Read Jinghpaw Hanson Version Bible KASA 16 Bible Online

KASA 16 - Jinghpaw Hanson Version Bible bible

KASA 16

¹Derbe hte Lustra mare de mung shi du nna, yu u, dai yang e Timohti mying ai sape langai mi nga nga ai; kanu gaw kamsham ai Yuda num, kawa chyawm gaw, Heleni masha rai nga ai.

²Dai sape gaw, Lustra hte Ikoni mare nga ai kahpu kanau ni hta, sari sadang lu ai wa rai nga ai.

³Pawlu gaw dai wa hpe shanan la mayu ai rai nna, shi a kawa Heleni masha rai nga ai gaw, dai yang na Yuda masha ni nlang chye ma ai majaw, shanhte hpe tau nna, shi hpe matu gadoi hking jaw wu ai.

⁴Shing rai, dai mare ni ga sa wa let, Yerusalem na kasa ni hte salang ni hkang dat ai ga matsun hpe, hkan nang mu ga nga, shanhte hpe ap jaw ma ai.

⁵Hpung masha ni mung dai makam masham lam hta ngang wa nna, lani hte lani law htam wa ma ai.

⁶Ya, Asi mung e mungga lam tsun dan na, Chyoi pra ai Wenyi shanhte hpe hkum shadang mu ai majaw, shanhte Hprugi hte Galati mung de ga sa wa nna,

⁷Musi mung du magang yang, Bihtuni mung de shang sa wa na maw ma ai; rai timung, Yesu a Wenyi shanhte hpe ahkang n jaw mu ai majaw,

⁸Musi mung makau garet sa wa nna, Troa mare de du ma ai.

⁹Dai yang, shana e Pawlu gaw shingran hta, Makedoni masha langai mi sa tsap nna, “Makedoni mung de rap sa nna, anhte hpe karum la mi,” nga nna shi hpe hpyi ai mu wu ai.

¹⁰Shingran dai mu nna, Makedoni masha ni hpe kabu gara shiga hkaw dan na matu, Karai Kasang anhte hpe shaga ai rai sai, ngu nna myit la nhtawm, Makedoni mung de rap na matu anhte shaloi jang tam shajin ga ai.

¹¹Dai re ai majaw, anhte Troa mare nna, Samohtrake zunlawng de ang ang li hta jawn sa wa nna, hpang shani e Neapoli mare de du ga ai;

¹²dai kaw na bai lai yang, Makedoni mung e, Roma masha de ai, dai ginwang na mare daju, Hpilipi de, anhte du nna, dai yang tawng marang mi nga nga ga ai.

¹³Laban nhtoi du jang, akyu hpyi ai shara nga na zawn nawn nna, mare chyinghka shinggan, hka kau de anhte pru sa nhtawm, dung nga let, dai de hpawng sa wa ai num ni hpe tsun dan ga ai.

¹⁴Shaloi, Karai Kasang hpe nawku ai, Htuatira mare na, sumpan hkyeng dut ai num, Ludi ngu ai jan anhte a ga na la nna, Pawlu tsun dan ai lam hpe madat mara u ga nga, Madu gaw shi a myit hpaw ya wu ai.

¹⁵Num dai hte shi a nta masha ni baptisma hkam la ngut jang, shi gaw, “Dai Madu hta ngai kangka rai ni ai, nanhte myit hkut da sai rai yang gaw, nye nta e shang manam marit,” nga nna anhte hpe akroi anoi hpyi ai hte nga shangun mi ai.

¹⁶Dai hpang anhte dai akyu hpyi ai shara de sa wa nga yang, gumhpan hpan nna, madu ni hpe sut grai jasu ai nat shung ai mayam numsha langai mi anhte hte hkrum hkrum re ai.

¹⁷Numsha dai mi Pawlu hte anhte kaw hkan nang nang rai nhtawm, “Ndai ni gaw law, nanhte hpe hkye hkrang la ai lam tsun dan ai, Tsaw Htum ai Karai Kasang a shangun ma ni rai nga ma ai law,” nga nna jahtau htau re ai.

¹⁸Law law ya wa shi shing re ai majaw, Pawlu grai myit n pyaw nna, kayin nhtawm, dai nat hpe, “Yesu Hkristu a mying ningsang hte ngai nang hpe tsun de ai, shi kaw na pru mat u,” ngu nna daru wu yang, dai ahkying hta nan shi pru mat wa ai.

¹⁹Ya shi a madu ni gaw, ma-un shabrai lu sha na lam myit mada shara n nga sai, chye jang, shanhte Pawlu yan Sila hpe rim la nna, gat de nga ai agyi salang ni hpang de karawt wa mu ai;

²⁰shing rai, mare up ai ni a man de shan hpe woi jashawn n htawm, “Ndai Yuda masha yan, anhte a mare hpe nachying sharu shatsang ai hte,

²¹anhte Roma masha ni n mai hta, n mai hkan ai htung hking hpe sa sharin nga ma ai,” ngu nna tsun mu ai.

²²Dai rai nna shawa masha ni shan a maga mi de lang lata rawt ma ai; mare up ai ni mung, shan a hpun palawng hpe gang je kau ya nna, ri tawng hte kayat na lam, dawdan mu ai.

²³Shing rai, shan hpe law law lang kayat nhtawm, htawng hta rawng da mu ai rai nna, shan hpe ashim sha sin da na lam, htawng agyi wa hpe hkang dat mu ai;

²⁴htawng agyi wa mung, shing nga hkang dat ai ga majaw, shan hpe htawng na kata gawk hta jashawn nna, share hte sharen tawn mu ai.

²⁵Rai timung, yuptung hpawa e Pawlu yan Sila gaw akyu hpyi ai hte, Karai Kasang hpe mahkawn mangoi nga ma ai rai nna, bawng dung ai ni shan a ga madat nga ma ai.

²⁶Shaloi nnang nawn kaba akajawng sha nawn wa nna, htawng nta npawt ni awam wa ai hte, chyinghka mahkra ahkring sha hta hpaw malang mat shajang nna, yawng hte a hkang hkyihkyang ni malaw mat wa ai.

²⁷Htawng agyi wa mung, yup hprang nna, htawng chyinghka ni hpaw maden nga ai mu jang, bawng ni hprawng mat masai nga, myit la nna, shi a nhtu shaw nhtawm, shi dai dai galun si na hkyen nga ai.

²⁸Pawlu chyawm gaw, “Nang dai, na hkum hpe hkum shaza et, anhte nlang ahkum sha rai nga ga ai law,” ngu nna aja awa jahtau tsun wu ai.

²⁹Shaloi shi pyengdin hpyi lang nna, kata de gat bang wa nhtawm, hkrit gari let Pawlu yan Sila man e dingnyawm nga ai;

³⁰bai shan hpe woi pru nna, “Madu yan e, ngai hkye hkrang la ai kaw du lu hkra, kaning rai na rai ta?” ngu nna san mu ai.

³¹Shaloi shan gaw, Madu Yesu hpe kamsham u; shaloi nang hte na nta masha ni nlang, hkye hkrang la ai kaw du na marin dai,” nga nna tsun ai lata,

³²dai htawng agyi wa hte shi a nta masha nlang hte hpe Madu a mungga hkaw tsun dan mu ai.

³³Dai shana ahkying hta nan, shi shan hpe woi wa nhtawm, shan a nma kashin kau ya nna, shi hkum hte nta ting hpawn, shaloi jang baptisma hkam la ma ai.

³⁴Bai, shi a nta nhku de mung shi shan hpe woi jashawn la nna, lusha galaw daw let, Karai Kasang hpe kamsham lu sai majaw, shi hte nta ting hte hpawn, ja ja kabu gara nga ai.

³⁵Ya nhtoi htoi jang, mare agyi ni gaw, Dai yan hpe dat dat u, ngu nna mang galang ni hpe sa tsun shangun mu ai.

³⁶Shaloi htawng agyi wa, dai ga Pawlu hpe tsun dan let, “Nan hpe dat dat na, mare agyi ni masha shangun mara ai majaw, ya angwi apyaw pru wa masit,” ngu nna tsun nga ai.

³⁷Pawlu chyawm gaw, “An Roma masha she rai nga ga ai hpe, garai n san dawdan yang, masha man e an hpe kayat nna, htawng hta jahkrat da myit htawm me, ya atsin sha lagyim dat dat na maw ma hka i? N rai law, shanhte hkum lala she sa shapraw la mi ga,” ngu nna shanhte hpe htan dat mu ai.

³⁸Mang galang ni mare agyi ni hpe ga dai wa tsun dan wu yang, shan gaw Roma masha re ai na jang, hkrit nna,

³⁹shanhte hkum nan shan kaw sa nhtawm, sa nem shapraw la nna, dai mare na pru wa na lam hpyi nem ma ai.

⁴⁰Shaloi shan gaw dai htawng na pru wa nna, Ludi a nta de shang wa ma ai; shing rai hpunau ni hpe mu jang, shanhte hpe shalan shabran tawn da nhtawm, pru mat wa ma ai.