Read Jinghpaw Hanson Version Bible KASA 25 Bible Online

KASA 25 - Jinghpaw Hanson Version Bible bible

KASA 25

¹Ya Hpestu dai mungdaw hta shang ai masum ya rai yang, Kesare mare kaw nna Yerusalem de lung wa ai.

²Shaloi hkinjawng agyi ni hte Yuda masha ni a agyi salang ni, Pawlu a lam shi hpe sa tsun nna,

³Pawlu hpe lam e hkap gyam sat kau lu hkra maw ai myit hte, shi hpe Yerusalem mare de sa dat ya na lam, chyeju hkap hpyi mu ai.

⁴Rai timung Hpestu gaw, Pawlu hpe Kesare mare e she sharen tawn nga ai rai nna, gade n na yang shi mung dai de bai wa na rai nga ai majaw,

⁵“Nanhte hta na ahkang lu ai ni ngai hte rau yu wa nna, dai wa hta mara lama ma rawng yang gaw, sa shagun mu,” ngu nna htan dat mu ai.

⁶Shing rai shanhte kaw nhtoi matsat ya, shi ya daram hkring nga nhtawm, shi Kesare mare de bai yu wa nna, hpang shani e tara tingnyang hta dung let, Pawlu hpe shaga na hkang dat wu ai.

⁷Shi du jang, Yerusalem na yu wa ai Yuda masha ni gaw Pawlu a grup yin e tsap nna, sakse n madun lu ai mara kaba law law wa shi a ntsa e shagun mu ai.

⁸Pawlu chyawm gaw, “Yuda masha ni a jep ai tara hpe mung, nawku Htingnu hpe mung, hkawhkam Kehta hpe mung, ngai hpa n shut n hpyit yu nngai,” ngu nna mara raw ga tsun nga ai.

⁹Rai timung Hpestu gaw, Yuda masha ni kaw myi man pa mayu nna, Pawlu hpe, “Nang Yerusalem mare de lung wa nna, dai yang e nye a man e ndai amu lam dawdan hkam na, nang hkraw nga n ni?” ngu nna shi hpe san wu ai.

¹⁰Pawlu chyawm gaw, “Hkawhkam Kehta a tara tingnyang man e ning ya tsap nga nngai; dawdan ai rai yang, nang e dawdan mi: nang madu atsawm sha chye nga ai hte maren, Yuda masha ni hpe ngai kachyi mi muk shut ai n rai.

¹¹Ngai shut hpyit tawt lai ai wa rai nna, si ging ai mara lama ma galaw kau ai rai yang gaw, si hkam na lam ngai ndang ai n rai: rai timung, ndai ni shagun ai mara langai mi muk n teng yang gaw, shanhte a lata de ngai hpe kadai wa ap kau lu na n rai. Hkawhkam Kehta kaw du na nngai,” ngu nna htan wu ai.

¹²Shaloi Hpestu gaw, salang bawng hte bawng ngut jang, “Nang Kehta kaw du na nga nit dai: Kehta hpang de sa lu na re ai,” ngu nna htan wu ai.

¹³Dai hpang nhtoi gade n na yang, hkawhkam Agripa Yan Bernike hte Kesare mare de du nna Hpestu hpe sa shachyen ma ai.

¹⁴Dai yang e tsawmra wa na hkra nga nga sayang, Hpestu dai hkawhkam hpe Pawlu a lam tsun dan wu ai gaw, “Hpilik sharen da nga la ai bawng langai mi nga ai;

¹⁵ngai Yerusalem de nga nga yang, hkinjawng agyi ni hte Yuda salang ni, dai wa a lam sa tsun nna, ngai shi a lam dawdan ya na hkap hpyi ma ai.

¹⁶Ngai chyawm gaw, Mara shagun hkrum ai wa, mara shagun ai ni hte myi man chyaw dara hkat nna, mara raw ai ga garai n tsun lu yang, kadai hpe ap kau na lam mung, Roma masha ni a htung n nga ai, ngu nna shanhte hpe tsun da mawe ai.

¹⁷Dai rai nna shanhte nang e zuphpawng nga ma yang, ngai mung n hkring ai sha, hpang shani jang tara tingnyang e dung nna, dai wa hpe woi wa ya na hkang dat we ai.

¹⁸Shaloi shanhte dai wa hpe mara tsun bun ma yang, ngai zawn nawn ai mara lama mi muk n shagun tawn mu ai;

¹⁹shanhte a nawku htung lam hte, si mat sai, Yesu ngu ai wa langai mi a lam sha, shi hte dangrang hkat ma ai; dai Yesu gaw naw hkrung nga ai, nga nna Pawlu a tsun nga ai.

²⁰Dai lam hpe kaning di sagawn na n chye we ai majaw, Yerusalem mare e dai lam dawdan sa hkam na hkraw n hkraw ai, shi hpe san yu yang,

²¹Pawlu mahtang, Hkawseng kaba kaw she du na nga hpyi ai majaw, Kehta kaw garai n sa dat lu ai laman e, shi hpe naw sin da na, ngai hkang dat we ai,” ngu nna tsun dan wu ai.

²²Shaloi Agripa gaw Hpestu hpe, “Ngai mung dai wa a ga na mayu nngai,” ngu wu yang, “Hpawt de na lu na re ai,” ngu nna htan wu ai.

²³Hpang shani e Agripa yan Bernike gaw, amawn asam rai shingkang dat nna, hpyen du kaba ni hte mare na agyi salang ni hte rau sa nna, rung gawk e shang du ma yang, Hpestu hkang dat jang, Pawlu hpe jashawn dat mu ai.

²⁴Shaloi Hpestu tsun wu ai gaw, “Hkawhkam wa Agripa hte ya nang e hpawng nga ai ni nlang hte e, Yerusalem mare hte ndai mare na Yuda masha yawng, ngai kaw sa tsun nna, Dai wa hpe naw jahkrung da n mai sai, nga nna jahtau bu ai gaw, ya nanhte mu ai ndai wa hpe rai nga ai.

²⁵Rai timung, ndai wa hta sat ging ai mara hpa mung ngai n mu we ai: shi mahtang, Hkawseng kaw du na hpyi ai majaw, sa dat na ngai myit da se ai.

²⁶Sa dat nga yang mung, nye a Madu hpang de shi a lam azin ayang ka shana dat na mi, n rawng lu ai. Dai rai nna, dai wa hpe manaw yu ngut yang, ka dat lu na ga langai ngai ngai mu lu hkra, nanhte a man e mung, grau nna nang hkawhkam Agripa man e mung, ngai shi hpe shapraw dan de ai.

²⁷Kaning rai nme law, bawng langai mi sa dat yang, shi hpe shagun ai mara n madun dat ai gaw, n jaw ai, ngu nna ngai myit nngai,” ngu mu ai.