Read Jinghpaw Hanson Version Bible YAWHAN 6 Bible Online

YAWHAN 6 - Jinghpaw Hanson Version Bible bible

YAWHAN 6

¹Dai hpang Yesu gaw, Tiberi ngu ai Galile nawng wora hkran de rap sa wa ai.

²Machyi makaw hkrum ai ni hta, shi galaw dan ai lamik kumla ni hpe mu ma ai majaw, masha wunawng kaba shi kaw hkan nang ma ai.

³Shaloi Yesu gaw dai bum de lung wa nna, shi a sape ni hte rau dung nga ai.

⁴Ya, Shalai wa ai poi ngu ai, Yuda masha ni a poi, du na ni wa sai.

⁵Dai re ai majaw Yesu mada yu nna, masha wunawng kaba shi kaw sa wa ai hpe mu wu yang, shi gaw Hpilip hpe, “Ndai ni sha na muk anhte kanang sa mari na i?” ngu nna san wu ai.

⁶Shing nga san ai gaw, Hpilip hpe chyam yu na nga nna rai nga ai: kaning rai nme law, kaning di na gaw, shi dai chye da nu ai.

⁷Hpilip gaw, “Gumhpraw ni tsa a matu mari timung, masha hkum shagu, kachyi mi hpra sha na pyi law na n rai,” ngu nna htan wu ai.

⁸Shaloi, shi a sape ni hta na Simun Petru a kanau Andre gaw,

⁹“Muk-yaw muk tawng manga hte, nga lahkawng lu ai lasha ma langai mi nang e nga nga ai; rai timung, nde wa law ai masha ni a matu gaw kanang dang law na rai ta?” ngu nna tsun dan wu ai.

¹⁰Yesu gaw, “Masha ni hpe dung nga shangun mu,” ngu mu ai. Dai yang e tsingdu mung htat nga ai. Shing rai lasha hkying manga daram dung nga ma ai.

¹¹Shaloi Yesu gaw dai muk tawng ni hpe la nna, shakawn ya nhtawm, dung nga ai ni hpe karan jaw wu ai; dai hte maren nga hpe mung shanhte ra ai made, karan jaw mu ai.

¹²Shanhte sha hkru ma jang, shi gaw, “Hpa mung n mat u ga, ngam ai ahkyep alep ni hpe hkan hta la mu,” ngu nna shi a sape ni hpe tsun mu ai.

¹³Dai hte maren shanhte hkan hta la nna, dai muk-yaw muk tawng manga hta na, sha ai ni a ngam ai ahkyep alep, mung shi lahkawng hpring tup lu la ma ai.

¹⁴Dai re ai majaw, shi madun ai lamik kumla hpe, shawa masha ni mu ma yang, shanhte gaw, “Gaja wa teng teng ndai wa gaw mungkan ga de du sa ra ai myihtoi rai nga ai,” nga ma ai.

¹⁵Dai masha ni gaw shi hpe adip la nna, hkawhkam shatai na maw ma ai hpe, Yesu chye wu ai majaw, shi hkrai sha dai bum de bai mayun lung mat wa ai.

¹⁶Shana de du jang shi a sape ni gaw nawng de yu wa nna,

¹⁷li jawn nhtawm, nawng wora hkran na Kaperna-um mare de rap sa wa ma ai. Ya nsin sin nna, Yesu mung shanhte kaw garai n du wa ai:

¹⁸nbung laru mung ru wa ai rai nna, nawng e hka leng ni hta nga ai.

¹⁹Dai re ai majaw mai masum mali daram shap sa wa sayang, Yesu gaw hka ntsa e hkawm let, li makau du hkra du sa wa ai hpe, shanhte hkap mu nna, hkrit kajawng nga ma ai.

²⁰Shi chyawm gaw, “Ngai she rai nngai, hkum hkrit myit,” ngu wu ai.

²¹Dai majaw shanhte gaw shi hpe li hta hkap shalun la mayu ma ai rai nna, dai li mung shanhte du na ra ai danam de, shaloi jang du wa ai.

²²Hpang shani e nawng wora hkran e tsap nga ma ta ai shawa masha ni gaw, li langai sha hta kaga shaje li n nga ai hpe mu ma ai hte, Yesu gaw dai li hta shi a sape ni hte rau n shang nang ai, sape ni hkrai shang ma ai hpe, dum ma ai:

²³(rai timung, dai Madu shakawn ai hpang, shanhte muk sha ai shara a makau de, Tiberi mare na li ni du ma ai):

²⁴dai re ai majaw dai kaw Yesu mung, shi a sape ni mung, n nga masai hpe, shawa masha ni chye mu yang, shanhte mung dai li ni hta jawn nna, Yesu hpe tam let Kaperna-um mare de hkan du nang ma ai.

²⁵Shing rai dai nawng wora hkran e shi hpe mu mu yang, shanhte gaw, “Rabai e, nang nang de galoi du nit ta?” ngu nna san mu ai.

²⁶Yesu gaw, “Ngai nanhte hpe gaja wa teng teng tsun made ga, Lamik kumla mu myit dai majaw, nanhte ngai hpe tam ai n rai myit dai; muk lusha nna hkru kat ai majaw sha, tam ai rai nga myit dai.

²⁷Hten bya chye ai lusha a matu hkum shaja myit; Masha Kasha nanhte hpe jaw lu ai htani htana asak a matu, agrin nga ai lusha lu la na she shaja mu: kaning rai nme law, dai wa gaw, Kawa Karai Kasang a dazik kap ai wa rai nga ai,” ngu nna htan mu ai.

²⁸Dai majaw shanhte gaw, “Anhte Karai Kasang a amu gun hpai na gaw, kaning di na rai ta?” ngu nna shi hpe san mu yang,

²⁹Yesu gaw, “Karai Kasang a amu ngu ai gaw, shi shangun dat ai wa hpe kamsham ai lam, ngu ai rai nga ai,” ngu nna shanhte hpe htan wu ai.

³⁰Dai re ai majaw shanhte gaw, “Anhte mu lu nna nang hpe kam na gaw, nang hpa lamik kumla madun nga n ta? nang hpa magam gun nga n ta?

³¹Shi gaw shanhte sha na matu, sumsing lamu de nna muk jaw mu ai, nga nna ka da nga ai hte maren, anhte a ji wa ni gaw nam mali hkan e manna muk lusha ma ai,” ngu nna shi hpe tsun mu ai.

³²Shaloi Yesu gaw, “Ngai nanhte hpe gaja wa teng teng tsun made ga, Nanhte hpe sumsing lamu de na muk jaw ai gaw Mawshe n rai; nye Wa she sumsing lamu de na dai tengman ai muk nanhte hpe jaw myit dai:

³³kaning rai nme law, Karai Kasang a muk ngu ai gaw, sumsing lamu na yu wa nna, mungkan ga hpe asak jaw ai hpe ngu ai, rai nga ai,” ngu nna shanhte hpe tsun mu ai.

³⁴Dai rai nna shanhte gaw, “Madu e, muk dai anhte hpe galoi mung a jaw nga mi,” ngu mu ai.

³⁵Yesu gaw, “Asak muk gaw ngai rai nga nngai, ngai hpang de sa ai wa gaw kawsi hkrum na n rai, ngai hpe kamsham ai wa mung, galoi mung hpang kara hkrum na n rai.

³⁶Rai timung, nanhte gaw ngai hpe mu da ninglen n kam myit dai, ngu nna ngai nanhte hpe tsun masade ai.

³⁷Wa e ngai hpe ap ya ai yawng mayawng hte gaw, ngai hpang de du na mara ai; ngai hpang de du sa ai wa hpe mung, gaja wa ngai n kanawng kau na nngai.

³⁸Kaning rai nme law, sumsing lamu nna ngai yu sa ai gaw, nye a myit hkan na ngu, yu sa nngai n rai, ngai hpe shangun dat ai wa a myit hkan na she, yu sa ai rai nngai.

³⁹Ngai hpe shangun dat ai wa a myit mung, ngai e ap ya ai yawng mayawng hte hta na, langai mi muk ngai n shayet ai sha, hpang jahtum na nhtoi hta sharawt la na, nga nna myit ai rai nga ai.

⁴⁰Hpa rai nga yang, Kasha wa hpe mu nna, kamsham ai wa kadai mung htani htana asak lu la na gaw, nye Wa a myit ra ai hku rai nga ai: ngai mung hpang jahtum na nhtoi hta, dai wa hpe sharawt na we ai,” ngu nna shanhte hpe tsun mu ai.

⁴¹Dai rai nna Yesu shi nan, “Sumsing lamu de na yu wa ai muk ngai rai nga nngai,” nga ai majaw, Yuda masha ni shi a lam aput angun let,

⁴²“Ndai wa gaw Yawsep a kasha Yesu n rai ni? shi a kanu kawa hpe anhte chye gaw ai n rai ni? Dai re ai mi, ‘Ngai gaw sumsing lamu de na yu wa nngai,’ nga nna kaning rai tsun lu a ta?” nga ma ai.

⁴³Shaloi Yesu gaw, “Nanhte shada da hkum tsun angun myit:

⁴⁴ngai hpe shangun dat ai nye Wa e lau la ai wa n rai yang gaw, kadai mung ngai hpang de du sa lu na n rai; du sa ai wa hpe mung, hpang jahtum na nhtoi hta ngai sharawt la na we ai.

⁴⁵‘Masha yawng mayawng gaw Karai Kasang a sharin achyin ai lu la ai ni rai na mara ai,’ nga nna myihtoi laika ni hta ka da ai hte maren, nye Wa kaw na madat la nna, sharin achyin la ai ni yawng hte gaw, ngai hpang de du sa ma ai.

⁴⁶Shinggyim masha langai mi e me Wa hpe mu yu ai n rai; Karai Kasang kaw nna du sa ai wa chyu sha, Wa hpe mu yu nu ai.

⁴⁷Nanhte hpe ngai gaja wa teng teng tsun made ga, Kamsham ai wa gaw htani htana asak lu la lu ai.

⁴⁸Ngai gaw asak muk rai nga nngai.

⁴⁹Nanhte a nji nwoi ni gaw nam mali hkan e manna muk sha nna, si wa masai.

⁵⁰Ya na muk gaw, masha wa sha nna n si u ga nga, sumsing lamu de na yu wa ai muk rai nga ai.

⁵¹Ngai gaw sumsing lamu de na du yu wa ai, hkrung ai muk rai nga nngai: muk ndai sha ai wa kadai mung, htani htana ahkrung nga na ra ai: mungkan ga a asak hkrung nga na matu, ngai jaw ai muk chyawm gaw, nye a shan rai nga li ai,” ngu nna shanhte hpe htan mu ai.

⁵²Dai re ai majaw Yuda masha ni, “Ndai wa gaw, kaning di nna anhte hpe shi a ashan jaw sha lu na a ta?” nga nna shada da tsun hkat ma ai.

⁵³Dai rai nna Yesu gaw, “Ngai nanhte hpe gaja wa teng teng tsun made ga, Masha Kasha a ashan nanhte n sha, shi a asai hpe mung n lu myit yang gaw, nanhte hta asak n rawng lu ai.

⁵⁴Nye a ashan sha nna, nye a asai lu ai wa gaw, htani htana asak lu la nu ai: dai wa hpe mung, hpang jahtum na nhtoi hta ngai sharawt la na we ai:

⁵⁵kaning rai nme law, nye a ashan gaw tengman ai shahpa rai li ai; nye a asai mung, tengman ai luhpa rai li ai.

⁵⁶Nye a ashan sha nna, nye a asai lu ai wa gaw, ngai hta rawng nga ai; dai wa hta mung ngai rawng nga nngai.

⁵⁷A hkrung nga ai nye Wa gaw, ngai hpe shangun dat ai rai nna, ngai gaw Wa a majaw hkrung nga nngai hte maren, ngai hpe sha ai wa mung, nye a majaw hkrung nga na ra ai.

⁵⁸Da ndai gaw sumsing lamu de nna du yu wa ai muk rai nga ai: nji nwa ni sha nna si wa ai muk zawn n rai: ndai muk sha ai wa gaw, htani htana ahkrung nga na ra ai,” ngu nna shanhte hpe tsun mu ai.

⁵⁹Ndai gaw, Kaperna-um mare na tara jawng hta, shi sharin shaga nga yang, tsun ai ga rai lu ai.

⁶⁰Dai re ai majaw shi a sape ni law law wa dai ga na jang, “Ga ndai gaw yak la ai ga rai nga ai, kadai wa madat lu na i?” nga ma ai.

⁶¹Shing nga nna shi a sape ni tsun ngun nga ma ai hpe, Yesu shi a myit hta chye wu ai majaw, shi shanhte hpe, “Ga ndai gaw nanhte hpe myit hten shangun wa sa ni?

⁶²Dai Masha Kasha, myi nga ai shara de bai lung wa ai hpe nanhte mu myit yang gaw, kaning nga na myit ta?

⁶³Asak jahkrung ai gaw Wenyi rai nga ai; hkum shan gaw hpa lam mung n la ai: ngai nanhte hpe tsun ai mungga gaw, Wenyi rai nga ai, asak mung rai nga ai.

⁶⁴Rai timung nanhte hta na nkau mi gaw n kam n sham myit dai,” ngu mu ai. Kaning rai nme law, Yesu gaw, n kam n sham ai ni kadai rai ma ai mung, shi hpe ap kau na wa kadai re ai mung, shawng nna chye da nga ai.

⁶⁵Dai rai nna shi gaw, “Dai lam majaw she, nye Wa a ahkang hte n rai yang gaw, kadai mung ngai hpang de n du n sa lu ai, ngu nna ngai nanhte hpe tsun masade ai,” ngu mu ai.

⁶⁶Dai nga ai majaw shi a sape ni law law wa nhtang mat wa nna, shi kaw bai n hkan nang masai.

⁶⁷Dai rai nna Yesu gaw sape shi lahkawng hte hpe, “Nanhte mung wa mat mayu myit ni?” ngu nna san mu ai.

⁶⁸Shaloi Simun Petru gaw, “Anhte kadai hpang de wa na rai nga a ta? nang gaw htani htana asak hte seng ai mungga lu ndai:

⁶⁹nang gaw Karai Kasang a Chyoi pra ai wa rai nga ndai hpe, anhte kamsham saga ai rai nna, chye nga ga ai,” ngu nna shi hpe htan wu ai.

⁷⁰Bai Yesu gaw, “Nanhte shi lahkawng hpe ngai lata la masade ai, n rai ni? rai timung, nanhte hta na langai mi gaw nat matse rai nga ai,” ngu nna shanhte hpe htan mu ai.

⁷¹Shing nga ai gaw, Simun Iskarut a kasha Yuda hpe sha-ang nna tsun ai rai nga ai: kaning rai nme law, dai wa gaw shi hpe ap kau na wa rai nga ai hte, sape shi lahkawng hta mung lawm nga ai.