Read Jinghpaw Hanson Version Bible KASA 20 Bible Online

KASA 20 - Jinghpaw Hanson Version Bible bible

KASA 20

¹Ya dai kabring kabrawng lam sim mat ai hpang, Pawlu gaw sape ni hpe shaga la nna, shanhte hpe shadum jahprang ngut jang, shakram da nhtawm, Makedoni mung de sa wa na pru wa ai.

²Makedoni ginwang hkan e ga sa wa nna, law law wa shadum jahprang da ngut jang, Heleni mung de wa du ai.

³Dai yang shata masum nga nhtawm, Suri mung de li hte bai wa na hkyen yang, Yuda masha ni shi hpe gyam ma ai majaw, Makedoni mung hku nhtang wa na, myit da wu ai.

⁴Shaloi shi kaw hkan nang ai ni gaw, Beri mare na Puru a kasha Sopata; Htesaloni mare na Aristarku yan Sekundu; Derbe mare na Geu hte Timohti; Asi mung na Tuhkiku yan Trohpimu hte rai ma ai.

⁵Shanhte chyawm gaw shawng sa wa nna, Troa mare hta e anhte hpe sa la nga ma ai.

⁶Anhte mung Azuma poi lai ai hpang, Hpilipi mare na li jawn nna, manga ya e Troa mare de shanhte kaw du jang, dai yang e nhtoi sanit ya hkring nga ga ai.

⁷Ya nhtoi bat a langai ya ngu na shani e, muk ahkyep na matu anhte zuphpawng nga yang, Pawlu gaw hpang jahpawt pru na maw ai majaw, sape ni hpe sharin shaga let, yuptung tung hkra ga tsun galu nga ai.

⁸Dai anhte hpawng nga ai ntsa gawk hta e, pyengdin law law tu nga ai.

⁹Hkuwawt hku mahka e, Utuhku ngu ai shabrang langai mi yup nga dung nga ai; Pawlu ga naw tsun galu nga yang, dai wa yup malap mat wa ai hte, nta htap masum kaw na di hkrat nna, si mat sai hpe pawn sharawt da mu ai.

¹⁰Shaloi Pawlu yu wa nhtawm, dai wa ntsa e shi hkum mara ahpum let, “Hkum kashai myit, nsa naw rawng nga ai,” ngu mu ai.

¹¹Bai shi lung wa nna, muk ahkyep ai hte sha nhtawm, nhtoi htoi ai du hkra shanhte hte tsun chyai ngut jang, shi pru wa ai.

¹²Dai ma hpe mung, ahkrung nga ai hte shanhte woi wa nna, grai kabu gara nga ma ai.

¹³Anhte mahtang li de shawng sa wa magang nna, Asu mare e she Pawlu hpe hkap shajawn la na myit nna jawn sa wa ga ai: kaning rai nme law, Pawlu shi gaw hkarang hku sa wa na myit nna, dai hku hkang dat mi ai.

¹⁴Shing rai Asu mare e anhte hte hkrum jang, shi hpe shajawn la nhtawm, Mitulene mare de jawn sa wa ga ai.

¹⁵Dai kaw nna bai rawt ai gaw, hpang shani e anhte Kiu zunlawng makau hku lai wa nhtawm, dai hpang shani e Samu zunlawng de wa hkring nna, lani mi bai rai jang, Melitu mare de du ga ai.

¹⁶Kaning rai nme law Pawlu gaw, Pentekoti shani e Yerusalem mare de dep lu yang dep hkra nga tin da wu ai rai nna, Asi mung e nhtoi hkatum n shama mayu ai majaw, Ehpesu mare hpe lai kau da na, myit shatawng da wu ai.

¹⁷Ya Pawlu gaw Melitu mare na Ehpesu mare de masha shangun nna, Hpung na salang ni hpe shaga mu ai.

¹⁸Dai ni du jang, shi shanhte hpe tsun mu ai gaw, “Asi mung hta ngai nnan shang ai shani kaw nna, ngai nanhte hte tutnawng e kaning rai nga nga nngai mung;

¹⁹shi Madu a magam gun hpai ai hta nachying myit shanem nna, nep myi prwi hte, Yuda masha ni jahte tam ai a majaw ngai hta byin ai sharu shatsang hkam sha ai lam hpe mung;

²⁰nanhte a matu akyu rawng ai lam magup hpe n ginhtim da ai sha, shawa yawng a man e da, nta shagu hkan e da,

²¹Yuda masha hte Heleni masha hpe, Karai Kasang a man na myit malai lam hte, anhte a Madu Yesu a makam masham lam sakse hkam let, ngai shaja nga nngai gaw, nanhte nan chye nga myit dai.

²²Ya, yu mu, nye wenyi hta ngai gyit hkang ai hkrum nna, ngai hpa hkrum hpa hkra na n chye ai wa mi, Yerusalem de sa wa lu na rai nga ai:

²³rai timung, gyit hkang ai hte zingri zingrat na gaw ngai hpe la nga ai, nga nna, mare shagu hta Chyoi pra ai Wenyi ngai e sakse hkam nga ai.

²⁴Ngai chyawm gaw, nye a gat shadu ra ai lam hpe mung, Karai Kasang a chyeju kabu gara shiga lam sakse hkam na matu, Madu Yesu kaw na ngai lu la ai magam hpe mung, ngut hkra gun hpai lu na rai yang, nye asak hpe pyi lahpawt nngai n rai.

²⁵Ya bai yu mu, ndai mungdan lam ngai hkaw hkawm yang na hkrum kanawn yu ai ni, nanhte nlang, nye a myi man htawm hpang de bai n mu lu na manit dai, ngai chye nga nngai.

²⁶Dai majaw masha yawng a asai hte ngai lawt ni ai gaw, ngai dai ni nanhte hpe sakse hkam da made ai.

²⁷Kaning rai nme law, Karai Kasang a ra ai hku hte tup, nanhte hpe hkaw dan na, ngai ginhtim yu nngai n rai.

²⁸Karai Kasang gaw shi a sai hte mari la ai Hpung hpe yu lahku na matu, Chyoi pra ai Wenyi nanhte hpe Hpung up ni shatai manit dai majaw, nanhte gaw, tinang hkum dai hte, sagu hpung ting hpe, sadi sahka hte yu nga mu law.

²⁹Ngai pru ai hpang, Hpung hpe matsan n dum ai, n hkru ai chyahkyawn, nanhte hta shang na ra ai, ngai chye nga nngai:

³⁰dai hta kaga, nanhte hta na mung, sape ni hpe lau la lu hkra, shut ai hku tsun ai masha paw pru na ra ai.

³¹Dai re ai majaw, ngai nanhte mahkra hpe masum ning tup shani shana n sim n sa myi prwi hte shadum jahprang da ai hpe, dum nna a maja nga mu.

³²Ya gaw ngai nanhte hpe Karai Kasang kaw mung, shadaw shangang ya lu ai hte, shachyoi shapra lu la ai ni nlang hte rau, nanhte hpe Sali wunli jaw ya lu ai, shi a chyeju mungga hta mung, ap da masade ai.

³³Ngai gaw gade a aja gumhpraw hpun nba mung n marin yu nngai.

³⁴Lata ndai ni, ngai hkum hte ngai kaw hkan nang ai ni a ra ai lam magup galaw jaw ai lata rai li ai, nanhte nan chye nga myit dai.

³⁵Shing rai galaw shaja nna, gawng kya ai ni hpe shadaw mai ai lam mung, Hkam sha ai hta jaw ya ai mahtang grau a nga ai, nga nna Madu Yesu nan tsun ai ga dum ga, ngu nna mung, ngai lam shagu hta nanhte a ningli tai ni ai law,” ngu nna tsun mu ai.

³⁶Shing nga tsun ngut jang, shi lahput hput di nna, shanhte mahkra hte rau akyu hpyi nga ai.

³⁷Shanhte nlang ja ja hkrap ai hte, Pawlu a du ahpum let shi e pup mu ai.

³⁸Hpang de shi a myi man bai n mu lu na nga ai ga majaw, shanhte grau yawn ma ai. Li du hkra mung shi hpe hkan sa dat ma ai.