Read Jinghpaw Hanson Version Bible YAWHAN 7 Bible Online

YAWHAN 7 - Jinghpaw Hanson Version Bible bible

YAWHAN 7

¹Dai hpang Yesu gaw Galile mung hkan e jawt hkawm nga ai: Yuda masha ni shi hpe sat kau na tam ma ai majaw, Yuda mung e n hkawm mayu wu ai.

²Dai shaloi e Yuda masha ni a Sum poi, ngu ai poi, du ra ai rai nna, shi a kanau ni gaw,

³“Nang galaw ai amu a lam ni hpe na a sape ni mung mu lu mu ga, ndai mung na pru nna, Yuda mung de sa wa su:

⁴kajai gumhkawng na hpe ra ai wa gaw, makoi magap rai nna hpa mung n galaw ga ai. Nang ndai amu lam galaw ndai rai yang gaw, mungkan ga e na a hkum shadan dan u,” ngu nna shi hpe tsun mu ai.

⁵Kaning rai nme law, shi a kanau ni pyi shi hpe n kam n sham ma ai.

⁶Dai re ai majaw Yesu gaw shanhte hpe, “Nye a ahkying garai n du li ai; nanhte a ahkying chyawm gaw, tutnawng a rai nga ai.

⁷Mungkan ga gaw nanhte hpe n dawng n wawm rai lu ai n rai; ngai hpe n dawng n wawm nga ai: kaning rai nme law, de a arawn alai n shawp ai hpe, ngai sakse hkam nngai majaw rai nga ai.

⁸Dai poi de nanhte lung wa mu: ngai chyawm gaw ndai poi hta garai n lung na nngai: kaning rai nme law, nye a ahkying garai n du li ai,”

⁹nga nna shanhte hpe tsun dat nhtawm, shi gaw Galile mung e naw hti nga ai.

¹⁰Rai timung, kanau ni dai poi de lung mat wa ai hpang, shi mung, dan dan n re ai sha, mayun nna sa ai zawn, lung wa wu ai.

¹¹Dai majaw Yuda masha ni gaw dai poi hta shi hpe tam nna, “Dai wa kanang rai nga a ta?” nga ma ai.

¹²Shawa masha ni hta mung shi a lam wu wu di di law nga ai hte, nkau mi gaw, “Shi gaw masha kaja rai nga ai,” nga ma ai; bai nkau mi gaw, “N rai, mung masha ni hpe woi shadam ai wa rai nga ai,” nga shajang ma ai.

¹³Rai timung, Yuda masha ni hpe hkrit ai majaw, kadai mung shi a lam leng leng n tsun ma ai.

¹⁴Ya dai poi nhtoi a ka-ang hkup rai wa jang, Yesu gaw nawku Htingnu de lung nna sharin shaga nga ai.

¹⁵Dai re ai majaw Yuda masha ni gaw mau ai hte, “Ndai wa gaw n sharin yu ai mi, laika kaning rai chye lu ai da i?” nga ma ai.

¹⁶Dai majaw Yesu gaw, “Ngai sharin shaga ai ga gaw nye a ga n rai, ngai hpe shangun dat ai wa a ga rai nga ai:

¹⁷Dai wa a myit hkan mayu ai wa rai yang gaw, sharin shaga ai ga ndai, Karai Kasang kaw na re ai, shing n rai, nye a myit hte tsun nga ai ga re ai, chye ginhka lu na wu ai.

¹⁸Tinang a myit hte tsun ai wa gaw, tinang a arawng sadang tam ai rai nga ai: tinang hpe shangun dat ai wa a arawng sadang tam ai wa chyawm gaw, tengman nga ai rai nna, shi hta n ding n man ai n rawng lu ai.

¹⁹Mawshe gaw nanhte hpe jep ai tara jaw da sai, n rai ni? rai timung, nanhte hta na kadai mung, dai tara n hkan myit dai. Ngai hpe sat kau na hpa rai tam myit ta?” ngu nna shanhte hpe htan mu ai.

²⁰Shaloi hpawng nga ai masha ni gaw, “Nang hta nat rawng nga ai: nang hpe sat kau na kadai tam a ta?” ngu nna htan mu ai.

²¹Yesu gaw, “Ngai amu langai mi galaw se ai rai nna, nanhte yawng mau manit dai.

²²Matu gadoi ai lam gaw Mawshe kaw nna n rai, ji wa ni kaw nna she, Mawshe nanhte hpe dai tara jaw da myit dai rai nna, laban nhtoi hta pyi nanhte masha hpe matu gadoi ai lam jaw myit dai:

²³shing rai Mawshe a tara n hten lu hkra, masha wa laban nhtoi e matu gadoi hkam la lu ai re ai mi, laban nhtoi hta masha hkum ting hpe shamai ya ai majaw, nanhte ngai hpe pawt bu nga myit ni?

²⁴Myi man tau nna hkum jeyang myit, dingman ai hku she jeyang mu,” ngu nna shanhte hpe htan mu ai.

²⁵Dai re ai majaw Yerusalem mare na masha nkau mi gaw, “Sat kau na tam ai gaw, ndai wa hpe n rai ni?

²⁶Yu mu, shi dan dan leng leng hkaw tsun nga nna, shi hpe mung hpa n ngu mu hka: ndai wa nan Hkristu rai nga ai gaw, du ni gaja wa chye manu ai kun?

²⁷Rai timung, ndai wa kanang na re ai gaw, anhte chye ga ai; Hkristu du sa yang chyawm gaw, kanang na dan pru na gaw, kadai chye ai n rai,” nga ma ai.

²⁸Dai re ai majaw Yesu gaw nawku Htingnu e sharin shaga nga yang, “Nanhte ngai hpe chye nga myit dai; ngai kanang na re ai mung chye myit dai: ngai gaw nye a myit hte du sa nngai n rai; rai timung ngai hpe shangun dat ai, nanhte n chye ai wa gaw, tengman nga ai.

²⁹Dai wa gaw ngai hpe shangun dat nngai rai nna, shi kaw na ngai du sa nngai majaw, ngai shi hpe chye we ai,” ngu nna jahtau wu ai.

³⁰Dai rai nna shanhte gaw shi hpe rim la na maw ma ai; rai timung, shi a ahkying garai n du lu ai majaw, gade e muk shi hpe n rim lu mu ai.

³¹Hpawng nga ai masha ni hta chyawm gaw, shi hpe kamsham ai ni law law wa rai nga ma ai rai nna, Hkristu du sa yang ri, ndai wa galaw ai hta, grau ai lamik kumla dan lu na a ni? nga nna tsun shajang ma ai.

³²Hpawng nga ai masha ni gaw, shi a majaw shing nga tsun wu ma ai hpe, Hparishe ni na ma yang, hkinjawng agyi ni hte Hparishe ni gaw, shi hpe rim la na matu, hpyen du ni hpe shangun dat ma ai.

³³Dai re ai majaw Yesu gaw, “Ngai nanhte hte rau tawng marang mi sha naw nga nna, ngai hpe shangun dat ai wa hpang de wa mat na nngai:

³⁴shaloi nanhte ngai hpe tam timung, mu na myit dai n rai: ngai nga ai shara de mung nanhte n du lu na myit dai,” ngu mu ai.

³⁵Dai majaw Yuda masha ni gaw, “Anhte n mu tam lu hkra, ndai wa gaw gade sa wa na ra ai i? Heleni masha ni hta bra nga ai ni hpang de sa nna, Heleni masha ni hpe sharin shaga na wu ai kun?

³⁶Nanhte ngai hpe tam timung n mu na myit dai; ngai nga ai shara de mung nanhte n du lu na myit dai, nga ai ga gaw hpa nga ai ga rai lu ai i?” nga nna shada da tsun ma ai.

³⁷Shaloi dai poi a jahtum nhtoi ngu ai nhtoi kaba hta Yesu gaw tsap da nna, “Hpang kara ai wa nga yang gaw, ngai hpang de sa lu rit.

³⁸Ngai hpe kamsham ai wa gaw, Chyum laika hta tsun ai hte maren, dai wa a kraw lawang hta na asak hkrung ai ntsin a hka nu lwi pru nga na ra ai,” ngu nna jahtau tsun wu ai.

³⁹Shing nga ai gaw, shi hpe kamsham ai ni lu la na Wenyi hpe, sha-ang nna tsun ai rai nga ai: kaning rai nme law, Yesu gaw shi a hpung shingkang garai n dan hkung ai majaw, Wenyi garai n jaw wu ai.

⁴⁰Shing nga ai ga na ma yang, hpawng nga ai ni hta na nkau mi gaw, “Ndai wa gaw gaja wa dai myihtoi rai nga ai:”

⁴¹nkau mi mung, “Ndai wa gaw Hkristu nan rai nga ai,” nga ma ai. Rai timung, nkau mi gaw, “Ataw! Hkristu wa mi Galile mung na pru na a ni?

⁴²Hkristu gaw Dawi a lakung hta na prat wa nna, Dawi a shara ngu ai Betlehem kahtawng na she, paw pru na re ai, nga nna Chyum laika hta rawng ai, n rai ni?” nga hkat ma ai.

⁴³Dai rai nna hpawng nga ai masha ni hta, shi a majaw bra wa shara rawng wa malu ai.

⁴⁴Shanhte hta na nkau mi gaw shi hpe rim la mayu ma timung, kadai wa mung shi hpe n rim lu mu ai.

⁴⁵Dai re ai majaw hpyen du ni, hkinjawng agyi ni hte Hparishe ni hpang de bai du wa ma yang, dai ni gaw, “Dai wa hpe hpa rai n woi wa myit ta?” ngu nna hkap san mu yang, hpyen du ni gaw,

⁴⁶“Wora wa zawn nga nna sharin shaga ai kadai mung n nga yu ai,” ngu nna htan mu ai.

⁴⁷Shaloi Hparishe ni gaw, “Nanhte hpe wa mung lau kau lu manit ni?

⁴⁸Du agyi ni hta na mung, Hparishe ni hta na mung, dai wa hpe kamsham ai kadai nga a ta?

⁴⁹Tara n chye ai, ndai shawa hpawng chyawm gaw, dagam dala hkrum sha ai ni rai nga ma ai,” ngu nna shanhte hpe htan mu ai.

⁵⁰Shanhte hta lawm ai, shawng de Yesu kaw sa ai wa Nikodi chyawm gaw,

⁵¹“Anhte a tara gaw masha hpe, shi hkum nan e n san yu ai mi, shi galaw ai lam garai n chye yang, dawdan ga a ni?” ngu nna shanhte hpe san mu ai.

⁵²Shanhte gaw, “Nang mung Galile masha rai nga nni? Galile mung de na kadai myihtoi mung n paw pru yu ai, nang she gawn yu u,” ngu nna shi hpe htan mu ai.

⁵³[Shaloi shanhte langai hte langai tinang a nta de wa mat ma ai: