Read Jinghpaw Hanson Version Bible KASA 24 Bible Online

KASA 24 - Jinghpaw Hanson Version Bible bible

KASA 24

¹Dai hpang manga ya rai jang, hkinjawng agyi Anani gaw, salang ni nkau mi hte rau, Tertulu ngu ai bawmung wa langai mi hpe woi sa wa nna, shanhte gaw munggyi wa kaw Pawlu a lam sa tsun ma ai. Shaloi Pawlu hpe shaga tawn ya jang, Tertulu mara shagun ai ga tsun hpaw wu ai gaw,

²“Grau htum ai Hpilik e, anhte gaw na a marang e nachying nga ngwi nga pyaw nga ga ai hte, na a chye up chye hkang ai hta, ndai amyu a matu mung ding mung chying lam rai wa sai majaw,

³anhte dai hpe lam magup hta shara shagu hkan e, chyeju dum ai myit hte hkam sha nga ga ai.

⁴Rai timung, ngai nang hpe nau wa n shapu ai sha, ga gadun hte anhte tsun na lam hkaw mi, na myit galu kaba hte naw madat ya na, ngai hpyi nngai law.

⁵Ndai wa gaw n hkru n hkra re ai hte, mungkan ting na Yuda masha ni nlang hpe gumlau sharawt nna, dai Nazaret hpung a agyi kaba rai nga ai gaw, anhte mu gaw ai:

⁶dai hta kaga, shi gaw nawku Htingnu hpe awu asin di na mung maw nga ai: dai majaw anhte shi hpe rim la gaw ai:

⁸shi hpe nang san yu jang, anhte shi e shagun ai mara lam yawng teng nga ai gaw, nang chye lu na ndai,” ngu wu ai.

⁹Yuda masha ni mung, “dai hku re ai,” nga nna jawm tsun lawm ma ai.

¹⁰Munggyi wa lata dingsi nna, ga tsun na ahkang jaw wu yang, Pawlu gaw, “Nang madu tsawmra ning na hkra ndai amyu a ntsa e tara agyi tai yu nit dai, ngai chye nngai majaw, nye a mara raw ai ga hpe kabu gara ai myit hte ngai tsun we ga:

¹¹Yerusalem de nawku na matu ngai lung wa ai, nhtoi shi lahkawng ya garai n jan ai gaw, nang chye ya lu ndai.

¹²Nawku Htingnu hte tara jawng hkan, mare kata hkan, kadai hte dangrang hkat ai mung, hpawng shingra hpe woi kabrawng ai mung, shanhte n mu ma ai.

¹³Ya shanhte ngai e shagun ai mara lam ni hta, nang hpe sakse pyi n madun lu ma ai.

¹⁴Rai timung, lam mi chyawm gaw nang hpe shapraw dan de ga; Jep ai tara lam shagu hte myihtoi ni a laika hta ka da ai hku yawng mayawng kamsham let, shanhte hka bra Lam ngu nna shamying ai htung hku hkan nna, ngai ji wa ni a Karai Kasang hpe nawku nga nngai:

¹⁵shanhte myit mada ai hte maren, ngai mung, dingman ai ni hte n ding n man ai ni a matu, bai hkrung rawt wa na lam nga ai, ngu nna Karai Kasang hta myit mada nga nngai.

¹⁶Dai rai nna, Karai Kasang a man e mung, masha a man e mung, ra n rawng ai sha tutnawng myit mang san pra nga lu hkra, a shaja nga nngai.

¹⁷Shing rai, tsawmra ning lai wa ai hpang, nye amyu masha ni kaw, majaw maya kumhpa hte shawang alu wa jaw na ngai wa nngai:

¹⁸shaloi e, ngai kanang na shawa hpawng mi rau n nga ai, hpa kabring kabrawng mung n rai ma ai; nawku Htingnu e nye hkum jasan jaseng nga ai hpe sha, ngai hpe mu ma ai; rai timung, Asi mung na Yuda masha nkau mi nga nga ai rai nna,

¹⁹dai ni gaw, ngai hta mara lama ma shagun shara rawng yang gaw, nang kaw sa tsun mai ma ai.

²⁰Shing n rai, dai salang bawng a man e ngai tsap nga yang, Si ai ni a bai hkrung rawt wa ai lam a majaw, dai ni nanhte ngai hpe jeyang nga myit dai,

²¹ngu nna, shanhte a ka-ang e ngai jahtau ai ga hta kaga, ngai hta hpa mara naw mu da mi yang gaw, ndai ni shanhte hkum nan tsun dan mu ga,” ngu nna tsun wu ai.

²²Hpilik shi mahtang, dai tara lam grau chye da nhtawm, “hpyen du kaba Lusi du jang she, ngai nanhte a amu dawdan na nngai,” ngu nna shanhte hpe jahkring kau mu ai.

²³Pawlu hpe mung majoi naw a sin tawn da nna, shi a jinghku jing-yu ni kadai sa galaw jaw mayu yang, galaw jaw shangun mu, ngu nna hpyen du wa hpe hkang da wu ai.

²⁴Dai hpang gade ya garai n na yang, Hpilik gaw, Yuda num Drusila ngu ai madu jan hte sa nna, Pawlu hpe shaga la nhtawm, Hkristu Yesu a makam masham lam tsun dan ai madat la wu ai.

²⁵Pawlu gaw dinghpring ai lam, tinang hkum hkang ai lam hte du magang ra ai tara dara ai lam shapraw dan wu yang, Hpilik kajawng nna, “Ya naw wa su, ngai rau jang me nang hpe shaga na de ai,” ngu wu ai.

²⁶Shi chyawm gaw, Pawlu gumhpraw jaw na ra ai nhten, nga myit nna, law law lang shi hpe shaga chyai wu ai.

²⁷Shing rai ni ning ladu hkrum jang, Hpilik a aya hta Porku Hpestu galai ai rai nna, Hpilik gaw Yuda masha ni a myi man shapa mayu ai majaw, Pawlu hpe sharen da let naw tawn da wu ai.