Read Jinghpaw Hanson Version Bible YAWHAN 5 Bible Online

YAWHAN 5 - Jinghpaw Hanson Version Bible bible

YAWHAN 5

¹Dai hpang Yuda masha ni a poi langai mi nga ai rai nna, Yesu gaw Yerusalem mare de lung wa ai.

²Ya Yerusalem mare hta dai sagu chyinghka makau e, jarawp manga gap da ai hte, Hebre ga hku Behtesda ngu ai hka lawng langai mi nga ai.

³Dai jarawp ni hta, machyi makaw re ai, myi kyaw ai, lagaw hten ai, hkum katsing si ai masha law law taw nga ma ai.

⁴

⁵Dai yang e sumshi matsat ning tup machyi ai masha langai mi mung lawm nga ai.

⁶Yesu gaw dai wa kaleng taw nga ai hpe mu nna, shing rai machyi nga ai na la sai, chye wu ai majaw, dai wa hpe, “Nang mai mayu nni?” ngu nna san wu ai.

⁷Dai machyi ai wa gaw, “Madu e, hka shamu jang hka lawng de ngai hpe woi shang na masha n lu nngai; ngai shang sa wa nga yang, masha kaga langai ngai nye a shawng e shang mat mat re ai,” ngu nna shi hpe htan wu ai.

⁸Shaloi Yesu gaw, “Rawt u, na a hpun panep la hpai nna hkawm wa su,” ngu nna dai wa hpe tsun wu ai.

⁹Dai wa gaw shaloi jang mai mat ai rai nna, shi a hpun panep hpai let hkawm mat wa ai.

¹⁰Dai shani gaw laban nhtoi rai nga ai. Dai re ai majaw Yuda masha ni gaw, dai machyi mai ai wa hpe, “Dai ni laban nhtoi rai nga ai rai nna, nang hpun panep n mai hpai ndai,” ngu mu ai.

¹¹Shaloi dai wa gaw, “Ngai e shamai ya ai wa e, ‘Na a hpun panep la hpai nna hkawm wa u,’ ngu nngai,” ngu nna shanhte hpe htan wu ai.

¹²Shanhte gaw, “Nang hpe, ‘Hpun Panep la hpai nna hkawm wa u,’ nga ai wa gaw, kadai wa rai ta?” ngu nna san mu ai.

¹³Rai timung, machyi mai ai wa gaw, kadai re ai mung n chye dat wu ai: kaning rai nme law, dai yang e masha hpawng nga ai majaw, Yesu gaw mayun pru mat wa sai.

¹⁴Dai hpang Yesu gaw nawku Htingnu e dai wa hpe mu hkrup nna, “Yu u, nang ya hkam kaja nit dai: shawng na hta grau ai tsin-yam n hkrum n ga, yubak hkum bai galaw et,” ngu nna shi hpe tsun wu ai.

¹⁵Dai wa gaw pru wa nna, shi hpe shamai ya ai wa gaw Yesu rai nga ai hpe, Yuda masha ni e tsun dan wu ai.

¹⁶Laban nhtoi e shing re ai amu galaw ai majaw, Yuda masha ni gaw Yesu hpe zingri shatsang mu ai.

¹⁷Shaloi Yesu gaw, “Nye Wa gaw ya du hkra pyi amu a galaw nga ai rai nna, ngai mung galaw nngai,” ngu nna shanhte hpe htan mu ai.

¹⁸Dai rai nna, laban nhtoi jahprai ai hta n-ga, Karai Kasang hpe nan shi a Kawa nga nna, shi hkum dai hpe Karai Kasang hte shabung wu ai majaw, Yuda masha ni gaw shi hpe sat kau lu na lam, grau nna tam ma ai.

¹⁹Dai re ai majaw Yesu gaw, “Ngai nanhte hpe gaja wa teng teng tsun made ga, Kasha gaw tinang a myit hte hpa mung n galaw lu ai; Kawa galaw ai lam mu mamu hpe sha hkan galaw lu ai: Kawa galaw ai lam shagu, Kasha mung hkan galaw lu na rai nga ai.

²⁰Kawa gaw Kasha hpe tsawra wu ai rai nna, shi hkum dai galaw ai lam yawng mayawng Kasha wa hpe madun wu ai: nanhte mau mahka hkra, ya na hta grau kaba ai lam ni hpe mung, Kasha wa hpe madun na ru ai.

²¹Kaning rai nme law, Kawa gaw si ai ni hpe sharawt nna jahkrung ya ai hte maren, Kasha wa mung shi ra mara ni hpe jahkrung ya wu ai.

²²Dai hta kaga, Kawa hpe hkungga ai hte maren, masha yawng Kasha wa hpe hkungga mu ga nga, Kawa gaw kadai hpe mung tara n dara ai sha, tara dara ai ahkang mahkra Kasha wa hpe ap ya nu ai.

²³Kasha wa hpe n hkungga ai wa gaw, shi e shangun dat ai Kawa hpe mung n hkungga ai rai nga ai.

²⁴Nanhte hpe ngai gaja wa teng teng tsun made ga, Nye a ga madat nna ngai e shangun dat ai wa hpe kamsham ai wa gaw, htani htana asak lu la wu ai rai nna, tara dawdan ai kaw n du ai sha, si nga ai kaw nna hkrung nga ai de, kawt lai wa sai.

²⁵Ngai nanhte hpe gaja wa teng teng tsun made ga, Si nga ai ni gaw, Karai Kasang a Kasha a nsen na lu na ahkying du wa ra ai rai nna, ya e pyi rai nga ai: na la ai ni mung hkrung nga na mara ai.

²⁶Kaning rai nme nga yang, Kawa gaw shi hkum dai hta asak rawng nga ai hte maren, Kasha wa hpe mung, shi hkum dai hta asak rawng lu na lam jaw nu ai rai nna,

²⁷shi gaw Masha Kasha rai nga ai majaw, tara dara na ahkang mung shi e ap ya nu ai.

²⁸Dai lam hpe hkum mau myit: kaning rai nme law, lup ni hta rawng nga ai ni nlang hte gaw shi a nsen na nna, pru lu na ahkying du na ra ai:

²⁹kaja ai lam hkan galaw ai ni gaw, asak hkrung ai a bai rawt ai de, n shawp ai lam hkan galaw ai ni gaw, tara dawdan hkrum ai a bai rawt ai de, pru lu na mara ai.

³⁰Ngai gaw nye a myit hte hpa amu mung n galaw lu nngai: ngai gaw na ai hte maren sha jeyang nngai; nye a jeyang ai hku mung dingman li ai: kaning rai nme law, ngai gaw nye myit hku hkan na n tam nngai, ngai e shangun dat ai wa a myit hku hkan na she tam nngai.

³¹Ngai dai nye a lam sakse hkam la nngai rai yang gaw, ngai hkam ai sakse teng na li ai n rai.

³²Nye a lam sakse hkam ai wa gaw, kaga mi she nga ai: dai wa nye a lam hkam ya ai sakse gaw, tengman ai sakse rai nga ai hpe, ngai chye nga nngai.

³³Nanhte gaw Yawhan hpang de kasa shangun dat myit dai rai nna, shi gaw tengman ai lam maga de sakse hkam ya nu ai.

³⁴Ngai lu ai sakse chyawm gaw masha kaw na n rai: rai timung, nanhte hkye hkrang la ai kaw du myit ga, ngu nna ndai lam ngai tsun nngai.

³⁵Yawhan gaw tu grung ai hte htoi nga ai pyengdin rai nga ai rai nna, nanhte gaw shi a ahtoi hta e, tawng marang mi kabu nga mayu myit dai.

³⁶Rai timung, ngai lu ai sakse gaw Yawhan hkam ya ai sakse hta grau kaba li ai: kaning rai nme nga yang, Wa gaw, ngai gun hpai shangut na matu ngai hpe ap ya nna, ya ngai gun hpai nga ai amu ni e pyi, ngai hpe Wa e shangun dat ai lam sakse hkam ya nga ai.

³⁷Ngai hpe shangun dat ai nye Wa mung nye a lam sakse hkam ya ni ai. Nanhte gaw shi a nsen galoi mung n na yu myit dai: shi a gawng shing-yan hpe mung n mu yu myit dai:

³⁸dai hta kaga shi a mungga mung nanhte hta n rawng lu ai: kaning rai nme law, shi shangun dat ai wa hpe, nanhte n kam n sham myit dai.

³⁹Chyum laika ni hta nna nanhte htani htana asak lu la na re ai, nga nna myit myit dai majaw, dai laika ni hta nanhte hkan sawk yu yu rai myit dai: dai laika ni nan nye a lam sakse hkam nga ai:

⁴⁰dai re ai mi, asak hkrung ai lu la na matu nanhte gaw ngai hpang de n sa mayu myit dai.

⁴¹Masha jaw ai arawng sadang gaw ngai n hkam la nngai:

⁴²rai timung, Karai Kasang a tsawra ai myit nanhte hta n rawng nga ai gaw, ngai chye nngai.

⁴³Ngai gaw nye Wa a amying hte du sa nngai rai timung, nanhte ngai hpe n hkap la myit dai; kaga wa mi tinang a amying hte du sa ai rai taw gaw, dai wa hpe nanhte hkap la na rai nga myit dai.

⁴⁴Shada da jaw ai arawng sadang hkam la nna, langai sha rai nga ai Karai Kasang e jaw ai arawng sadang hpe n tam ai ni, nanhte wa mi, kaning rai kamsham lu na myit ta?

⁴⁵Wa a man e ngai nanhte hpe mara shagun na hkum nawn myit; nanhte hpe mara shagun na wa gaw langai mi she nga ai; dai wa gaw, nanhte shamyet shanat nga ai Mawshe nan rai nga ai.

⁴⁶Mawshe hpe nanhte kam myit dai rai yang gaw, ngai hpe mung kam na manit dai: kaning rai nme law, Mawshe gaw nye a lam ka da nu ai.

⁴⁷Shi ka da ai laika ni hpe, nanhte n kam myit yang gaw, nye a ga hpe kaning rai kam lu na myit ta?” ngu nna shanhte hpe tsun mu ai.