Read Jinghpaw Hanson Version Bible KASA 23 Bible Online

KASA 23 - Jinghpaw Hanson Version Bible bible

KASA 23

¹Shaloi Pawlu gaw dai salang bawng hpe azi yu da let, “Hpunau ni e, dai ni du hkra Karai Kasang a man e, hkum tsup ai myit mang hte ngai hkan sa ni ai,” ngu mu ai.

²Dai rai nna, hkinjawng agyi Anani gaw, “shi a n-gup bye ya mu,” nga nna makau e tsap nga ai ni hpe tsun mu ai.

³Shaloi Pawlu gaw, “Htun hpraw chya ai shakum e, Karai Kasang nang hpe mahtang bye na ndai: tara hku hte maren ngai hpe jeyang na she nang nang e dung nhtawm me, tara hte nhtan shai ai hku ngai hpe bye na hkang dat n ni?” ngu wu ai.

⁴Makau e tsap nga ai ni mung, “Nang Karai Kasang a hkinjawng agyi wa hpe roi lu n ni?” nga nna jet ma ai.

⁵Pawlu gaw, “Hpunau ni e, shi hkinjawng agyi re ai ngai n chye nna rai sai; ‘na amyu ntsa e up ai wa hpe roi lu na n rai,’ nga nna ka da nga ai,” nga nna bai yin wu ai.

⁶Dai hpawng nga ai ni hta nkau mi Saduke, nkau mi Hparishe rai nga ma ai hpe Pawlu chye da wu ai majaw, dai salang bawng hpe, “Hpunau ni e, ngai gaw Hparishe rai nga nngai; Hparishe kasha mung rai nga nngai; si ai ni bai hkrung rawt na myit mada ai lam majaw, ngai jeyang hkrum nga nngai,” ngu nna jahtau dat wu ai.

⁷Dai hku tsun dat yang, Hparishe ni hte Saduke ni shada da ndang hkat ma ai rai nna, shawa hpawng gaw myit shai shajang mat ma ai.

⁸Kaning rai nme law, Saduke ni mahtang, ‘hkrung rawt ngu ai n nga ai, lamu kasa hte wenyi mung n nga ai,’ nga nna tsun ma ai; Hparishe ni chyawm gaw dai lam lahkawng nga ai, kam ma ai.

⁹Dai rai nna grai wa tsun garu bu nga ma ai; shaloi Hparishe hpung na laika ka ai sara ni nkau mi rawt nna, “Ndai wa hta hpa mara mung anhte n mu ga ai; Wenyi, shing n rai, lamu kasa langai mi shi hte ga tsun ai rai yang, hpa re hka, “--nga nna tsun hkat bu ma ai.

¹⁰Shing rai nau wa dangrang hkat wa jang, shanhte Pawlu hpe ashep ashin di kau na, hpyen du kaba tsang ai majaw, shanhte kaw yu wa nna, Pawlu hpe dai ni a ka-ang na kare la nhtawm, hpyen wang de jashawn la na, hpyen ma ni hpe hkang dat mu ai.

¹¹Dai shana Madu gaw shi a makau e tsap pru nna, “Myit hkum ru et; nang nye a lam Yerusalem mare hta sakse hkam nit dai hte maren, Roma mare hta mung naw hkam lu na ndai,” ngu nna tsun wu ai.

¹²Ya nhtoi htoi yang Yuda masha ni jawm hpawng nna, “Pawlu hpe garai n sat lu lu gaw, hpa mung n lu n sha na ga ai,” nga nna tinang hkum dai dagam shaka ma ai.

¹³Shing nga bawng ai ni marai mali shi jan rai nga ma ai.

¹⁴Shanhte gaw hkinjawng ni hte salang ni hpang de sa nna, “Pawlu hpe garai n sat lu lu gaw, hpa mung n chyim yu na, ngu nna anhte grai ngu dagam shaka tawn sagaw ai.

¹⁵Dai re ai majaw, nanhte madu ni dai salang bawng hte rau, Pawlu a lam atsawm sha naw san yu mayu ai, ngu nna nanhte hpang de shi hpe shaga la na matu, hpyen du kaba wa hpe hpyi dat mu; shaloi anhte gaw, shi garai n du yang lam lapran e shi hpe sat na jin jin rai nga na ga ai,” ngu mu ai.

¹⁶Shing rai, hkap lagyim la na lam hpe, Pawlu a kahkri wa na nna, hpyen wang de shang nhtawm Pawlu hpe sa tsun dan wu ai.

¹⁷Pawlu mung, hpyen du langai mi hpe shaga la nna, “Ndai ma hpe hpyen du kaba wa hpang de woi wa ya e: shi lama mi tsun mayu ai da,” ngu dat wu ai.

¹⁸Hpyen du wa mung shi hpe woi sa wa nna, hpyen du kaba wa kaw woi shang nhtawm, “Ndai ma nang hpe tsun ai ga lama mi rawng ai majaw, shi e nang kaw woi sa na, bawng dung wa Pawlu ngai hpe shaga la nna hpyi dat nngai,” ngu wu ai.

¹⁹Shaloi hpyen du kaba gaw shi a lata dun nna, shim ai shara de shi e woi bang nhtawm, “Nang ngai hpe hpa tsun mayu n ta?” ngu nna lagyim san yu wu ai.

²⁰Shaloi dai ma gaw, “Pawlu hpe atsawm sha naw san yu na zawn di nna, salang bawng de hpawt ni e woi la na matu, nang kaw hpyi na, nga nna Yuda masha ni myit hkrum masai.

²¹Dai rai nna shanhte ra ai hku hkum hkraw ya et; Pawlu hpe garai n sat lu lu gaw, hpa mung n lu n sha, nga nna tinang hkum dai dagam shaka ai marai mali shi jan, shi hpe hkap rim na makoi nga na ma ai; ya pyi, na a ahkang ala let, ndai amu galaw na shanhte jin jin rai nga masai,” ngu wu ai.

²²Shaloi hpyen du kaba gaw, dai ma hpe, “Ndai lam nang ngai e sa tsun ndai, kadai hpe mung hkum tsun et,” nga nna ginhtim ngut jang dat dat wu ai.

²³Bai shi gaw, hpyen du lahkawng shaga la nna, “Dai na ahkying masum hta Kesare mare de sa wa na, hpyen ma ni tsa, gumra jawn ai sanit shi, ri lang ai ni tsa hte hpe shajin tawn mu,” ngu wu ai:

²⁴dai hta kaga, Pawlu hpe munggyi Hpilik hpang de ashim sha sa dat lu hkra, Pawlu jawn na gumra byau ya na mung hkang dat wu ai.

²⁵Laika mung ning ngu ka shagun dat wu ai:

²⁶“Klawdi Lusi gaw, grau htum ai munggyi Hpilik hpe ngwipyaw ga shana dat nngai.

²⁷Ndai wa hpe Yuda masha ni rim la nna, shi hpe sat na maw ma yang, hpyen masha ni hte ngai sa nna, shi Roma masha re ai chye we ai majaw, shanhte kaw na kare la we ai.

²⁸Shing rai, shi hpe shagun ai mara chye ya mayu we ai majaw, shanhte a salang bawng hta jashawn ya yu yang,

²⁹shanhte a tara hte seng ai lam sha mara shagun mu ai; si ging ai mara, sharen ging ai mara lama mi muk n nga lu ai, ngai chye we ai.

³⁰Ndai wa hpe sat kau na, hpaji daw ai lam ngai hpe shana ma ai majaw, shaloi jang ngai shi hpe nang hpang de sa kau dat nna, shi e mara shagun mayu ai ni mung, na a man e sa shagun hkat na hku, hkang dat mawe ai,” nga ai.

³¹Shing rai, hkang dat ai hte maren hpyen ma ni mung Pawlu hpe woi nna, Antipatri du hkra shana e sa sa dat mu ai.

³²Hpang jahpawt e, gumra hpyen ni hpe bai sa shadu shangun nhtawm, shanhte hpyen wang de bai wa ma ai:

³³gumra hpyen ni mung Kesare mare de du nna, munggyi wa hpe laika ya da nhtawm, Pawlu hpe mung shi a man e jashawn mu ai.

³⁴Shaloi laika dai hti ngut jang, Pawlu gara mung na re ai san yu nna, Kiliki mung na re ai chye jang,

³⁵Munggyi wa gaw, “Nang hpe mara shagun ai ni du jang she, na amu ngai sagawn yu na nngai,” nga nna tsun nhtawm, Pawlu hpe Herod a htingnu hta rawng da na, hkang dat wu ai.