Read Jinghpaw Hanson Version Bible KASA 13 Bible Online

KASA 13 - Jinghpaw Hanson Version Bible bible

KASA 13

¹Ya, Antioki mare na Hpung hta e, myihtoi ni, sara ni, nang nga ma ai: dai ni gaw, Barnaba, Nigera ngu ai Simun, Kureni masha Luki, Herod du wa kanawn kanau Manaen hte Shawlu hte rai nga ma ai.

²Ya shanhte Madu hpe nawku let lusha gam nga yang, Chyoi pra ai Wenyi gaw, “Barnaba yan Shawlu hpe, ngai shaga da ai amu gun hpai na matu, san da mu,” nga ai.

³Dai hte maren shanhte gaw lusha gam let, akyu hpyi nna, shan a ntsa e lata mara jaw ngut jang, shan hpe dat mu ai.

⁴Shing rai, Chyoi pra ai Wenyi shan hpe shangun dat mu ai hte maren, shan gaw Seluki de yu wa nna, dai yang na li jawn nhtawm, Kupru de du ma ai.

⁵Salami mare hta naw nga ai hte yang, Yuda ni a tara jawng ni hta, Karai Kasang a mungga hkai dan mu ai; Yawhan mung shan a nrum ntau rai nga ai.

⁶Ya shanhte gaw dai zunlawng ga sa wa nna Pahpu mare du ma yang, Bara-Yesu mying ai Yuda masha rai nga ai lakle sara hte masu ai myihtoi langai mi hpe, mu hkrup mu ai;

⁷dai wa gaw, Sergi Pawlu ngu ai, myit kunghpan ai munggyi wa kaw nga ai wa re ai. Dai munggyi wa Karai Kasang a mungga madat la mayu nna, Barnaba yan Shawlu hpe shaga la mu ai.

⁸Shaloi lakle sara ngu ai, lachyum hku shamying ai, Eluma gaw, dai munggyi wa a kamsham ai lam jahpyak kau ya mayu ai rai nna, shanhte hpe ndang shadang mu ai.

⁹Shaloi Pawlu ngu ai Shawlu gaw, Chyoi pra ai Wenyi hpring let, shi hpe azi da nna,

¹⁰“Myit magaw lam yawng hte gumle gumlau yawng hpring nga ai, nat a kasha, dingman ai lam shagu a hpyen wa e, Madu a dingman ai lam hpe hkap shadang na n sim nga n ni?

¹¹Ya, yu u, Madu a lata na ntsa e du nna, tawng marang mi jan n mu lu ai, myi kyaw nga na rin dai,” ngu wu ai. Shaloi jang shi a myi shinggang mat nna, nsin chyip rai mat salu ai; shing rai, shi a lata dun ai masha tam let, kayin hkawm nga ai.

¹²Dai lam hpe munggyi wa mu jang, Madu a sharin shaga ai lam hpe mau ai hte kamsham nga ai.

¹³Dai hpang Pawlu hte shi a manang ni gaw, Pahpu kaw nna li jawn nhtawm, Pamhpuli mung na Perga mare de du ma ai: Yawhan chyawm gaw shanhte hte hka nna, Yerusalem mare de wa mat ai.

¹⁴Bai, shanhte gaw Perga kaw nna rawt sa wa yang, Pesidi mung na Antioki mare de du ma ai: ya laban nhtoi e tara jawng hta shang dung nga ma ai.

¹⁵Shaloi tara laika hte myihtoi laika hti ngut jang, jawng agyi ni gaw shanhte hpang de masha shangun nna, “Hpunau ni e, shawa hpawng hpe shadum jahprang na ga lu myit yang gaw, shadum jahprang mu,” ngu mu ai.

¹⁶Shaloi Pawlu rawt nna lata dingsi let, “Israela masha ni hte Karai Kasang hpe hkrit hkungga ai ni e, madat mara la mu.

¹⁷Ndai Israela amyu a Karai Kasang gaw, anhte a ji wa ni hpe lata la nu ai rai nna, Egutu mung e naw nga nga yang, dai amyu hpe shagrau nna, shada da ai lahpum ta hte shaw woi nu ai.

¹⁸Bai, mali shi ning daram, nam mali hkan e shanhte a akyang hpe sharang ya nna,

¹⁹Hkanan mung na masha amyu sanit hpe shaza kau nhtawm, mali tsa manga shi ning daram, dai ni a mungdan hta na sali shanhte hpe karan jaw mu ai:

²⁰dai hte a hpang e myihtoi Samuela aprat du hkra tara agyi ni tawn da ya mu ai.

²¹Dai hpang shanhte hkawhkam hpyi nna, Karai Kasang gaw shanhte hpe, Ben-yamin amyu, Kisa a kasha Shawlu hpe mali shi ning laman e, shadun ya mu ai.

²²Dai wa hpe jahkrat kau nhtawm, Dawi hpe, shanhte a hkawhkam tai na sharawt ya wu ai: dai wa a lam shi nan sakse hkam ai gaw, ‘Nye a myit hte tup ai Yese a kasha Dawi hpe ngai mu se ai; dai wa gaw, ngai ra ai hku yawng shadik ya na ra ai,’ nga ai.

²³Dai wa a amyu matu hta na, Karai Kasang gaw, ga ndat nga ai hte maren, Israela masha ni a matu, Hkye hkrang la ai Madu Yesu hpe, paw pru shangun wu ai.

²⁴Dai wa garai n pru yang Yawhan mung, Israela amyu yawng hpe myit malai hte seng ai baptisma lam shawng hkaw dan manu ai.

²⁵Bai Yawhan gaw shi gun ai magam hpra wa na rai jang, ‘Ngai hpe kadai re ai nawn nga myit ta? Ngai gaw dai wa n rai nngai; yu mu, nye a hpang e langai mi du na ra ai; dai wa a kyepdin raw na pyi ngai n ging nngai,’ nga ai.

²⁶Abraham a amyu kashu kasha ni hte, nanhte hta na Karai Kasang hpe hkrit hkungga ai, hpunau ni e, ndai hkye hkrang la ai lam a mungga gaw, anhte hpang de jaw dat ra ai.

²⁷Kaning rai nme law, Yerusalem na ni hte, shanhte a du gyi ni gaw, shi madu hpe mung, laban nhtoi shagu hti ai myihtoi ni a ga hpe mung, n chye na ai wa, shi hpe dawdan ai hte dai ga ni hpe shatup manu ai.

²⁸Shi hta si ging ai mara n mu timung, shi hpe sat kau na, Pilat kaw hpyi ma ai.

²⁹Shing rai, shi hpe lakap nna ka da mada shatup ma jang, shi hpe hpun hta na jahkrat la nna, lup hta bang da mu ai.

³⁰Karai Kasang chyawm gaw, chyasi ni kaw na shi hpe sharawt la wu ai:

³¹Galile mung kaw nna Yerusalem mare de shi hte rau lung wa ai ni ngu ai, mung masha ni a man e ya shi a sakse tai nga ai ni, nhtoi tsawmra na hkra shi hpe mu lu masai.

³²Shing rai, ‘Nang ngai sha rai nga ndai, dai ni ngai nang hpe shaprat sade ai,’ nga nna kanu lahkawng ngu na Shakawn Kungdawn ga hta ka da nga ai hte maren,

³³Karai Kasang Yesu hpe hkrung sharawt ya ai a marang e, ji wa ni hpe jaw da ai ga ndat hpe, anhte a kashu kasha ni hta shadik ya ai kabu gara shiga gaw, nanhte kaw gun sa saga ai.

³⁴Dai hta kaga, shi hten bya ai galoi n hkrum hkra, si ai ni kaw na hkrung sharawt la na lam, Karai Kasang tsun ai gaw, Dawi hta nna, chyoi pra ai hte grin nga ai chyeju, ngai nanhte hpe jaw na made ai, nga ai.

³⁵Kaning rai nme law, kaga Shakawn Kungdawn laika hta mung, ‘Na a Chyoi pra ai wa hten bya hkrum na nang hkraw na n rai,’ nga nna shi tsun ai.

³⁶Ya Dawi gaw, shi a prat hte hta Karai Kasang a ra ai hku gun hpai ngut jang, yup mat nna, kaji kawa ni kaw tawn da ai hte, hten byak ai kaw du wa sai;

³⁷Karai Kasang hkrung sharawt la ai wa chyawm gaw, hten byak hkrum wu ai n rai.

³⁸Dai re ai majaw, hpunau ni e, dai wa a marang e, yubak raw dat kau lu na ahkang, nanhte hpe hkaw dan nga ai gaw, chye nga mu:

³⁹dai hta n-ga, Mawshe a tara hte dingman ai kaw n du lu ai, dai wa hpe kamsham ai ni nlang hte lam shagu hta dingman ai kaw du lu na rai nga ai.

⁴⁰Dai re ai majaw, ‘Yu mu, jahpoi ai ni e, mau nna htum mat mu: Nanhte a nhtoi hta lam langai mi ngai shabyin na nngai;

⁴¹Dai lam marai langai ngai nanhte hpe hkai dan timung, hpa n kam na marin dai,' nga nna myihtoi ni tsun ai ga, nanhte hta n ang u ga, sadi nga mu,” ngu nna hkaw tsun nga ai.

⁴²Ya shan pru wa yang, ndai ga hpang na laban nhtoi hta mung bai hkai dan na shanhte hpyi ma ai.

⁴³Tara jawng na bra mat wa jang, Yuda ni hte tara hkungga ai proselutu ni law law wa, Pawlu yan Barnaba kaw hkan nang ma ai rai nna, Karai Kasang a chyeju hta shanhte grin nga na matu, shanhte hpe shadum jahprang shaja mu ai.

⁴⁴Dai hpang na laban nhtoi hta, Karai Kasang a mungga na la na matu, mare ting ganoi mahkra, wa zuphpawng nga ma ai.

⁴⁵Yuda masha ni chyawm gaw dai shawa hpawng hpe mu jang, manawn ai myit hte hpring chyat nga ma ai rai nna, Pawlu tsun ai lam hpe ndang hkat ai hte aroi ara ngu da mu ai.

⁴⁶Pawlu yan Barnaba mung nden ja ai myit hte, “Karai Kasang a mungga nanhte hpe shawng tsun dan na gaw, lam rai nga ai; rai timung, nanhte mahtang dai hpe gang kau nna, n htum n wai asak hte n ging ai gaw, tinang dai dawdan la myit dai majaw, yu mu, maigan amyu ni hpang de anhte myi man kayin na saga ai.

⁴⁷Kaning rai nme law, ‘Lamu ga htum hkra hkye hkrang la ai lam tai wa hkra, Ngai nang hpe, maigan amyu ni a matu nhtoi shatai sade ai,' nga nna shi Madu anhte hpe hkang dat mani ai,” ngu nna tsun mu ai.

⁴⁸Maigan amyu ni dai na jang, kabu gara nga ai hte, Karai Kasang a mungga hpe shagrau sha-a ma ai: n htum n wai asak lu la na san da ai ni nlang hte mung, kamsham mat ma ai.

⁴⁹Karai Kasang a mungga gaw dai mung ting pri rai wa sai.

⁵⁰Yuda masha ni chyawm gaw, tara hkungga nna arawng lu ai num ni hte, dai mare na agyi ni hte shadut nna, Pawlu yan Barnaba hpe zingri zingrat di shangun ai hte, shanhte a lamu ga jarit na shaden kau mu ai.

⁵¹Shan gaw tinang a lagaw na nhpu shanhte hpang maga ahpu kau da nna, Ikoni mare de du ma ai.

⁵²Sape ni chyawm gaw, kabu gara ai hte Chyoi pra ai Wenyi hpring nga ma ai.