Read Jinghpaw Hanson Version Bible KASA 21 Bible Online

KASA 21 - Jinghpaw Hanson Version Bible bible

KASA 21

¹Ya anhte gaw shanhte hpe jahka kau da nna li jawn sa wa yang, Kusa zunlawng de ang ang rai wa nna, hpang shani e Rodo zunlawng de du ga ai; dai kaw nna Patara mare de du jang,

²Hpinisi mung de rap wa ai li mu nna, dai hta jawn sa wa ga ai.

³Ya Kupru zunlawng mu mada jang, de a hkra maga hku lai mat wa nhtawm, Suri mung de anhte jawn sa wa nna, hpaga rai jahkrat na matu, Turu mare hta sek ga ai.

⁴Dai yang na sape ni hpe tam mu nna, dai mare hta sanit ya hkring ga ai: dai sape ni mung Pawlu hpe, Yerusalem de n sa na lam, Wenyi hte tsun mu ai.

⁵Sanit ya nhtoi lai jang, anhte bai pru wa ga ai; shanhte mung, madu jan kasha ni hte rau, mare shinggan du hkra hkan sa dat ma ai rai nna, hka kau e hput di let, akyu hpyi ga ai: shing rai shada da shakram ngut jang,

⁶anhte li de shang nna, shanhte mung nta de bai wa ma ai.

⁷Bai Turu mare na anhte a li jawn lam htum nga yang, anhte Toleme mare de du ga ai; dai yang na hpunau ni hte shachyen nna, shanhte hte rau lani mi rau nga ga ai.

⁸Hpang shani e anhte bai pru nna, Kesare mare de du ga ai; shing rai sara sanit hta na, kabu gara shiga hkaw tsun ai wa Hpilip a nta e, anhte shang manam nga ga ai.

⁹Dai wa gaw myihtoi htoi ai shayi hkawn jet mali lu ai.

¹⁰Shi a nta e anhte tawng marang mi nga nga yang, Agabu ngu ai myihtoi langai mi, Yuda mung na sa du ai.

¹¹Dai wa anhte kaw shang nna Pawlu a shingkyit la nhtawm, shi dai dai shi a lagaw lata gyit nna, “Chyoi pra ai Wenyi ning nga tsun nga ai, Ndai shingkyit madu hpe Yuda masha ni Yerusalem mare e ning di gyit nna, maigan amyu ni a lata de ap kau na mara ai da,” nga nna tsun ai.

¹²Ga dai na jang, anhte hte dai yang na ni gaw, Yerusalem de n sa na lam shi hpe hpyi hkum gaw ai.

¹³Pawlu chyawm gaw, “Nanhte hpa rai hkrap ngu hkrap ngoi nga nna, nye myit hpe gawng run shangun ya nga myit ta? gyit hkang ai sha n-ga, Madu Yesu a amying ningsang majaw, Yerusalem e sa si hkam na pyi ngai jin jin rai nga nngai,” ngu nna htan shangap wu ai.

¹⁴Shing rai n shabai lu gaw yang, “Karai Kasang a myit rai nu ga,” ngu nna anhte mung atsin sha nga ga ai.

¹⁵Dai hpang anhte gaw arai shachyip la nna Yerusalem de lung wa ga ai.

¹⁶Kesare na sape nkau mi mung, anhte hte rau sa ma ai rai nna, anhte hpe manam hkap na wa, Kupru masha, Manason ngu ai shawng shawng na sape langai mi kaw sa bang da mi ai.

¹⁷Ya Yerusalem de du jang, hpunau ni anhte hpe kabu gara ai myit hte hkap la mi ai.

¹⁸Hpang shani e Pawlu anhte hte rau Yaku kaw shang nna, salang ni nlang mung hpawng nga ma la ai.

¹⁹Shanhte hte shachyen ngut jang, shi gun hpai ai amu majaw, Karai Kasang maigan amyu ni hta shabyin wa ai amu lam langai hte langai hkai dan mu ai.

²⁰Dai na jang shanhte mung Karai Kasang hpe shagrau sha-a ma ai: bai shanhte gaw Pawlu hpe, “Hpu wa e, Yuda masha hta na kamsham ai ni gade mun hkying law nga ma ai gaw, nang chye nga ndai; dai ni mahkra jep ai tara hta myit jung ai hkrai rai nga ma ai:

²¹rai timung, maigan amyu ni hta jahkran nga ai Yuda masha yawng hpe, tinang a kashu kasha ni e matu gadoi n jaw ra ai hte, tara htung hking n hkan nga na, nga nna Mawshe a tara kabai kau na hku nang sharin achyin ya ai da, nga ai ga dai ni nlang na ma masai.

²²Ya kaning rai na rai ta? Nang du ai gaw shanhte kaja wa na lu na masai.

²³Dai rai nna anhte tsun ai hte maren hkan galaw u: anhte kaw ga shaka da ai marai mali nga ma ai.

²⁴Dai ni hpe shaga la nna, shanhte hte rau nang hkum jasan jaseng u; shanhte baw shangun lu hkra hkungga jahpu shapraw ya u: shaloi she na a lam shanhte na ai shi n teng nga ai hte, nang hkum nan jep ai tara htung hking hkan shatsup ai wa rai nga ai gaw, masha nlang chye na na mara ai.

²⁵Kamsham ai maigan masha ni a lam chyawm gaw, shanhte sumla hpe nawng ai rai hte, asai, du manat sat ai shan, ndaw liknga lam koi gam na, anhte dawdan let ga shangun sagaw ai,” ngu nna tsun mu ai.

²⁶Dai re ai majaw Pawlu gaw dai la ni hpe shaga la nna, hpang shani e shanhte hte rau shi hkum jasan jaseng nhtawm, nawku Htingnu de shang nna, shanhte langai hte langai a matu hkungga jaw lu hkra, shanhte a jasan jaseng nhtoi gu sai lam sa tsun dan mu ai.

²⁷Ya dai nhtoi sanit gu magang yang, Asi mung na Yuda masha ni nawku Htingnu e Pawlu hpe mu jang, shawa masha ni hpe myit sharawt nna, shi e rim la let, “Israela masha ni e, karum marit;

²⁸ndai wa gaw shara shagu hkan e yawng mayawng hpe anhte a amyu hte jep ai tara hpe mung, ndai shara hpe mung, nhtan shai ai hku sharin achyin ai wa re ai law; dai hta n-ga, nawku Htingnu hta Heleni masha jashawn nna, ndai chyoi pra ai shara hpe awu asin di kau nu ai law,” nga nna jahtau ma ai.

²⁹Hpa majaw law nga yang, Trohpimu ngu ai Ehpesu masha langai mi hpe, mare e Pawlu hte rau shanhte mu manu ai rai nna, dai wa hpe nawku Htingnu de jashawn nu ai, nga nna myit ma ai.

³⁰Mare ting kabring kabrawng rai nna, shawa masha ni gat ginbawm bang wa ma ai; shanhte Pawlu hpe ahkyit karawt la nhtawm, Htingnu shinggan de shapraw la nna, chyinghka ni hpe alawan la da ma ai.

³¹Shing rai Pawlu hpe sat kau na maw nga ma yang, Yerusalem mare ting kabrawng nga ai, nga nna hpyen dap up ai bu kaba kaw ga hkawn pru ai.

³²Shaloi jang hpyen ma hte hpyen du shaga la nna, shanhte hpang de gat bang wa ai: shanhte chyawm gaw hpyen du kaba hte hpyen ma ni hpe mu jang, Pawlu hpe kayat ai, da kau mu ai.

³³Shaloi hpyen du kaba sit sa nna, Pawlu hpe dun la nhtawm, hpri sumri lahkawng hte gyit na hkang da mu ai: shi kadai re ai, hpa shut ai mung, san yu wu ai.

³⁴Shawa masha ni chyawm gaw, nkau mi kaga ga nga nna jahtau bu ma ai hte, nau garu ai majaw, atsawm sha n chye lu wu yang, Pawlu hpe hpyen wang de jashawn na hkang da wu ai.

³⁵Lakang nhpang du jang, shawa masha ni nau anin ai majaw, hpyen ma ni shi e pawn lung wa mu ai.

³⁶kaning rai nme law, shawa masha ni mahtang, “Sa sat kau mu,” nga nna ahkan jahtau nang nga ma ai.

³⁷Ya hpyen wang de Pawlu hpe jashawn na ningtawn e, Pawlu gaw hpyen du kaba wa hpe, “Nang hpe ga hkaw mi tsun lu na a ni?” ngu nna san wu yang, hpyen du kaba gaw, “Nang Heleni ga chye n ni?

³⁸Dai rai yang, shawng de lang mi gumlau rawt nna, nam mali hkan e damya hkying mali hpe woi ginrawn hkawm ai Egutu masha nang n rai n ni?” ngu nna san wu ai.

³⁹Pawlu chyawm gaw, “ngai Kiliki mung na, Tarshu mare Yuda masha rai nga nngai; ngai nga ai mare gaw kaji kashan sha n rai li ai: ndai masha ni hpe ga tsun lu na ahkang jaw e,” ngu nna hpyi nem wu ai.

⁴⁰Shi hpe ahkang jaw jang, Pawlu gaw lakang baw e tsap let, lata dingsi nga ai: shanhte a katsi sha rai jang, Hebre ga hte shanhte hpe tsun wu ai gaw,