Read Jinghpaw Hanson Version Bible KASA 17 Bible Online

KASA 17 - Jinghpaw Hanson Version Bible bible

KASA 17

¹Dai hpang shanhte gaw Amhpipoli hte Apoloni mare ga sa wa ma yang, Htesaloni mare de du ma ai; dai yang e Yuda masha ni a tara jawng rai nga ai.

²Pawlu gaw shi a htung hte maren, shanhte kaw shang nna, Laban nhtoi masum ting, Chyum laika hku hkan nna shanhte hte tsun chyai let,

³Hkristu gaw nni nkri hkrum lu na hte, si ai kaw na bai hkrung rawt wa na gaw, shi a lam rai nga ai, nga nna mung, Ngai nanhte hpe tsun dan ai Yesu gaw, dai Hkristu nan rai nga ai, nga nna mung, shanhte hpe jahprang mu ai.

⁴Shanhte hta na nkau mi gaw kamsham nna, Pawlu yan Sila hte kanawn nga ma ai; dai ni hta, tara hkungga ai Heleni masha law law wa hte, arawng lu ai num ni ram ram mung, lawm ma ai.

⁵Yuda masha ni chyawm gaw myit manawn nna, pagawn para re ai masha ni hta na n hkru ai masha nkau mi hpe saw la nhtawm, masha jahpawng tawn nna, mare ting hpe kabrawng shangun mu ai; shing rai, Yasun a nta hpe adip nna, shawa masha ni hpang de shan hpe shapraw ya na hku, tam ma ai,

⁶Shan hpe n mu jang, Yasun hte hpunau ni nkau mi hpe, shanhte mare du gyi ni hpang de karawt sa nna, “Mungkan ting hpe galau kau hkawm ai ndai ni, nang de mung du mara ai hpe, Yasun shan hpe hkap la mu ai:

⁷shanhte mahkra, Yesu ngu ai hkawhkam kaga langai mi naw nga ai, nga nna tsun ma ai majaw, Kehta tara hte nhtan shai ai, rai nga ma ai,” nga nna jahtau tsun ma ai,

⁸Mare masha ni hte mare agyi ni dai ga na ma yang, myit ru myit ra nga ma ai.

⁹Rai timung, Yasun hte kaga ni kaw na pahkam hkam la nhtawm, shanhte hpe dat da mu ai.

¹⁰Hpunau ni chyawm gaw dai shana jang, Pawlu yan Sila hpe Beria mare de shangun dat mu ai; dai de du yang, shan gaw Yuda ni a tara jawng hta shang bang wa ma ai.

¹¹Dai mare masha ni gaw Htesaloni masha ni hta myit grau su ma ai rai nna, dai mungga hta myit shawn loi ai hte, dai lam ni teng ai n teng ai chye lu hkra, Chyum laika hpe shani shagu a yu nga ma ai.

¹²Dai rai nna, shanhte hta na law law wa kamsham shajang ma ai; arawng lu ai Heleni numsha, lasha ram ram mung, lawm ma ai.

¹³Pawlu gaw Beria mare hta mung, Karai Kasang a mungga hkaw dan nga ai lam, Htesaloni mare na Yuda masha ni chye yang, dai de mung shanhte sa nna, mare masha ni hpe myit sharawt nna, kabrawng shangun mu ai.

¹⁴Shaloi hpunau ni gaw Pawlu hpe nammukdara makau sa du hkra, shaloi jang, sa kau dat mu ai; Sila yan Timohti chyawm gaw naw hti nga ma ai.

¹⁵Rai timung, Pawlu hpe hkan sa ai ni gaw, Ahten mare du hkra shi hpe hkan sa kau da nna, Sila yan Timohti hpe alawan hkan nang na lam, htet dat ai ga gun let, bai wa ma ai.

¹⁶Ya Pawlu, Ahten mare hta dai yan hpe la let hkring nga yang, dai mare ting Hpara sumla hkrai chyat rai nga ai mu nna, shi a wenyi kahtet bu nga ai.

¹⁷Dai re ai majaw shi gaw, tara jawng hkan e Yuda masha ni hte tara hkungga ai ni hte mung, shani shagu gat hkan e hkrum mahkrum ni hte mung, tsun dan hkat nga ai.

¹⁸Dai rai nna, Epikuri lam hte Sto-i lam hkan ai hpaji sara ni nkau mi, shi hte dangrang hkat ma ai rai nna, nkau mi gaw, “Ndai baw law ai wa hpa tsun mayu nga ai kun?” nga nna mung, nkau mi gaw, “Hpara kaga ni a lam tsun dan ai wa rai sam ai,” nga nna mung, tsun shajang ma ai: dai gaw, shi Yesu a lam hte bai hkrung rawt wa ai lam tsun dan ai majaw rai nga ai.

¹⁹Shing nga tsun nhtawm, Pawlu hpe Aripagu ngu ai kawng de woi lung wa nna, “Dai nang tsun ai sharin shaga lam ningnan, anhte mung chye yu mawe ga?

²⁰Mau na zawn nga ai lam nkau mi, nang anhte hpe tsun dan ndai rai nna, dai lam hpa nga mayu ai gaw, anhte chye mayu ga ai,” ngu nna tsun mu ai.

²¹(Ya Ahten masha nlang hte hte dai yang na shingbyi manam ni gaw, amu ningnan lama ma a lam, hkai chyai ai hte madat mara let, nhtoi shalai nna nga nga ma ai.)

²²Shaloi Pawlu dai Aripagu ka-ang e tsap nna tsun mu ai gaw, “Ahten masha ni e, lam shagu hta Hpara ni hpe nanhte ja ja hkrit hkungga myit dai gaw, ngai mu nngai.

²³Kaning rai nme law, ngai lai hkawm wa nna, nanhte jaw jau ai rai ni hpe mada yu yang, N chye gaw ai Karai Wa matu, nga nna ka tawn ai hkungri langai mi mung, ngai mu hkrup we ai: dai nanhte n chye let nawku ai wa a lam, ngai nanhte hpe hkai dan made ga,

²⁴Mungkan ga hte dai hta nga ai yawng mayawng hpe, hpan tawn da ai Karai Kasang gaw, sumsing lamu hte ginding aga a Madu rai nga ai rai nna, masha lata hte shachyaw ai nawku nta hta rawng nga ai n rai:

²⁵shi nan, yawng mayawng hpe hkrung ai asak, nsoi nsa hte arai hkum sumhpa jaw ya ai wa rai nga ai majaw, lama ma ra ai wa zawn masha lata hte daw jau ra ai n rai.

²⁶Shi gaw, shinggyim masha ni Karai Kasang hpe hkan tam masawp lamawm yu nna, mu yang me mu mu ga nga, dinghta ga e nga pra na matu, masha amyu danghta hpe daju langai hte sha hpan tawn da nna,

²⁷du hkra ladaw hte buga jarit madat da ya mu ai; shing nga tim shi anhte kadai hte mung tsan nga ai n rai:

²⁸kaning rai nme law, shi a jaw e anhte hkrung nga nna, shamu shamawt nga ai hte nga pra ga ai. Dai hte maren, nanhte hta na ningtam laka ni pyi, ‘Anhte mung Shi a amyu matu ni rai nga ga ai,' nga nna ka ma ai.

²⁹Shing rai, anhte Karai Kasang a amyu matu ni rai nga ga ai majaw, Karai Kasang ngu ai hpe, masha a hpaji lata hte tawk ka ai aja, gumhpraw, nlung sumla hte bung ai, ngu nna n mai myit la ga ai.

³⁰N na n chye nna lai mat sai prat hpe, Karai Kasang shatawt lai kau wu timung, ya gaw, shara magup hkan na masha nga yawng hpe, myit malai lu mu, nga nna hkang dat ra ai:

³¹kaning rai nme law, shi e san da sai wa a lata hte mungkan ga hpe dingman ai hku dawdan na nhtoi gaw, shi tawn da nu ai: dai wa hpe si ai ni kaw na shi hkrung sharawt la ai hte, dai san da ai lam hta, masha yawng a man e kam ram ai sakse tawn da nu ai,” ngu nna tsun nga ai.

³²Si sai ni bai hkrung rawt ai nga ai lam na jang, nkau mi gaw jahpoi asawng ma ai: nkau mi chyawm gaw, “Ndai lam, na a ga anhte lang mi naw madat yu na ga ai,” nga nna tsun ma ai.

³³Shing rai Pawlu mung shanhte kaw na pru mat wa ai.

³⁴Rai timung, masha nkau mi shi hte kanawn nna kamsham mat ma ai: dai ni hta na Aripagu kawng agyi Dionusi hte Damari mying ai num langai mi mung. dai hta kaga masha ni mung, lawm ma ai.