Read Jinghpaw Hanson Version Bible KASA 2 Bible Online

KASA 2 - Jinghpaw Hanson Version Bible bible

KASA 2

¹Ya Pentekoti shani du jang, shanhte nlang shara sha hta rau hpawng nga ma ai.

²Shaloi lamu de nna nbung laru kaba wa ai zawn, akajawng sha kadu pru nna, shanhte rawng nga ai nta ting hpring chyat rai wa ai.

³Bra karan ai wan shinglet zawn re ai mung, shanhte kaw dan pru nna, langai hte langai a ntsa e jung nga ai.

⁴Shanhte nlang hte mung, Chyoi pra ai Wenyi hpring shajang nna, Wenyi e shadut mu ai hte maren, ga amyu kaga ga hku shaga wa ma ai.

⁵Dai shaloi e sumsing lamu a npu e nga ai masha amyu shagu hta na, tara hkungga ai Yuda masha, Yerusalem mare e nga nga ma ai.

⁶Dai kadu ai nsen na ma yang, masha wunawng hpawng sa nna, langai hte langai tinang nang a buga ga hku chye na la ma ai majaw, shanhte mak mat ai rai nna,

⁷mau mahka let, “Yu mu, Ya shaga nga ai ndai ni yawng Galile masha hkrai n rai ma ni?

⁸Dai rai yang gaw, anhte langai hte langai tinang nang a buga ga hku na la lu ai gaw, kaning re ai i?

⁹Parhti, Medi, Elam mung na ni hte Mesopotamia mung e nga nga ai ni, Yuda hte Kapadokia mung, Pontu hte Asi,

¹⁰Hprugi hte Pamhpuli, Egutu hte Kureni ginwang hkan e nga ai Lebu mung na ni, Roma nna wa nga ai ni, ngu ai, Yuda masha hte proselutu,

¹¹Kreti hte Arabi mung na ni, anhte gaw, Karai Kasang a mauhpa amu magam lam shanhte hkai dan ai ga hpe, tinang a buga ga hku na la lu nga ga hka,” nga nna myit kahpra rai tsun ma ai.

¹²Yawng mayawng hte mung mau mahka let, “Ning nga ai gaw hpa wa i?” nga nna shada da ung ang san hkat ma ai.

¹³Rai timung nkau mi gaw, “Shanhte tsabyi nnan hkru nga ma ai,” nga nna tsun jahpoi ma ai.

¹⁴Shaloi Petru gaw sape shi langai ni hte rau rawt nna, nsen shaja let dai masha ni hpe tsun wu ai gaw, “Yuda mung na ni hte Yerusalem e nga nga ai ni nlang hte e, ndai lam nanhte chye na myit ga; nye a ga hpe mung madat la mu.

¹⁵Nanhte zawn nawn ai hku n rai; ndai ni tsabyi n nang ma ai: kaning rai nme law, ya e shani ahkying masum sha naw rai nga ai:

¹⁶ndai lam chyawm gaw, myihtoi Yoela tsun da ai lam rai nga ai. Shi tsun ai gaw,

¹⁷‘Karai Kasang ning nga ai: Hpang jahtum na nhtoi ni hta, Nye a Wenyi, ashan yawng a ntsa e ngai ru jaw nna, Nanhte a shayi shadang sha ni myihtoi htoi na mara ai. Nanhte a brang ram ni shingran mu nna, Nanhte a dingla ni yup mang mu na mara ai.

¹⁸Rai sa, dai nhtoi hte yang, nye a nchyang la ni hte, Nye a nchyang jan ni a ntsa e, Nye a Wenyi ngai ru jaw nna, shanhte myihtoi htoi na mara ai.

¹⁹Ntsa de sumsing lamu e mauhpa amu, Lawu na ga ntsa e, lamik kumla ngu ai, Asai, awan, nhkut salu hte hpe, ngai madun na nngai.

²⁰Galu kaba re ai hte dan hkung ai shani ngu ai, Dai madu a nhtoi, garai n du yang, Ajan hpe ningsin hte, Shata hpe asai hte, galai kau na ra ai.

²¹Dai shaloi e, shi Madu a mying ningsang hpe gang shaga ai masha kadai mung, Hkye hkrang la ai kaw du na mara ai,' nga ai.

²²Israela masha ni e, ga ndai madat la mu: Nanhte chye nga myit dai hte maren, Karai Kasang gaw Nazaret wa ngu ai Yesu a lata hte magam ningsam, mauhpa amu, lamik kumla re ai ni nanhte a man e madun dan let, Karai Kasang e nanhte kaw awlaw shadan ya ai hkrum wu ai:

²³ndai wa gaw, Karai Kasang shatawng ngut tawn sai hpaji hte, tau chye tau chyang ai lam hku ap kau hkrum wu yang, nanhte gaw, n tara ai masha a lata hte, shi hpe wudang hta jen sat kau myit dai:

²⁴rai timung, si hkrung si htan a nni, nkri hpe Karai Kasang raw kau ya nna, shi hpe jahkrung sharawt nu ai. Kaning rai nme law, dai nni nkri gaw shi hpe hkang shadang lu ai n rai.

²⁵Dai wa hpe lakap nna Dawi tsun ai gaw, ‘Dai Madu hpe nye a myi man chyaw ngai tut tut mu lu nga nngai; Ngai n shamu n shamawt u ga nga, Shi nye a hkra maga e nga nga ai.

²⁶Dai re ai majaw nye a myit masin kabu nga ai hte, nye a shinglet awng nga li ai; Nye a hkum shan mung myit mada ai kaw rai na ra ai;

²⁷Kaning rai nme law, nang nye a myit masin hpe katsan ga e kau da ya na n rai; Na a chyoi pra ai wa hten byak hkrum na, nang hkraw na n rai.

²⁸Asak hkrung ai lam nang ngai hpe madun nit dai; Na a myi man hte nang ngai hpe kabu gara ai hte jahpring ya na rin dai,’ nga ai.

²⁹Hpunau ni e, anhte wa daju Dawi gaw, nsa hkyet mat ai mung, lup kau ai hkrum ai mung, shi a lup gaw dai ni du hkra anhte hte rau nga nga ai gaw, ngai nanhte hpe tsun wam nga nngai.

³⁰Dai wa gaw myihtoi rai nga ai rai nna, shi a amyu matu hta na langai wa mi, shi a tingnyang hta dung nga lu na, nga nna, shi hpe Karai Kasang dagam shaka da ai hpe chye wu ai majaw,

³¹Hkristu a bai hkrung rawt wa na lam shi chye tau tawn ai rai nna, shi hpe katsan ga e n kau da na hte, shi a hkum shan hten byak n hkrum na lam, tsun da wu ai.

³²Dai Yesu hpe Karai Kasang jahkrung sharawt la wu ai; anhte yawng mung, dai lam a sakse ni rai nga ga ai.

³³Shing rai, Karai Kasang a hkra lata hte shagrau tawn nu ai rai nna, Chyoi pra ai Wenyi a lam, Kawa kaw na ga ndat lu la wu ai majaw, ya nanhte mu lu, na lu ai lam, shi ru jaw dat ru ai.

³⁴Kaning rai nme law, Dawi gaw sumsing lamu de lung wa sai n rai: shi nan she ning nga ai, ‘Shi Madu nye a Madu hpe tsun wu ai gaw,

³⁵Na a gumlau ni hpe, na a lagaw nhpang e, Lagaw kabye lahkum, ngai shatai kau ai du hkra, Nye a hkra maga de naw dung nga u,’ nga ai.

³⁶Dai re ai majaw, nanhte wudang hta jen da sat kau ai, dai Yesu hpe, Karai Kasang gaw Madu hte Hkristu shatai nu ai gaw, Israela amyu ting gaja wa chye nga myit ga law,” ngu nna tsun wu ai.

³⁷Dai na ma yang, shanhte myit hta hkra malu ai rai nna, shanhte gaw, “Hpunau ni e, anhte kaning rai na rai ta?” nga nna Petru hte kaga kasa ni hpe tsun ma ai.

³⁸Petru gaw, “Myit malai lu nna, nanhte a yubak raw dat kau ya u ga, nanhte hkum shagu Yesu Hkristu a mying ningsang hta baptisma hkam la mu; shaloi Chyoi pra ai Wenyi ngu ai kumhpa gaw, nanhte lu la na marin dai.

³⁹Kaning rai nme law, ga ndat dai gaw, shi Madu anhte a Karai Kasang shaga la na ni mahkra hte ngu ai, nanhte hte nanhte a nshu nsha ni hte mung, sumtsan ga e nga ai ni nlang hte mung, seng nga ai,” ngu nna shanhte hpe tsun dan mu ai.

⁴⁰Ga kaga law law hte mung shi sakse hkam nna, “Ndai myit magaw ai amyu hta na lawt pru myit ga law,” ngu nna shanhte hpe shadum jahprang wu ai.

⁴¹Ga dai hta la ai ni gaw baptisma hkam la shajang nna, dai shani e masha hkying masum dang jat bang wa ma ai.

⁴²Dai ni gaw kasa ni a sharin shaga ai lam, rau kanawn hpawng ai lam, muk ahkyep karan ai lam hte akyu hpyi ai lam hta, htep lahti hkan nga ma ai.

⁴³Masha nlang hte mung hkrit kang shajang ma ai: kasa ni a lata hta mung, mauhpa amu hte lamik kumla law law wa shapraw dan mu ai.

⁴⁴Kamsham ai ni nlang hte gaw, shara mi hta rau hpawng nna, arai yawng mayawng hpe jawm lang ma ai;

⁴⁵tinang a sut rai ni hpe mung, shanhte dut kau nna, kadai wa hpe mung n nga ai, ra ai shagu hpe karan jaw mu ai.

⁴⁶Shani shagu myit langai sha hte nawku Htingnu hta shanhte htep lahti machyu nga nna, tinang a nta e muk ahkyep karan nga yang,

⁴⁷Karai Kasang hpe shakawn kungdawn let, kabu gara ai hte myit tsup rai lusha shahpa sha ma ai; masha mahkra a man e mung myi man pa lu ma ai. Dai Madu mung, hkye hkrang la hkrum ai ni hpe, shani shagu shanhte hta jat wa shangun ya mu ai.