Read Jinghpaw Hanson Version Bible KASA 18 Bible Online

KASA 18 - Jinghpaw Hanson Version Bible bible

KASA 18

¹Ya dai lam byin ai hpang Pawlu gaw, Ahten mare na pru nna, Korinhtu mare de du ai.

²Dai yang, Pontu mung masha, Akula mying ai, Yuda la langai mi hte hkrum wu ai; dai wa gaw, ‘Yuda masha nlang, Roma mare na pru wa lu na,’ nga nna, Hkawhkam Klawdi ga dat ai majaw, madu jan Priskila hte rau Itali mung na htawt wa ai, gade garai n na ai; ya shi gaw, dai yan kaw manam nga ai:

³shanhte janghpang chywi sha ai hkrai rai nna, galaw sha bungli baw sha rai malu ai majaw, shi mung shan hte rau amu jawm galaw nna, nga nga ai.

⁴Laban nhtoi shagu, tara jawng hta Yuda masha hpe mung, Heleni masha hpe mung, tsun hkat let awn da mu ai.

⁵Ya Sila yan Timohti Makedoni mung nna hkan dep jang, Pawlu gaw mungga hkaw lam hkrai san rai nna, Yesu gaw Hkristu nan rai nga ai, nga nna Yuda masha ni hpe sakse hkam da wu ai.

⁶Shanhte chyawm gaw hkap ndang ai hte aroi ara nga ma yang, shi palawng ahpu dan let, “Nanhte a asai gaw nanhte a baw e mara nga nu ga; ngai chyawm gaw lawt ni ai: ya kaw nna gaw, maigan amyu ni hpang de ngai kayin mat wa na ni ai,” ngu nna shanhte hpe tsun mu ai.

⁷Dai yang na shi pru nhtawm, Karai Kasang hpe nawku ai Titu Yustu mying ai wa a nta de, shang bang wa ai; dai wa a nta gaw tara jawng hte htep rai nga ai.

⁸Krispu mying ai tara jawng agyi wa mung, shi a nta masha nlang hte hte hpawn, Madu hpe kamsham ma ai: Korinhtu masha ni law law mung, na la nna kamsham ai hte baptisma hkam la ma ai.

⁹Dai shaloi Madu gaw shana e shingran hta Pawlu hpe “hkum hkrit et; she tsun u, atsin sha hkum nga et;

¹⁰ngai nang hte rau rai nga nngai, nang hpe shoihpa jahkrum na kadai lata shadu lu na n rai; ndai mare hta nye a masha law law nga nga ai,” ngu nna tsun wu ai.

¹¹Shing rai dai yang e Karai Kasang a mungga sharin achyin ya let, laning me shata kru anga nga ai.

¹²Rai timung, Galio gaw Ahkaia mung e munggyi rai nga yang, Yuda masha ni lang lata sha Pawlu hpe gumlau rawt nna, shi hpe tara tingnyang de dun wa nhtawm,

¹³“Ndai wa jep ai tara hte nhtan shai ai hku, Karai Kasang hpe nawku na nga, masha ni hpe woi gunglau nga ai,” ngu nna mara shagun mu ai.

¹⁴Shaloi Pawlu htan na nga, n-gup ap sha naw rai yang, Galio mahtang, “Yuda masha ni e, amu ndai, tara tawt lai ai amu, n hkru n hkra re ai amu rai yang gaw, ngai nanhte a matu sharang ya lu na nngai:

¹⁵rai timung, aga sumtu lam, amying shingjawng lam hte, nanhte a tara lam sha tsun hkat ai rai yang gaw, nanhte dai nanhte yu la mu: dai zawn re ai amu a matu ngai tara agyi n tai mayu nngai,” ngu nna Yuda masha ni hpe daru kau wu ai.

¹⁶Shing nga shi shanhte hpe tara tingnyang na shaden kau mu ai.

¹⁷Shaloi shanhte nlang tara jawng agyi wa Sosteni hpe rim la nna, tara tingnyang man e anu kau mu ai: Galio chyawm gaw, dai lam hpe hpa mung n nawn wu ai.

¹⁸Dai hpang Pawlu gaw, dai yang nhtoi tsawmra wa na hkra naw nga nga nhtawm, hpunau ni hpe shakram da nna, li jawn let Suri mung de sa wa ai; Priskila yan Akula shan la mung, shi hte rau rai nga ma ai; shawng e ga shaka da ai ga nga lu ai majaw, Kenhkrea mare e baw doi wu ai.

¹⁹Shaloi shanhte Ehpesu mare de du nna, shi shan hpe dai yang e jahka tawn da mu ai: shi chyawm gaw tara jawng de shang nna, Yuda ni hte tsun hkat nga ai.

²⁰Dai yang na ni shi hpe, shanhte kaw tawng marang mi naw nga nga na hpyi ma timung, shi mahtang n hkraw let, “Ya du magang ra ai poi hta Yerusalem e ngai lawm ra nngai.

²¹Karai Kasang hkraw yang gaw, ngai nanhte hpang de bai du na ring ngai,” ngu nna shanhte hpe shakram da nhtawm, Ehpesu kaw na li hte pru mat wa ai.

²²Ya Kesare mare du jang, shi lung wa nna, dai Hpung hpe wa jahkrum nhtawm, Antioki de bai yu wa ai.

²³Dai kaw tawng mi nga nhtawm, shi bai pru nna, Galati mung hte Hprugi mung ga sa wa let, sape ni nlang hpe shadaw shangang nga ai.

²⁴Dai hte yang, Apolo ngu ai, Alesandru mare na, zai byeng-ya rawng ai Yuda masha langai mi, Ehpesu mare de du ai: dai wa gaw, Chyum laika grai chye chyang ai wa rai nga ai.

²⁵Dai wa gaw, Madu a lam sharin la hkrup nna, nachying sharawng let, Yesu a lam atsawm sha sharin achyin ya nga ai; rai timung, shi gaw Yawhan a baptisma lam sha naw chye nga ai:

²⁶ya shi gaw tara jawng hta nden ja ai myit hte nnan hkaw hpang wa nga ai. Shaloi Priskila yan Akula gaw, shi hkaw tsun ai ga na jang, shi hpe shaga la nna, Karai Kasang a mungga lam azin ayang naw sharin shachyang ya mu ai.

²⁷Bai shi gaw, Ahkaia mung de rap sa mayu yang, hpunau ni mung, shi hpe galaw shadut nna, sape ni shi hpe hkap hkalum la na matu, shanhte hpang de laika jaw dat ya mu ai: shi du jang, chyeju majaw kamsham ai ni hpe, grai wa shadaw shangang mu ai:

²⁸kaning rai nme law, Yesu gaw Hkristu nan rai nga ai, nga nna Chyum laika hku madun let, Yuda ni hpe dan dan leng leng, aja awa tsun kapat kau nga ai.