Read Jinghpaw Hanson Version Bible KASA 1 Bible Online

KASA 1 - Jinghpaw Hanson Version Bible bible

KASA 1

¹Yesu gaw, shi a lata la ai kasa ni hpe, Chyoi pra ai Wenyi hte ga matsun hkang da ngut nna, ntsa de shalun la hkrum ai nhtoi du hkra,

²galaw dan ai hte, sharin shaga wa ai yawng mayawng a lam, shawng na laika hta ngai hpajang da se ai, Htawhpilu e:

³shi gaw nni nkri hkrum ai hpang, shi hkum chyahkrung hpe, kam ging ai sakse law law hte shanhte hpe madun dan nna, Karai Kasang a mungdan lam hkai dan let, nhtoi mali shi ya laman e, shanhte kaw shi hkum sa pru dan dan di mu ai.

⁴Shing rai rau hpawng nga yang, shi shanhte hpe, “Yerusalem kaw na n pru ai sha, nanhte ngai kaw na na la ai, Wa a ga ndat hpe a la nga mu,” nga nna hkang da nga ai:

⁵ga ndat dai gaw, Yawhan gaw hka hte baptisma jaw ai; nanhte chyawm gaw nhtoi gade n na yang, Chyoi pra ai Wenyi hta baptisma hkam la lu na marin dai, nga ai, rai nga ai.

⁶Dai rai nna, naw hpawng nga ma yang shanhte gaw, “Madu e, dai Mungdan Israela masha ni hpe, ndai aten e bai de ya na rai sa ni?” ngu nna shi hpe san mu ai.

⁷Shi gaw, “Wa gaw shi a hpung shingkang hte, hkang tawn ai aten hte ahkying ladaw hpe, nanhte chye shara n nga ai:

⁸rai timung, Chyoi pra ai Wenyi nanhte a ntsa e du jang, nanhte n-gun atsam lu la na marin dai rai nna, nanhte gaw Yerusalem mare hte Yuda mung ting, Samari mung hte lamu ga htum hkra, nye a sakse ni tai na marin dai,” ngu nna shanhte hpe tsun mu ai.

⁹Ndai tsun nga yang, shanhte yu nga ninglen shi hpe ntsa de shalun la ai rai nna, sumwi gaw shanhte a man na shi hpe magap la mat wa ai.

¹⁰Shi lung mat wa nna, shanhte lamu de naw azi yu nga yang, yu mu, hpraw tu ai hpun palawng bu hpun ai marai lahkawng, shanhte a makau e tsap pru nna,

¹¹“Galile masha ni e, hpa rai lamu de naw dawng yu nga myit ta? Nanhte a man na sumsing lamu de shalun la ai wa, dai Yesu gaw, nanhte mu nga yang sumsing lamu de wa ai zawn, dai hku bai du na ra ai,” ngu nna tsun mu ai.

¹²Shaloi shanhte gaw, Yerusalem mare hte laban nhtoi sa ram sha gang ai Tsanlun bum kaw nna, Yerusalem de bai wa ma ai.

¹³Du wa ma yang shanhte nga nga re ai ntsa gawk de lung wa ma ai: dai ni gaw, Petru, Yawhan, Yaku, Andre, Hpilip hte Htawma, Barhtolume hte Mahte, Alhpe a kasha Yaku, Zelutu ngu ai Simun, Yaku a kasha Yuda hte rai ma ai.

¹⁴Shanhte nlang hte gaw, numsha ni hte Yesu a kanu Mari hte mung, shi a kanau ni hte mung, myit langai sha hte akyu hpyi shaja let nga nga ma ai.

¹⁵Dai nhtoi hte yang, masha latsa e hkun daram rai hpawng nga ai kahpu kanau ni a ka-ang e Petru rawt tsap nna,

¹⁶“Hpunau ni e, Yesu hpe rim la ai ni e woi shawng ai wa Yuda hpe lakap nna, moi Dawi a n-gup hta Chyoi pra ai Wenyi tsun da ai laika gaw dik wa lu na rai sai.

¹⁷Kaning rai nme law, dai wa gaw anhte hta hti lawm nna, ndai sara aya hta shi hte seng ai kumhtaw lu la nu ai.

¹⁸(Dai wa gaw n ding n man ai hku na shabrai hte ga dachyawk langai mi lu la nna, nhtang chyaw di hkrat si ai hte kan ga nna, shi a pu nlang ayai mat salu ai.

¹⁹Dai lam hpe Yerusalem na ni nlang chye wa masai; dai rai nna, ga dachyawk dai hpe shanhte a ga hku, Akela dama ngu nna shamying mu ai; dai gaw, Sai ga, ngu ai, rai nga ai.)

²⁰Dai lam gaw Shakawn Kungdawn laika hta, ‘Shi a htingra katsi katsang rai mat u ga, Dai hta kadai mung n nga mu ga,’ ngu nna mung; bai, ‘Shi a aya hpe masha kaga lu la u ga,' nga nna mung, rawng nga ai.

²¹Dai re ai majaw, Yawhan baptisma nnan jaw ai kaw nna, anhte kaw na shalun la ai du hkra, Madu Yesu anhte hte,

²²rau hkawm rau sa ai nhtoi hte ting, anhte hte kanawn nga ai wa langai mi gaw, anhte hte rau, shi a bai rawt wa ai lam, sakse wa tai na ra ai,” ngu wu ai.

²³Shaloi shanhte gaw Yustu mying hkawt mying ai, Barsaba ngu ai Yawsep yan Mahtia hpe san da mu ai.

²⁴Shing rai shanhte akyu hpyi ma ai gaw, “Yawng mayawng a myit masin chye chyang ai Madu e, Yuda gaw shi hte seng ai shara de wa mat na nga,

²⁵kau da ai shi a sara aya hte kasa ahkang hpe, kadai lu la na gaw, ndai yan hta gara mahtang hpe nang lata la ai madun ya mi,” nga nna hpyi ma ai.

²⁶Shaloi shanhte hpaida hte lata nna, dai hpaida gaw Mahtia hta ang wa ai: dai kaw nna shi gaw dai kasa shi langai hta shang lawm wa ai.