Read Jinghpaw Hanson Version Bible KASA 14 Bible Online

KASA 14 - Jinghpaw Hanson Version Bible bible

KASA 14

¹Ya Ikoni mare e rai nga yang, shanhte gaw Yuda masha ni a tara jawng hta rau shang nna, Yuda masha hte Heleni masha wunawng kaba kamsham mat hkra, ga tsun dan mu ai.

²Rai timung, n madat hkraw ai Yuda masha ni gaw, maigan masha ni hpe myit shadut nna, hpunau ni hpe n dawng na hku gumlau mu ai.

³Dai majaw shan mung tsawmra na hkra dai yang nga nna, Madu hta hpa let nden ja ai myit hte hkaw dan mu ai rai nna, shi Madu mung, shan a lata hta lamik kumla hte mauhpa amu shabyin ya let, shi a chyeju mungga a lam, sakse hkam ya nga ai.

⁴Mare na ni chyawm gaw myit bra wa ma ai rai nna, nkau mi Yuda ni hpang de, nkau mi kasa ni hpang de, rai mat ma ai.

⁵Ya maigan masha hta na ni mung, Yuda masha ni hte shanhte a agyi ni mung, shan hpe aroi arip di nna nlung hte kabai sat na nga htim ma ai hpe,

⁶shan dum rau nna, Lukaoni mung na mare, Lustra, Derbe hte dai yan a ginwang de hprawng mat wa ma ai:

⁷dai hkan e mung dai kabu gara shiga hkaw dan mu ai.

⁸Ya Lustra mare hta e, kanu a hkritung nna lagaw hten ai chyahten labye rai nna, galoi mung n hkawm yu ai wa langai mi, dung nga ai.

⁹Shi mung Pawlu tsun ai ga madat nga ai; dai wa hpe Pawlu azi yu wu yang mai wa lu hkra kamsham ai myit rawng nga ai hpe shi chye ya nna,

¹⁰“Ai jan rawt tsap u,” nga nna, nsen shaja tsun wu ai; shi mung, gumlawt rawt nna hkawm yu nga ai.

¹¹Shing rai, Pawlu galaw ai amu hpe shawa masha ni mu jang, shanhte gaw Lukaoni ga hte, “Hpara ni, masha hkumhkrang dagraw nna, anhte hpang de yu hkrat wa mara ai,” nga nna jahtau ma ai.

¹²Dai rai nna shanhte gaw, Barnaba hpe Zeu, Pawlu ga ningbawng wa re ai majaw, shi hpe Herma, ngu nna shamying mu ai.

¹³Dai mare shinggan e nga ai Zeu jawng na hkinjawng wa mung, mare chyinghka hkan e usu hte nampan shanghkawng ni la sa nna, shawa masha ni hte rau hkungga jaw na maw ma ai.

¹⁴Rai timung, kasa Barnaba yan Pawlu gaw dai na jang tinang a hpun palawng gang je kau let, shawa hpawng ka-ang de gat shang nhtawm,

¹⁵“Hkau hte e, hpa rai dai galaw wa myit ta? An mung nanhte hte maren shinggyim masha yan sha rai ga ai; ndai kaman lila amu kau da nna, sumsing lamu hte ginding aga, nammukdara hte dai hta rawng ai nga manga hpe hpan tawn da ai, ahkrung nga ai Karai Kasang hpang de kayin wa myit ga, ngu nna she nanhte hpe kabu gara shiga hkaw dan ai rai nga ai.

¹⁶Shi gaw, moi shawng na ni a ban e masha amyu baw shagu hpe, tinang ra ai hku hkan mu ga nga, dat tawn da mu ai;

¹⁷rai timung, shi hkum a sakse kata ai n rai; mai kaja ai amu galaw let sumsing lamu na marang hte, nsi naisi shangai chye ai duhkra ladaw shi jaw da ai hte, nanhte hpe lusha hte mung kabu gara ai hte mung, jahkru shakat ya nga ai,” ngu nna jahtau mu ai.

¹⁸Shing nga tsun yang pyi, shawa masha ni shan hpe hkungga jaw na lam, n hkum dang na daram she rai wa ai.

¹⁹Dai hpang, Antioki hte Ikoni mare hkan na Yuda masha ni sa du nna, shawa hpawng hpe woi awn nhtawm, Pawlu hpe nlung hte kabai nna, shi hpe si mat sai zawn nawn ai majaw, mare shinggan de karawt shapraw kau mu ai.

²⁰Rai timung, sape ni grup rai tsap nga yang, shi rawt nna mare de shang wa ai; hpang shani e shi Barnaba hte rau Derbe mare de sa wa ai.

²¹Dai mare hta e kabu gara shiga hkaw dan nna, sape law law shatai nhtawm, shan gaw, Lustra, Ikoni, Antioki mare lam bai wa nna

²²sape ni a myit shangang ya let, dai makam masham lam hta agrin nga na matu shadum jahprang ai hte, “Karai Kasang a mungdan de ru tsang ai law law hte shang wa na rai ga ai,” ngu nna sharin da mu ai.

²³Hpung shagu hta, hpung up salang lata la nna, lusha gam let akyu hpyi ngut jang, shanhte kamsham nga ai Madu a lata hta, ap ya da mu ai.

²⁴Dai hpang shan gaw, Pesidi mung ga sa wa nna, Pamhpuli mung de du ma ai.

²⁵Dai yang Perga mare hta mungga tsun dan nhtawm, Atali de yu wa ma ai;

²⁶dai kaw nna li jawn nhtawm, ya shan gun hpai lai wa sai amu a matu, Karai Kasang a chyeju hta ap nna, shangun dat hkam la ai Antioki mare de bai du wa ma ai.

²⁷Shan du wa jang, Hpung masha ni hpe jahpawng tawn nna, Karai Kasang shan hta galaw ai lam yawng mayawng mung, maigan amyu ni hpe dai makam masham lam chyinghka hpaw ya wu ai mung, hkai dan mu ai.

²⁸Shing rai shan gaw, dai yang sape ni hte tsawmra wa na hkra, hkring nga ma ai.