Read Jinghpaw Hanson Version Bible KASA 10 Bible Online

KASA 10 - Jinghpaw Hanson Version Bible bible

KASA 10

¹Ya Kesare mare e, Itali ngu ai hpyen dap hta, Korneli mying ai hpyen latsa up ai bu langai mi nga ai:

²dai wa gaw tara hkungga myit rawng nna, shi a nta na ni nlang hte rau Karai Kasang hpe hkrit hkungga ai hte, masha ni hpe alu law law jaw let, Karai kasang hpe tut tut a hpyi nga ai.

³Lani wa mi ahkying jahku daram e, Karai Kasang a lamu kasa shi kaw du nna, “Korneli e,” nga nna shi hpe shaga ai gaw, shingran hta leng leng mu wu ai.

⁴Shi gaw dai wa hpe azi yu nna, “Madu e, hpa lam rai ta?” ngu nna hkrit let shi hpe san wu ai. Dai wa chyawm gaw, “Na a akyu hpyi ai hte alu jaw ai lam, Karai Kasang a man e, masat dingsat matu hkrang salit dai.

⁵Ya Yopa mare de shangun nna, Petru ngu ai Simun hpe shaga la su;

⁶shi gaw shanhpyi sama Simun a nta e shingbyi nga ai; shi a nta gaw nammukdara makau e rai nga ai,” ngu wu ai.

⁷Shi hte ga tsun ai lamu kasa wa mat jang, shangun ma lahkawng hte, shi kaw tut hkan nga ai ni hta na, tara hkungga ai hpyen ma langai mi hpe shaga nna,

⁸shanhte hpe yawng mayawng hkai dan nhtawm, Yopa mare de shangun dat mu ai.

⁹Shanhte mung hpang shani e sa wa nna, Yopa makau du magang jang, Petru gaw ahkying kru daram e akyu hpyi na nga, nta ntsa de lung wa ai.

¹⁰Shaloi shi kawsi nna shat sha mayu nga ai: rai timung, lusha naw shachyip nga yang, shi myit nawng mat wa nna,

¹¹sumsing lamu hpaw wa ai hte, hpajawng kaba zawn, jut mali de jum nna, ga de shayu dat ai arai hpe mu wu ai:

¹²dai hta e, ga ntsa na lagaw mali tu ai baw dusat hte gumrawt hkawm ai baw amyu myu, ntsa malen na u amyu myu, rawng nga ai.

¹³Nsen mung ngoi pru ai gaw, “Petru e, rawt u, sat sha u,” nga ai.

¹⁴Petru chyawm gaw, “N rai law, Madu e; n sha mai ai hte n san n seng ai rai hpe, ngai galoi mung n sha yu nngai,” ngu nna htan wu ai.

¹⁵Bai lang mi na nsen gaw, “Karai Kasang jasan jaseng ai rai hpe, n sha mai ai hkum nga et,” nga nna shi kaw bai ngoi pru ai.

¹⁶Masum lang shing nga nhtawm, dai rai hpe sumsing lamu de, shaloi jang dawm la wu ai.

¹⁷Ya Petru gaw, shi mu ai shingran hpa rai na ra ai i? nga nna myit sumru yu nga yang, yu mu, Korneli shangun dat ai ni gaw, Simun a nta tam san let, chyinghka makau e tsap nna,

¹⁸Petru ngu ai Simun, nta dai hta nga ai n nga ai, jahtau san yu ma ai.

¹⁹Petru mung, shingran de a lam myit naw sumru nga yang, Wenyi gaw, “Yu u, masha lahkawng nang hpe tam nga ma ai: rawt u, yu wa sit;

²⁰shan hpe ngai shangun dat mawe ai majaw, myit hpa n ganung ai sha, shan hte rau sa wa su,” ngu dat wu ai.

²¹Shaloi Petru dai ni hpang de yu wa nna, “Yu mu, nanhte tam ai wa ngai rai nga nngai: hpa lam rawng nna sa myit ta?” ngu nna san mu ai.

²²Shanhte gaw, “Dingman nna, Karai Kasang hpe hkrit hkungga ai hte, Yuda amyu ting a man e myi man pa ai, hpyen latsa up ai bu Korneli gaw, nang hpe shi a nta de shaga bang nna, nang tsun ai ga madat la na lam, chyoi pra ai lamu kasa nan shadum dan ai lu la nu ai,” ngu nna tsun dan mu ai.

²³Dai rai nna, shi shanhte hpe shaga jashawn nhtawm, manam daw mu ai. Ya hpang shani e shi rawt nna, shanhte hte rau sa wa ai; Yopa mare na kahpu kanau ni nkau mi mung hkan nang ma ai.

²⁴De a hpang shani Kesare mare de shang wa ai; Korneli chyawm gaw, shi a hpunau ni hte makyin jinghku ni hpe jahpawng tawn nna, shanhte hpe la nga ma ai.

²⁵Ya, Petru shang wa jang, Korneli gaw hkap tau let, shi a lagaw nhpang e dingnyawm nawku wu ai.

²⁶Petru chyawm gaw, “Rawt u, ngai mung masha she rai nngai,” nga nna tsun let shi hpe dun sharawt wu ai.

²⁷Shing rai shi hte shaga let shang wa yu yang, law law hpawng nga ma ai hpe, mu wu ai. Shaloi Petru gaw shanhte hpe, “Yuda masha ngu ai wa gaw maigan amyu masha hte kanawn mazum, htinglup htingshang n rai mai ai, nanhte nan chye nga myit dai:

²⁸dai rai tim kadai wa hpe mung n ging n dan ai, n san n seng ai, n nga mai ai lam gaw, Karai Kasang ngai hpe madun ni ai.

²⁹Dai rai nga ai majaw, ngai e shaga yang, ngai n ningdang ai sha hkan nang ring ngai. Dai rai nna, hpa lam rawng ai majaw ngai hpe shaga myit ta? ngai san nga nngai,” ngu nna tsun mu ai.

³⁰Shaloi Korneli gaw, “Dai ni mali ya rai sai, akyu hpyi ai ahkying jahku hta, nye a nta e ngai akyu hpyi nga yang, yu u, tu kabrim ai hpun palawng bu hpun ai wa langai mi nye a man e tsap pru nna,

³¹‘Korneli e, na a akyu hpyi ai ga madat mara nu ai; na alu jaw ai mung Karai Kasang matsing da nu ai.

³²Dai re ai majaw Yopa de shangun nna, Petru ngu ai Simun hpe shaga su; dai wa gaw, nammukdara makau e nga ai shanhpyi sama Simun a nta e shingbyi nga ai,’ nga nna tsun ai.

³³Dai majaw, shaloi jang ngai nang hpang de shangun dat ai rai nna, ya nang du ai gaw, mai kaja nga ai. Dai rai nna, shi Madu nang hpe hkang da mada madat la na, ya anhte nlang Karai Kasang a man e, rai nga ga ai,” ngu nna tsun wu ai.

³⁴Shaloi Petru ga hpaw nna, “Karai Kasang masha myi man n tau ai gaw, ya ngai gaja wa chye se ai:

³⁵amyu baw shagu hta shi hpe hkrit hkungga ai hte dingman ai amu galaw ai wa gaw, shi kaw myi man pa nga ai.

³⁶Nga yawng nga pra Madu rai nga ai Yesu Hkristu a marang e ngwipyaw ai hte seng ai kabu gara shiga hkaw tsun dan u ga nga, Israela kashu kasha ni kaw shangun dat ai mungga ngu ai:

³⁷Yawhan baptisma tara hkaw ai hpang, Galile mung kaw nna Yuda mung ting kajai gara wa ai lam hpe, nanhte nan chye nga myit dai:

³⁸dai gaw Nazaret wa Yesu a lam rai nga ai; Karai Kasang gaw Chyoi pra ai Wenyi hte mung, n-gun atsam hte mung, shi hpe chya ya wu ai; Karai Kasang shi hte rau rai nga ai majaw, mai kaja ai amu shi galaw nna, nat gumlau e zingri zingrat hkrum ai ni yawng mayawng hpe shamai ya let, kawan katsan hkawm nga ai.

³⁹Shing rai, Yuda masha ni a mung hta e mung, Yerusalem mare hta mung, shi galaw hkawm wa ai amu yawng mayawng a sakse ni, anhte rai nga ga ai: dai wa hpe nan shanhte hpun hta jen sat kau mu ai.

⁴⁰Karai Kasang chyawm gaw, masum ya nhtoi hta dai wa hpe sharawt dat wu ai rai nna, mung masha danghta man e n rai, sakse matu nga nna, shawng e Karai Kasang lata san da sai anhte ni a man e sha shadan dan mi ai:

⁴¹si ai ni kaw na shi bai rawt ai hpang e, anhte gaw shi hte rau lu sha lu ga ai.

⁴²Shi Madu nan mung, hkrung ai ni hte si sai ni a tara agyi tai na, Karai Kasang san da ai wa rai nga sai lam, mung masha ni hpe tsun dan let sakse hkam na matu shi anhte hpe hkang da ma ni ai.

⁴³Shi hpe kamsham masham ni nlang, shi mying ningsang a marang e, yubak raw dat kau ya ai hkrum na mara ai, nga nna tsun ai myihtoi mahkra mung shi a lam sakse rai nga ma ai,” ngu mu ai.

⁴⁴Petru gaw dai lam naw tsun nga yang, dai ga na ai ni mahkra a ntsa e Chyoi pra ai Wenyi yu shang wa ai.

⁴⁵Chyoi pra ai Wenyi ngu ai kumhpa gaw, maigan amyu masha ntsa e ru jaw ai majaw, Petru hte rau hkan nang ai, matu gadoi lam hkan sai, kamsham ai ni, mau mahka nga ma ai:

⁴⁶kaning rai nme law, shanhte ga amyu myu tsun ai hte Karai Kasang hpe shagrau ma ai, na lu ma ai.

⁴⁷Dai rai nna Petru gaw, “Anhte zawn Chyoi pra ai Wenyi hkam la ai ni hpe, baptisma n hkam shangun na nga, hka hpe kadai hkum lu a ta?” ngu wu ai.

⁴⁸Shing rai, Yesu Hkristu a amying hta baptisma hkam na lam, shi shanhte hpe hkang da mu ai. Shaloi, nhtoi loi mi naw hkring nga na, shanhte shi hpe hpyi ma ai.