Read Jinghpaw Hanson Version Bible KASA 11 Bible Online

KASA 11 - Jinghpaw Hanson Version Bible bible

KASA 11

¹Maigan amyu masha ni mung, Karai Kasang a mungga hta la ma ai, nga ai lam hpe kasa ni hte Yuda mung hkan na kahpu kanau ni na ma ai.

²Rai timung, Petru gaw Yerusalem de lung wa jang matu gadoi lam hkan ai ni mahtang,

³“Nang gaw matu gadoi n hkam ai ni a nta shang nna, shanhte hte rau lu rau sha ndai,” nga nna hkap ndang hkat ma ai.

⁴shaloi Petru ga sharawt nna, dai lam hpe npawt ndung hkren hkai dan nna shanhte hpe,

⁵“Ngai gaw Yopa mare hta akyu hpyi nga nngai; shaloi ngai myit nawng mat wa nna, hpajawng kaba zawn jut mali de jum let, sumsing lamu de na ngai hpang de jahkrat dat ai arai yu wa ai gaw, shingran hta ngai mu we ai:

⁶dai hpe achyoi sha galaw yu yang, ga ntsa na lagaw mali tu ai baw dusat, matse labye, gumrawt hkawm ai baw hte, ntsa malen u ni rawng nga ai, ngai mu nna sumru yu nga nngai.

⁷Dai sha n rai, nsen ngoi pru ai mung, ‘Petru e, rawt u; sat sha u,’ nga ai, ngai na nngai.

⁸Ngai chyawm gaw, ‘N rai law, Madu e; n sha mai ai hte n san n seng ai baw, ngai galoi mung n sha ga nngai,’ ngu we ai.

⁹Bai lang mi na nsen gaw, ‘Karai Kasang jasan jaseng ai rai hpe n sha mai ai hkum nga et,’ nga nna lamu de na tsun pru ai.

¹⁰shing rai masum lang byin nna, dai yawng hpe sumsing lamu de dawm la wu ai.

¹¹Shaloi jang, Kesare mare nna, ngai hpang de shangun dat ai masha masum, anhte nga ai nta ndaw e tsap nga ma ai.

¹²Myit n ganung ai sha, shanhte kaw hkan sa na, Chyoi pra ai Wenyi ngai hpe tsun ni ai; ndai hpunau kru mung ngai hte rau sa nna, dai wa a nta de anhte shang saga ai.

¹³Shaloi dai wa gaw, shi a nta e lamu kasa yu tsap ai hte, Yopa mare de masha shangun nna, Petru ngu ai Simun hpe shaga su;

¹⁴nang hte na nta masha ni nlang hkye hkrang la kaw du lu myit ga, shi nang hpe ga tsun dan na ra ai, nga nna sa tsun ai lam, anhte hpe hkai dan mi ai.

¹⁵Ya, ngai ga hpaw nna tsun nga yang, shawng de anhte a ntsa e Chyoi pra ai Wenyi yu hkrat ai zawn, shanhte hta mung yu hkrat wa malu ai.

¹⁶Shaloi she, Yawhan gaw hka hte baptisma jaw wu ai; nanhte chyawm gaw, Chyoi pra ai Wenyi hta baptisma hkam la na marin dai, nga nna, shi Madu tsun ai ga hpe ngai dum we ai.

¹⁷Dai re ai majaw, shi madu Yesu Hkristu hpe kamsham ai shani, anhte hpe jaw ai chyeju kumhpa hte maren she, Karai Kasang shanhte hpe jaw ai rai yang gaw, ngai hpa wa re ai ngu nna, Karai Kasang hpe shadang lu na rai ta?” ngu nna tsun wu ai.

¹⁸Dai lam na ma yang, shanhte myit pyaw nga nna, “Aw, rai sa, Karai Kasang gaw maigan amyu ni hpe mung, asak hkrung ai hte seng ai myit malai lam jaw manu hka,” nga nna Karai Kasang hpe shagrau sha-a ma ai.

¹⁹Ya Stehpan kaw nna hpang ai zingri zingrat lam majaw bra mat wa ai ni gaw, Hpinisi, Kupru mung hte Antioki mare du hkra len hkawm wa nna, Yuda masha ni hpe hkrai sha, dai mungga hkaw dan ma ai.

²⁰Rai timung, shanhte hta na Kupru hte Kureni mung na ni nkau mi, Antioki de hkan du ma ai rai nna, Madu Yesu a kabu gara shiga, Heleni masha ni hpe mung tsun dan ma ai.

²¹Dai Madu a lata shanhte hte rau nga nga ai rai nna, kamsham ai hpung daw wa kaba, Madu hpang de kayin bang wa ma ai.

²²Dai ni a lam, Yerusalem na Hpung a na hta kajai gumhkawng shang wa ai rai nna, shanhte gaw Barnaba hpe Antioki du hkra shangun dat mu ai.

²³Dai wa du nna, Karai Kasang a chyeju mu lu yang, kabu gara nga ai hte, shanhte dai Madu hta lashum shawt manoi manat nga na matu, nlang hte hpe shadum jahprang mu ai:

²⁴kaning rai nme law, dai wa gaw masha kaja rai nna, Chyoi pra ai Wenyi hte mung, makam masham hte mung, hkum tsup ai wa rai nga ai: masha law law wa hpe dai Madu hpang de jat bang wa shangun mu ai.

²⁵Bai Barnaba gaw, Shawlu hpe sa tam na Tarshu de pru sa wa nna, shi hpe mu jang Antioki de woi wa wu ai.

²⁶Ya, shan gaw laning mi tup dai Hpung hte rau hpawng nga ma ai rai nna, masha law law hpe sharin shaga lu ma ai; sape ni mung, Hkristu ni, ngu ai amying hpe, Antioki mare hta shawng lu la ai rai nga ai.

²⁷Dai nhtoi hte hta myihtoi nkau mi Yerusalem kaw nna, Antioki de sa du ma ai.

²⁸Dai ni hta na Agabu ngu ai wa rawt nna, ga ntsa ting hta hku wa kaba wa na ra ai lam, Wenyi madun ai hte tsun dan mu ai; dai gaw hkawhkam Klawdi a aprat e byin wa sai.

²⁹Dai rai nna, sape ni gaw, Yuda mung na kahpu kanau ni hpang de langai hte langai rai lu ai made karum dat na nga, myit shatawng da ma ai:

³⁰dai hte maren shanhte galaw nna, Barnaba yan Shawlu a lata hta salang ni hpang de shagun dat ma ai.