Read Jinghpaw Hanson Version Bible KASA 26 Bible Online

KASA 26 - Jinghpaw Hanson Version Bible bible

KASA 26

¹Shaloi Agripa gaw Pawlu hpe, “Na a lam tsun na ahkang rai nga ai,” ngu wu ai. Dai rai nna Pawlu lata ladawn let mara raw ai ga tsun wu ai gaw:

²“Hkawhkam Agripa e, Yuda masha ni a htung hking lam hte dangrang hkat ai lam magup hpe nang chye grau ai wa rai nga ndai majaw;

³Yuda masha ni ngai hpe shagun ai mara lam shagu hpe, dai ni na a man e mara raw ga tsun lu ai gaw, ngai hta a nga sai, ngu nna myit nga nngai law: dai rai nna, myit galu kaba ai hte ngai e madat mara ya na, ngai hpyi nem nngai.

⁴Shawng nnan, nye a brang ram prat kaw nna, nye a amyu hta mung, Yerusalem mare hta mung, ngai hkan nang ai arawn alai, Yuda masha ni nlang chye chyalu rai ma ai.

⁵Moi nna nye a lam chye ma ai majaw, anhte a nawku htung na ja grau ai Hparishe ngu ai hpung hta ngai lawm nga nngai gaw, shanhte sakse hkam mayu yang, hkam lu ma ai.

⁶Rai timung, ya, Karai Kasang gaw ji wa ni hpe jaw da ai ga ndat na myit mada lam majaw, dawdan ai hkam sha na, ngai nang e tsap nga nngai:

⁷dai ga ndat chyeju hkam la lu hkra nga, anhte a amyu shi lahkawng ting, shani shana Karai Kasang hpe jaw jau let, shaja nga ma ai: dai myit mada lam majaw, Hkawhkam wa e, Yuda masha ni ngai e mara shagun ma ai.

⁸Karai Kasang si ai ni hpe jahkrung dat ai nga ai gaw, kam shara n re ai, nga nna nanhte hpa rai myit la myit ta?

⁹Ngai nan, Nazaret wa Yesu a amying hpe nhtan shai ai hku law law wa mai di na, ngu nna ngai teng teng myit nngai.

¹⁰Gaja wa dai hku Yerusalem mare e galaw yu se ai, hkinjawng agyi ni kaw na ahkang lu la nna, chyoi pra ai ni hpe htawng e bang kau ai hte, shanhte hpe sat kau yang, ngai mung awlaw lawm ni ai.

¹¹Tara jawng magup hta mung shanhte hpe law law lang ari jahkrum let, Yesu hpe shatan shangun lu hkra shaja se ai: shanhte hpe nachying pawt ai n-yun, bu nna, masha ga hkan na kahtawng mare du hkra pyi, hkan zingri mase ai.

¹²Shing rai, hkinjawng agyi ni kaw na mungga ahkang la gun nna, Damasku mare de ngai sa wa yang,

¹³Jan pungding madi ai aten e, Hkawhkam wa e, jan hta grau htoi tu ai nhtoi, dai lam e ngai hte nye a manang ni a grup yin, lamu de nna htoi tu pru ai, mu nngai.

¹⁴Shaloi anhte nlang ga de kadawng taw mat shajang nga yang, Hebre ga hte ngai hpe, ‘Shawlu, Shawlu nang ngai hpe hpa rai zingri nga n ta? masawn hpe htawng yang, na matu yak la ahka gaw,’ nga nna shaga ai nsen ngai na nngai.

¹⁵Shaloi ngai gaw, ‘Madu e, nang kadai rai nga n ta?’ ngu nna htan we yang, Madu gaw, ‘Nang zingri zingrat ai Yesu rai nga nngai.

¹⁶Rai timung, rawt u, jan rai tsap u: kaning rai nme law, nang ngai hpe mu mada lu sai lam hte, ngai nang hpe naw madun na ra de ai lam ni a matu, amu gun hpai masha hte sakse wa shatai na san da de ga, ngu nna ya nang kaw ngai dan pru ring ngai:

¹⁷shing rai maigan amyu ni, nsin kata nna nhtoi de, Satan a atsam kata nna Karai Kasang hpang de kayin wa lu nna, yubak raw dat kau ya ai chyeju lu la na hte, ngai hpe kamsham ai a marang e, shachyoi shapra hkam la ai ni hte rau Sali wunli dagraw lu hkra,

¹⁸shanhte a myi jahpaw na matu, ngai nang hpe shanhte hpang de shangun dat de ai rai nna, na a amyu a lata na mung, maigan masha ni a lata na mung, hkye hkrang la na de ai,’ nga nna ngai hpe tsun nngai.

¹⁹Dai rai nna, Hkawhkam Agripa e, lamu na shingran dai hpe n madat ai, ngai n nga lu nngai:

²⁰dai lam hpe nnan e Damasku masha ni kaw nna, Yerusalem hte Yuda mung ting hta mung, maigan amyu ni myit malai lu nna, myit malai hte ging dan ai arawn alai shachyen let, Karai Kasang hpang de kayin wa mu ga, ngu nna maigan amyu ni hta mung, ngai hkaw shana nga nngai.

²¹Dai lam a majaw Yuda masha ni, nawku Htingnu e ngai hpe rim la nna, sat kau na maw mi ai.

²²Karai Kasang kaw na karum ai lu la ai majaw sha, dai ni du hkra nga nga let, kaji kaba yawng hpe sakse hkam ai hta,

²³Hkristu nni nkri hkrum lu na hte, si ai ni kaw na shawng hkrung rawt wa lu nna, shi a amyu hte maigan amyu ni hpe nhtoi lam madun dan lu na ra ai, nga nna byin wa na ra ai lam ni a matu, myihtoi ni hte Mawshe tsun ai lam hta kaga, ngai hpa mung n tsun jan nngai,” ngu wu ai.

²⁴Shing nga mara raw ga tsun ai hpe, Hpestu gaw, “Pawlu e, nang mana nit dai; hpaji hparat nau htang shalai nna mana mat nit dai,” ngu nna aja awa jet wu ai.

²⁵Pawlu Chyawm gaw, “Grau htum ai Hpestu e, ngai n mana nngai; tengman ai hte myit leng ai ga ngai tsun nngai.

²⁶Ndai lam hpe Hkawhkam wa nan chye da wu ai; shi a man e dingsa tsun ai mung, rai nga nngai: kaning rai nme law, ndai lam gaw njut nnaw e sha n byin re ai majaw, hkawhkam wa shi n chye ai mi n nga na re ai, ngu nna ngai kam nga nngai.

²⁷Hkawhkam Agripa e, myihtoi ni a ga hpe nang kam n ni? kam nga ndai gaw ngai chye nga nngai,” ngu wu ai.

²⁸Shaloi Agripa gaw Pawlu hpe, “Ga hkaw loi sha hte nang ngai hpe Hkristu a sape ganoi shatai lu da nngai,” ngu wu ai.

²⁹Bai Pawlu gaw, “Karai Kasang hkraw yang gaw, madu nang sha n rai, dai ni ngai tsun ai ga na mana ni nlang, ga hkaw loi sha hte rai timung, law law hte rai timung, ndai gyit hkang ai hpe n ngu ai sha, ngai zawn re ai hkrai rai na, ngai ra nga nngai,” ngu wu ai.

³⁰Shaloi hkawhkam wa yan munggyi wa hte Bernike gaw, shanhte hte dung nga manang ni hte rau rawt ma ai.

³¹Pru wa yang shanhte shada, “Ndai wa gaw sat ging ai mara, sharen ging ai mara, lama mi muk galaw ai n rai,” nga nna tsun shajang ma ai.

³²Agripa mung Hpestu hpe, “Ndai wa shi mahtang Kehta kaw du na n hpyi taw gaw, raw dat mai sai,” ngu nna tsun wu ai.