Read Jinghpaw Hanson Version Bible YAWHAN 9 Bible Online

YAWHAN 9 - Jinghpaw Hanson Version Bible bible

YAWHAN 9

¹Ya shi lai sa wa nga yang, hkritung kaw nna myi kyaw ai wa langai mi hpe mu wu ai.

²Shaloi shi a sape ni gaw, “Rabai e, ndai wa myi n mu ai shangai wa ai gaw, yubak galaw ai kadai wa rai ta? ndai wa rai ni? kanu yan kawa rai ni?” ngu nna san mu ai.

³Yesu gaw, “Ndai wa yubak galaw ai n rai, kanu yan kawa mung n rai; shi hta Karai Kasang a magam amu dan hkung na matu, rai nga ai.

⁴Ngai hpe shangun dat ai wa a magam amu hpe, shani nhtoi naw rai nga yang, anhte gun hpai lu na rai nga ai: kadai muk amu n gun n hpai lu ai shana ahkying du na ra ai.

⁵Ngai gaw mungkan ga e naw nga ai hte yang, mungkan ga a nhtoi ngai rai nga nngai,” ngu nna htan mu ai.

⁶Shing nga tsun ngut jang, shi gaw ga hta mayen prat bang nna, hkumpup galaw la nhtawm, dai wa a myi hta chya ya nna,

⁷“Silum hka lawng de sa kashin su,” ngu nna shi hpe tsun dat wu ai: dai hte maren shi sa kashin nna, myi mu ai hte bai wa ai: (Silum ngu ai gaw, shangun dat ngu ai, rai nga ai.)

⁸Dai rai nna htingbu ni hte, shawng de shi hpyi sha ai wa re ai mu ga ai ni gaw, “Ndai wa gaw, dung nga nna hpyi sha ai wa n rai ni?” nga ma ai.

⁹Nkau mi gaw, “Dai wa nan re ai,” nga ma ai. Bai nkau mi gaw, Dai wa n rai, dai wa hte gaw bung ai, nga ma ai. Dai wa chyawm gaw, Ngai nan dai wa rai nngai,” ngu nna tsun wu ai.

¹⁰Shaloi dai ni gaw, “Rai taw, na a myi kaning rai mu lu lit ta?” ngu nna shi hpe san mu ai.

¹¹Shi gaw, “Yesu ngu ai wa hkumpup galaw la nna, nye a myi hta chya ya nhtawm, Silum hka lawng de sa kashin u, nga ai hte maren ngai sa kashin we yang, myi mu lu li ai,” ngu nna htan mu ai.

¹²Shaloi shanhte gaw, “Dai wa kanang nga nga a ta? ngu nna bai san mu yang, Shi gaw, “Ngai n chye nngai,” ngu nna bai htan wu ai.

¹³Shanhte gaw, shawng de myi n mu ai wa hpe Hparishe ni hpang de woi sa mu ai:

¹⁴Yesu hkumpup galaw la nna, dai wa a myi hpaw ya ai shani gaw, laban nhtoi rai nga ai.

¹⁵Bai Hparishe ni mung, dai wa hpe, shi a myi kaning rai mu lu ai lam san mu yang, dai wa gaw, “Nye a myi hta shi hkumpup bang ya nna, ngai kashin kau dat we yang mu wa li ai,” ngu nna shanhte hpe htan mu ai.

¹⁶Shaloi Hparishe ni nkau mi gaw, “Dai wa gaw laban nhtoi n gawn ai majaw, Karai Kasang kaw na du sa ai wa n rai,” nga ma ai: bai nkau mi gaw, “Yubak lu ai masha gaw, ning re ai lamik kumla kaning rai galaw lu na a ta?” nga ma ai. Shing nga nna shada da bra mat ma ai.

¹⁷Dai rai nna shanhte gaw myi n mu ai wa hpe, “Na a myi hpaw ya ai majaw, shi a lam nang kaning ngu da wu ta?” ngu nna bai san mu yang, shi gaw, “Dai wa gaw myihtoi rai nga ai,” ngu nna bai htan mu ai.

¹⁸Yuda masha ni gaw myi mu ai wa a kanu yan kawa hpe shaga nna, “Ndai wa gaw hkritung kaw nna myi kyaw ai, nga ai, nan a kasha rai malit ni? dai rai yang, ya kaning rai mu lu lu ta?

¹⁹nga nna shan hpe garai n san yang, dai wa shawng de myi n mu ai, ya she mu ai hpe, n kam ma ai.”

²⁰Dai wa a kanu yan kawa mung, “Ndai gaw an a kasha rai nga ai, hkritung kaw nna myi n mu ai mung rai nga ai, an chye nga ga ai:

²¹rai timung, ya kaning rai mu lu ai, an n chye gaw ai, gade e shi a myi hpaw ya ai mung, n chye ga ai: shi hpe san yu mu: shi asak mung kaba sai, shi a lam gaw shi tsun na ra ai,” ngu nna htan mu ai.

²²Shi a kanu yan kawa gaw Yuda masha ni hpe hkrit ma ai majaw, shing ngu tsun mu ai: kaning rai nme nga yang, Yesu gaw Hkristu re ai, nga nna yin la ai wa kadai hpe rai timung, tara jawng na shapraw kau na, nga nna Yuda masha ni ya nna pyi bawng hkut da masai.

²³Dai majaw dai wa a kanu yan kawa gaw, ‘Shi asak kaba sai, shi hpe san yu mu,” ngu mu ai.

²⁴Dai re ai majaw shanhte gaw dai myi n mu ai wa hpe lang mi bai shaga nna, “Karai Kasang hpe shagrau u; dai wa gaw yubak kap ai wa rai nga ai anhte chye ga ai,” ngu nna shi hpe tsun mu ai.

²⁵Shaloi dai wa gaw, “Shi yubak kap ai wa re ai n re ai, ngai n chye nngai: ngai shawng de myi n mu ai, ya chyawm gaw mu lu ni ai, dai lam langai sha ngai chye nngai,” ngu nna shanhte hpe htan mu ai.

²⁶Bai shanhte gaw, “Shi nang hpe kaning di a ta? na myi kaning di jahpaw ya a ta?” ngu nna san mu ai.

²⁷Dai wa gaw, “Ya sha mung ngai nanhte hpe tsun ni ai, nanhte she n na myit dai; hpa rai bai na mayu myit ta? nanhte mung shi a sape tai mayu myit ni?” ngu nna shanhte hpe bai htan wu ai.

²⁸Shaloi shanhte gaw shi hpe jahpoi asawng let, “Nang chyawm shi a sape rai nga ndai, anhte gaw Mawshe a sape ni rai nga ga ai:

²⁹Karai Kasang gaw Mawshe hpe mungga jaw ai anhte chye ga ai; dai wa kanang na re ai gaw, anhte n chye ga ai,” ngu mu ai.

³⁰Shaloi dai wa gaw, “Nye a myi shi hpaw ya lu nga timung, shi kanang na re ai hpe nanhte n chye ai gaw, mauhpa lam rai nga ai.

³¹Yubak kap ai ni a ga Karai Kasang n madat nga ai gaw, anhte chye ga ai: Karai Kasang hpe nawku hkungga nna, shi a myit hkan ai wa rai yang gaw, dai wa a ga madat ya nga ai.

³²Hkritung kaw nna myi kyaw ai wa a myi hpe, gade e hpaw ya lu ai nga ai mung, lamu ga lat kaw nna galoi mung n na yu ai.

³³Dai wa Karai Kasang kaw na n rai yang gaw, hpa mung galaw lu na n rai,” ngu nna shanhte hpe htan mu ai.

³⁴Shaloi shanhte gaw, “Nang wa mi hkum ting yubak hta na shangai wa da nhtawm me, anhte hpe sharin nga nni?” ngu nna jawm htan nhtawm, dai wa hpe kanawng shapraw kau mu ai.

³⁵Dai wa hpe shapraw kau ai lam Yesu na wu ai rai nna, shi hpe mu tam jang, “Masha Kasha hpe nang kamsham nga nni?” ngu nna san wu ai.

³⁶Dai wa gaw, “Madu e ngai kamsham lu na, Masha Kasha gaw kadai wa rai ta?” ngu nna htan wu yang,

³⁷Yesu gaw, “Dai wa hpe nang mu yu nit dai hta n ga, ya nang hte shaga ai wa gaw, dai wa nan rai nga ai,” ngu nna shi hpe tsun wu ai.

³⁸Shaloi dai wa gaw, “Madu e, ngai kamsham nga nngai,” nga nna shi hpe nawku wu ai.

³⁹Bai Yesu gaw, “Myi n mu ai ni myi mu lu na matu mung, mu nga ai ni n mu lu na matu mung, mungkan ga a tara dara ai lam tai na ngai sa du nngai,” ngu wu ai.

⁴⁰Shi kaw nga ai Hparishe ni dai ga na ma yang, “Rai taw, anhte mung myi n mu ga ni?” ngu nna shi hpe san mu ai.

⁴¹Yesu gaw, “Nanhte myi n mu myit taw gaw, yubak n nga na myit dai: ya gaw, Anhte myi mu ga ai, nga nga myit dai: de a majaw nanhte hta yubak mara nga ai.