Read Jinghpaw Hanson Version Bible KASA 22 Bible Online

KASA 22 - Jinghpaw Hanson Version Bible bible

KASA 22

¹“Hpunau ni hte Wa ni e, nanhte a man e ngai mara raw ai ga, madat mara ya mi,” ngu wu ai.

²Hebre ga hte shanhte hpe tsun ai na jang, grau nna tsin nga ma ai: shaloi shi gaw,

³“Ngai gaw Kiliki mung, Tarshu mare e shangai ai Yuda masha rai nga nngai; rai timung, ndai mare hta Gamale a lagaw nhpang e ngai kaba wa nna, anhte a ji wa ni a ja la ai jep ai tara htung hking hte maren azin ayang sharin achyin la nna, dai ni na nanhte zawn, ngai mung, Karai Kasang hpang maga myit kaba ai hte,

⁴numsha lasha hpe gyit hkang sharen nna, htawng hta bang kau let, ndai lam hpe sat kau ai du hkra, zingri zingrat yu ni ai.

⁵Hkinjawng agyi wa hte salang hpung ting mung, nye a sakse ni rai nga ma ai; shanhte kaw na laika, hpunau ni a matu ngai lu la nna, Damasku mare e nga ai ni hpe mung, ari jahkrum na matu, Yerusalem de gyit dun wa n ga, ngu nna Damasku de ngai lung wa nngai.

⁶Shing rai ngai sa wa nna, Damasku mare de du magang yang, jan pungding madi ai hpawa e, lamu de nna nhtoi kaba nye a grup yin e akajawng sha htoi tu pru ai.

⁷Ga de ngai kadawng taw nna, shaga pru ai nsen mung, ‘Shawlu, Shawlu, nang ngai hpe hpa rai zingri nga n ta?’ nga ai, nga na nngai.

⁸Ngai mung, ‘Madu e, nang kadai rai nga n ta?’ ngu nna htan we yang, Shi gaw, ‘Nang zingri zingrat ai Nazaret na Yesu rai nga nngai,’ nga ai.

⁹Ngai hte rau sa ai ni chyawm gaw, nhtoi mu ma timung, ngai e tsun ai wa a nsen n na ma ai.

¹⁰Bai ngai gaw, ‘Madu e, ngai hpa galaw na rai ta?’ ngu we ai. Shaloi Madu gaw, ‘Rawt u, Damasku de sa wa su; na a matu san da ai lam nlang, dai yang e nang hpe tsun dan na ra ai,’ nga nna ngai e bai tsun ai.

¹¹Dai htoi kabrim ai shingkang a majaw ngai myi nmu mat yang, ngai kaw hkan nang ai ni nye a lata dun let, Damasku mare de ngai shang wa nngai.

¹²Shing rai, jep ai tara hku tara hkungga nna, dai yang e nga ai Yuda masha ni mahkra man e myi man pa ai Anani ngu ai wa,

¹³ngai kaw sa nna, nye a makau e tsap let, ‘Ngai nau wa Shawlu e, na myi mu lit ga law,’ nga nna tsun ai. Shaloi jang ngai shi hpe mu mada lu nngai.

¹⁴Bai shi gaw, ‘Anhte a ji wa ni a Karai Kasang gaw, nang hpe shi a myit mang ai lam shachye u ga, nga nna mung, Dingman ai Madu hpe mu lu na hte shi a n-gup na mungga na la lu u ga, nga nna mung, nang hpe san da nit dai.

¹⁵Kaning rai nme law, nang mu la, na la lu ai lam hpe, masha yawng a man e shi a matu sakse hkam ya ai wa, nang tai na rin dai.

¹⁶Ya hpa rai ganung nga n ta? rawt u, Shi a amying ningsang hpe gang shaga let baptisma hkam la nna, na yubak kashin kamun kau u,’ ngu nngai.

¹⁷Dai hpang Yerusalem mare de ngai bai du wa nna, nawku Htingnu e akyu hpyi nga yang, ngai myit nawng mat wa ai hta,

¹⁸‘Yerusalem na alawan pru wa u; nye a lam nang hkam na sakse ga, shanhte n hkap la na ma ai,’ nga nna shi Madu ngai hpe tsun ai, ngai mu nngai.

¹⁹Shaloi ngai gaw, ‘Madu e, nang hpe kamsham ai ni e ngai htawng e bang da ai hte tara jawng shagu hkan e anu kau ai gaw, shanhte nan chye nga ma ai:

²⁰na a sakse Stehpan a asai ru kau ma ai shaloi mung ngai nan makau e tsap nna, dai lam myit hkrum lawm let, shi hpe sat kau ai ni a hpun palawng hpe sin ya nngai,’ ngu we ai.

²¹Shi chyawm gaw, ‘Pru wa su; ngai nang hpe maigan masha ni nga ai sumtsan ga de shangun na de ai,’ nga nna tsun ai,” ngu nna tsun mu ai.

²²Dai kaw du hkra shanhte shi a ga madat nhtawm, “Dai zawn re ai wa hpe ga ntsa na tsan kau mu; shi hkrung nga n-ging nu ai,” nga nna marawn ma ai.

²³Shing nga marawn let, tinang a hpun palawng raw kabai kau ai hte, ga nhpu kabai shamawng nga ma yang,

²⁴hpyen du kaba wa gaw, Pawlu hpe hpyen wang de jashawn la nhtawm, “shi a lam hpa majaw ning nga marawn bu ai, chye lu hkra, anu sharim nna san akrawk yu mu,” ngu nna hkang dat mu ai.

²⁵Shanhpyi sumri hte shi hpe gang jen mu yang, Pawlu gaw makau e tsap nga ai hpyen du wa hpe, “Taw, Roma masha rai nga ai wa hpe, garai n jeyang ngut yang, nanhte kayat sharim mai a ni?” ngu wu ai.

²⁶Hpyen du wa dai na jang, hpyen du kaba kaw wa nna, “Nang hpa galaw maw nga n ta? dai wa gaw Roma masha rai nga ai,” ngu nna shi hpe shana ya wu ai.

²⁷Hpyen du kaba mung Pawlu hpang de sa nna, “Nang Roma masha rai ndai da aw? ngai e tsun rit,” ngu wu ai. Shi gaw, “Rai nga nngai,” ngu nna htan wu ai.

²⁸Bai hpyen du kaba gaw, “Ngai Roma masha tai lu na ahkang, manu kaba hte she lu la nngai,” ngu nna htan wu yang, Pawlu gaw, “Ngai chyawm gaw, Roma masha tai chyalu shangai ai wa rai nngai,” ngu wu ai.

²⁹Shaloi jang, shi hpe san akrawk yu na nga ai ni, shi kaw na wa mat ma ai; hpyen du kaba wa mung, Pawlu Roma masha re ai chye jang, shi hpe gyit shut wu ai majaw, hkrit kau wu ai.

³⁰Hpang jahpawt e, Yuda masha ni Pawlu hpe shagun ai mara hpa re ai, teng teng chye lu hkra, shi hpe raw dat nna, hkinjawng agyi ni hte salang bawng ting hpe shaga jahpawng tawn nhtawm, Pawlu hpe shanhte a ka-ang e jashawn ya wu ai.