

²⁵Dai numsha mung, “Hkristu ngu ai Meshia du na ra ai gaw, ngai chye nngai; dai wa du jang gaw, shi anhte hpe lam magup tsun madun na ra ai,” ngu wu ai.

²⁶Shaloi Yesu gaw, “Nang hte ga tsun nga ai, ngai gaw, dai wa nan rai nngai,” ngu nna shi hpe tsun wu ai.

²⁷Dai shaloi shi a sape ni du wa nna, shi numsha hte shaga nga ai hpe, wa mau ma ai; rai timung, “Nang hpa ra n ta?” ngu na mung, “Shi hte hpa rai shaga nga n ta?” ngu na mung, gade e muk n san wam mu ai.

²⁸Dai rai nna dai numsha gaw, shi a ntsin dibu tawn kau da nna, mare de bai wa nhtawm, mare masha ni hpe,

²⁹“Ngai galaw ai lam yawng, ngai hpe bai tsun dan ya ai wa hpe sa yu maru: dai wa gaw Hkristu rai na kun?” ngu nna wa tsun mu ai.

³⁰Shanhte mung mare de na pru sa nna, shi kaw sa du ma ai.

³¹Dai laman e sape ni gaw, “Rabai e, shat sha u,” ngu nna shi hpe agaw mu ai.

³²Shi gaw, “Nanhte n chye ai shahpa ngai lu da we ai,” ngu nna shanhte hpe htan mu ai.

³³Dai majaw, sape ni gaw, “Masha langai ngai shi e shat sa jaw masai kun?” nga nna shada san tsun ma ai.

³⁴Dai rai nna Yesu gaw, “Ngai e shangun dat ai wa a myit hku hkan galaw na hte, shi a magam bungli shangut lu na gaw, nye a shahpa rai nga li ai.

³⁵Nanhte gaw, ‘Ya shata mali naw ra ai, dai lai jang she mam dan ten du na re ai, nga myit dai n rai myit ni?’ Yu mu, ngai nanhte hpe tsun made ga, yi hkauna ni hta dan na mam, ya e pyi myin htoi nga ai hpe, sharawt mada yu mu:

³⁶gat ai wa hte dan ai wa rau kabu lu na she, dan ai wa mung shabrai lu la nna, htani htana asak a matu nsi naisi shu la lu ai.

³⁷Kaning rai nme law, langai mi gaw gat, langai mi gaw dan re ai, nga ai ga gaw, ndai yang e gaja teng nga ai.

³⁸Nanhte n-gun n dat ai kaw na dan la nu, ngai nanhte hpe shangun dat made ai: masha kaga ni makan bungli galaw masai rai nna, nanhte gaw shanhte a makan bungli hta shang la nga myit dai,” ngu nna shanhte hpe tsun mu ai.

³⁹Dai numsha e, “Ngai galaw ai lam yawng shi ngai hpe bai tsun dan ya ai,” nga nna sakse hkam ai ga majaw, dai mare na Samari masha law law wa, Yesu hpe kamsham ma ai.

⁴⁰Dai rai nna, Samari masha ni shi hpang de du ma yang, shanhte hte anga nga na hpyi ma ai majaw, dai yang e ni ni hkring nga ai.

⁴¹Shi a ga majaw mung kamsham ai ni grau law wa ma ai:

⁴²dai ni gaw dai numsha hpe, “Ya gaw, na a ga majaw sha anhte kamsham ai n rai saga ai: anhte nan na la lu nna, ndai wa gaw mungkan ga a Hkye hkrang la ai Madu teng teng rai nga ai chye saga ai,” ngu mu ai.

⁴³Ni ni lai jang shi gaw dai yang na pru nna, Galile mung de rai mat wa ai:

⁴⁴kaning rai nme law, myihtoi gaw tinang mung e arawng n lu ga ai, nga nna Yesu gaw shi hkum dai sakse hkam nga ai.

⁴⁵Dai rai nna, Galile mung de du jang, Galile masha ni gaw poi nhtoi rai yang na, Yerusalem mare e shi galaw dan ai amu mahkra hpe mu ma ai majaw, shi hpe hkap la ma ai: kaning rai nme nga yang, shanhte mung dai poi de sa ma ai.

⁴⁶Dai majaw shi gaw, ntsin hpe tsabyi shatai ai shara, Galile mung na Hkana kahtawng de bai sa du ai. Shaloi e Keperna-um mare na du langai mi a shadang sha gaw machyi nga lu ai.

⁴⁷Yesu gaw Yuda mung na Galile mung de du wa ai hpe, dai duwa na wu yang, shi Yesu hpang de sa nna, shi a kasha hpe yu wa shamai ya na hpyi wu ai: shi gaw si wa magang nga ai.

⁴⁸Dai re ai majaw Yesu gaw, “Nanhte lamik kumla hte mauhpa amu n mu myit yang gaw, nanhte hpa mung n kam n sham myit dai,” ngu nna shi hpe tsun wu ai.

⁴⁹Dai duwa chyawm gaw, “Madu e, ngai sha garai n si yang yu wa ga law,” ngu nna hpyi wu yang,

⁵⁰Yesu gaw, “Wa nu, na nsha gaw bran salit dai,” ngu nna shi hpe tsun dat wu ai. Dai duwa gaw, Yesu tsun ai ga hpe kam let wa mat ai.

⁵¹Shing rai shi wa nga yang, shi a mayam ni shi hpe sa tau nna, kasha bran sai lam, tsun dan mu ai.

⁵²Dai majaw machyi bran ai aten ahkying san wu yang, shanhte gaw, “Mani ahkying sanit e hkum kahtet ai gaw kawp mat sai,” ngu nna htan mu ai.

⁵³Dai rai nna dai ahkying gaw, ‘Na nsha bran salit dai,’ nga nna Yesu shi hpe tsun ai ahkying nan rai nga ai hpe, kawa chye wu ai rai nna, shi hkum nan hte shi a nta masha nlang hte gaw, kamsham mat ma ai.

⁵⁴Ndai lamik kumla gaw Yesu Yuda mung nna, Galile mung de du wa ai, lahkawng lang bat yang na lamik kumla rai nga ai.