Read Jinghpaw Hanson Version Bible KASA 19 Bible Online

KASA 19 - Jinghpaw Hanson Version Bible bible

KASA 19

¹Ya Apolo Korinhtu mare e nga nga yang, Pawlu gaw lahta mung hku ga sa wa nna, Ehpesu mare de du ai: dai yang shi sape nkau mi hpe hkrum ai rai nna,

²shanhte hpe, “Taw nanhte kamsham sai rai yang, Chyoi pra ai Wenyi lu la manit ni?” ngu nna san mu ai: shanhte gaw “Chyoi pra ai Wenyi nga ai pyi, anhte n na yu ga ai,” nga nna htan mu ai.

³Bai Pawlu gaw, “Dai rai yang, hpa ngu ai baptisma nanhte hkam la myit ta?” ngu nna san mu yang, shanhte gaw, “Yawhan a baptisma hkam ga ai,” ngu mu ai.

⁴shaloi Pawlu, “Yawhan gaw myit malai baptisma she jaw ai rai nna, shi a hpang e sa ai, Yesu ngu ai wa hpe mahtang, kamsham ra ai,” ngu nna mung masha ni hpe tsun mu ai, ngu mu ai.

⁵Shanhte dai ga na jang, Madu Yesu a amying hta baptisma hkam la ma ai.

⁶Ya Pawlu shanhte a ntsa e lata mara jang, Chyoi pra ai Wenyi shanhte a ntsa e du nna, shanhte ga amyu kaga tsun nna myihtoi htoi ma ai.

⁷Shanhte nlang, lasha marai shi lahkawng rai ma ai.

⁸Dai hpang Pawlu gaw tara jawng de shang nna, shata masum tup nden ja ai hte Karai Kasang a mungdan lam tsun hkai hkat nga nna, woi awn da wu ai.

⁹Rai timung, nkau mi gaw myit ja ma ai rai nna, n madat hkraw ai hta n-ga, shawa masha ni a man e ndai Lam hpe aroi asawng ya jang, shanhte kaw na shi pru nna, sape ni hpe kaga jahka la nhtawm, Turanu ngu ai wa a hpaji jawng hta, shani shanang sharin shaga hkat nga ai.

¹⁰Shing rai ni ning laman hte hta sharin nga ai rai nna, Asi mung ting na ni nlang, Yuda masha da, Heleni masha da, Madu a mungga na la lu ma ai.

¹¹Karai Kasang mung, Pawlu a lata hte chyalai magam ningsam madun wu ai rai nna,

¹²Pawlu lang ai hpajet re ai, shingkyit re ai, lama ma machyi ai ni hpang de la wa jang, dai ni mai mat wa ai hte, shung ai nat ni mung pru mat wa ma ai.

¹³Dai shaloi e nat hkyawt let, len hkawm ai Yuda masha nkau mi mung, nat ni hpe, “Pawlu hkaw tsun ai Yesu a amying hte ngai nanhte hpe shapraw made ai,” nga nna nat shung ai ni a ntsa e Madu Yesu a amying nsang la gang ma ai.

¹⁴Skewa ngu ai, Yuda hkinjawng agyi langai mi a shadang sha sanit hte mung shing rai galaw ma ai.

¹⁵Shaloi dai n hkru ai nat shanhte hpe, “Yesu hpe ngai chye nngai. Pawlu hpe mung ngai chye da we ai; nanhte mahtang kadai ni rai myit ta?” nga nna htan nhtawm,

¹⁶dai nat shung ai wa mung shan a ntsa de gumjawt lung nna, adep anut ai hte, dang kau manu ai; dai rai nna shanhte gaw ahpye alam rai, dai nta na singgu krin hprawng htaw wa ma ai.

¹⁷Dai lam hpe Ehpesu mare na Yuda masha, Heleni masha nlang chye ma yang, shanhte yawng hkrit mat shajang nna, Madu Yesu a amying gaw shagrau sha-a ai lu la nga ai.

¹⁸Kamsham sai ni hta na law law mung sa nna, tinang galaw shut ai lam ni tawngban tsun dan ma ai.

¹⁹Lakle mandan bau sha ga ai ni law law mung, shanhte a laika ni la sa nna, masha yawng a man e nat kau mu ai: dai ni a manu sawn yu yang, gumhpraw lap mun manga ging malu ai.

²⁰Shing rai, dai Madu a mungga gaw n-gun atsam hta galu kaba maden jat wa nga ai.

²¹Ndai lam ni byin ai hpang e, Pawlu gaw, Makedoni mung hte Ahkaia mung ga sa wa ngut yang, Yerusalem de bai wa nhtawm, “Dai hpang e Roma mare de mung ngai du yu na nngai,” nga nna myit da nga ai.

²²Dai rai nna shi a ningrum ningtau tai ai Timohti yan Erastu hpe, Makedoni mung de shawng shangun dat nhtawm, shi hkum gaw Asi mung e tawng marang mi naw hkring nga ai.

²³Ya dai tawng hte yang dai lam majaw Kabring kabrawng grai wa byin wa ai.

²⁴Hpa rai nga yang, Demetri ngu ai janghkam wa langai mi, Artemi Hpara num a gumhpraw nta hkrang kaji shachyaw nna, amu galaw manang ni hpe sut woi jasu da mu ai;

²⁵dai wa gaw shi a janghkam manang ni hte, dai baw amu galaw sha ai kaga ni yawng hpe shaga jahpawng la nna, “Manang ni e, ndai baw amu hte sha anhte ngamai nga ga ai gaw, nanhte nan chye nga myit dai.

²⁶Rai timung ya gaw, Ehpesu mare hta sha nrai sa, Asi mung ting ganoi rai hkra, ndai Pawlu ngu ai wa e, masha lata hte shachyaw ai baw Karai Kasang n re ai, nga nna masha law law hpe gunglau ai hte myit shayit kau ya manu ai, nanhte nan mu nga chye nga myit dai.

²⁷Dai rai nna, anhte a bungli hpoi mat na hpe tsang ra ai hta n-ga, galu kaba ai Hpara shayi Artemi a nawku htingnu gaw hpa n tai mat nna, Asi mung ting hte mungkan ting nawku ai Hpara shayi sha a hpung shingkang hpoi mat na mung, myit tsang shara rai nga ai,” ngu nna tsun mu ai.

²⁸Dai ga na jang, shanhte masin pawt bu shajang nna, “Ehpesu masha ni a Artemi she galu kaba ai law,” nga nna marawn ma ai.

²⁹Shing rai dai mare ting hpe woi kabrawng ai hte, Pawlu a manang, Makedoni masha Geu yan Aristarku hpe rim dun la nna, shanhte a poi wang de lang lata sha htim bang wa ma ai.

³⁰Pawlu mung dai masha hpawng de shang mayu nga ai, rai tim sape ni shi hpe hkum shadang mu ai.

³¹Shi a jinghku Asi poi up nkau mi mung, shi hpe poi wang de n shang u ga nga, masha shangun nna tsun dat mu ai.

³²Dai shawa hpawng chyawm gaw kashuk kashak rai nga ai rai nna, nkau mi baw kaga ga nga marawn bu ma ai; shanhte law malaw gaw tinang hpa majaw sa hpawng ai pyi, n chye ma ai.

³³Ya Yuda masha ni Alesandru hpe shadut mu ai rai nna, masha ni mung shi hpe dai shawa hpawng nna shalun dat mu ai. Alesandru mung shawa hpawng hpe ga tsun hparan kau we ga nga, lata dingsi nga ai.

³⁴Rai timung shi Yuda masha re ai chye jang, yawng hte ting, “Ehpesu masha ni a Artemi she galu kaba ai law,” nga nna lang lata hkying lahkawng daram na hkra marawn bu ma ai.

³⁵Ya, mare chyare wa dai shawa hpawng hpe jasim kau ngut jang, shi shanhte hpe, “Ehpesu masha ni e, Ehpesu masha ni a mare ndai, galu kaba ai Artemi a nawku htingnu hte Zeu hpara kaw na hkrat ai sumla, bau sin ai mare rai nga ai hpe, n chye ai, kadai wa nga nga a ta?

³⁶Dai lam ndang shara n nga ai majaw, nanhte atsin sha nga mai ai hte, sadi n dung ai amu gaw n galaw mai myit dai.

³⁷Shanhte gaw nawku htingnu hpya ya ai ni mung n rai, anhte a Hpara shayi hpe jahpoi ya ai ni mung n re ai mi, nanhte ndai ni hpe dun wa myit hka.

³⁸Demetri hte shi a janghkam manang ni, marai langai ngai hte mungga lama ma rawng yang gaw, tara rung ni hpaw nga ai, mung du ni mung nga ma ai; shanhte shada da tara dara sa hkat na ma dawng.

³⁹Lam gale lama ma tsun mayu yang chyawm gaw, mung bawng zuphpawng hta hparan na rai nga ai.

⁴⁰Dai ni kabrawng ai amu ndai hta, matu nhpang n nga ai majaw, anhte hta mara shagun na, tsang shara rai nga ai: ning re ai hpawng a lam hpe, hpa majaw hpawng ai ngu nna mung, anhte tsun dan shara n lu ga ai,” ngu nna tsun mu ai.

⁴¹Shing ngu nna dai shawa hpawng hpe shabra kau wu ai.