Read Jinghpaw Hanson Version Bible KASA 27 Bible Online

KASA 27 - Jinghpaw Hanson Version Bible bible

KASA 27

¹Ya, anhte hpe Itali mung de li hte sharap sa wa na myit shatawng da ngut jang, shanhte Pawlu hte kaga bawng ni nkau mi hpe, Agustu hpyen dap hte seng ai, Yuli ngu ai hpyen du a lata hta ap dat mi ai.

²Shaloi, Asi mung a nammukdara hkin-gau hkan na mare ni de garet shang hkawm wa ai, Adramuti na sanghpaw li hta anhte shang jawn ga ai: Htesaloni mare na Makedoni masha Aristarku mung anhte hte rau lawm nga ai.

³Hpang shani e anhte Sidon mare hta sek ga ai; Yuli gaw Pawlu hpe matsan dum nna, shi a jinghku ni kaw sa jahkrum na hte galaw daw hkam sha na matu, ahkang jaw wu ai.

⁴Dai kaw na pru jang, nbung n sun ai majaw, Kupru zunlawng lahta hku garet nna,

⁵Kiliki hte Pamhpuli mung na nawng makau hku rap tawng yang, Luki mung na Mura mare de du ga ai.

⁶Dai shara e hpyen du wa gaw, Itali mung de rap sa wa ai Alesandru mare na sanghpaw li mu hkrup nna, dai hta e anhte hpe jashawn mi ai.

⁷Dai kaw nna nhtoi law law wa, yat yat sha sa wa nna, Kidu jut ang de yak let sha du lu jang, nbung n sun ai majaw, n shanang lu nna, Kreti zunlawng hpe shinggun let, Salmone ginchyum ang hku sa wa nhtawm,

⁸de a makau hku yak la ai hte garet hkawm wa yang, Lasea mare hte ni nga ai Daru Kaja ngu ai, li sek ai shara de du ga ai.

⁹Ya nhtoi tsawmra wa na wa jang, lusha gam aten lai mat ai majaw, li hte hkawm sa hkrit ra ai ta du sai rai nna,

¹⁰Pawlu gaw, “Hkau ni e, ya hkawm yang, yak la nna ali hte arai ni sum na hta n-ga, anhte a asak pyi sum na zawn nawn da we ai,” ngu nna shanhte hpe tsun shadum wu ai.

¹¹Hpyen du wa mahtang, Pawlu a ga hta, Li hkang ai wa hte li madu a ga hpe, grau nna kam wu ai.

¹²Daru dai mung nshung ta sek shatawt lu na n tai ai majaw, Hponik daru de du lu yang du hkra sa nna, dai yang nshung shatawt lu hkra du wa na lam, law malaw myit hkrum ma ai: dai shara gaw, Kreti zunlawng na sinna dingdung hte sinna dingda de man yawng ai daru rai nga ai.

¹³Dai rai nna, dingda nbung angwi sha bung wa jang, shanhte myit ai hte tup sai zawn nawn nna, hpri chyinghkyi dawm la nhtawm, Kreti zunlawng makau hku garet sa wa ma ai.

¹⁴Rai timung gade n na yang, sinpraw dingdung nbung laru gaw, dai zunlawng de nna ru wa ai rai nna,

¹⁵ali hpe adawt ai majaw n shadaw lu jang, anhte dat dat nna, nbung e woi ai de yawng nang ga ai.

¹⁶Kawda ngu ai zunlawng kaji a lawu hku garet wa nga yang, de a li kaji hpe grai shaja ai hte gang la lu nna,

¹⁷li ntsa de gang shakap nhtawm, li kaba hpe ngang hkra, dai hpe matep nna sumri hte hkang mu ai; bai Surti ngu ai zaibru jang hta mara mat na hpe tsang ai majaw, de a sumpan ni hpe shanhte jahkrat kau nna, yawng nang ma ai.

¹⁸Nbung laru nau nan ja la ai majaw, hpang shani e li hta na hpaga rai ni htawm jahkrat kau mu ai:

¹⁹bai masum ya rai jang, dai li a arai ni hpe mung, tinang a lata hte htawm jahkrat kau mu ai.

²⁰Law law ya wa jan n mu, shagan ni mung n dan pru ai hte, ja la ai laru sha aru nga ai majaw, anhte hta lawt lu na myit mada shara kachyi mi muk n nga masali ai.

²¹Ya shanhte shat n sha ai, tsawmra ya na wa sai rai nna, Pawlu gaw shanhte a ka-ang e tsap let, “Hkau hte e, nanhte nye a ga madat nna, Kreti zunlawng na n pru myit taw gaw, ning re ai hten bya ga n du na re ai.

²²Ya rai timung, ngai tsun ai madat nna myit shalan mu; nanhte hta na kadai mung asak sum ga du na n rai; sanghpaw li sha asum na re ai.

²³Kaning rai nme nga yang, ngai hpe up hkang nna, ngai daw jau ai Karai Kasang a lamu kasa langai mi, mana e nye a makau e sa tsap nna,

²⁴‘Pawlu e, hkum hkrit et; hkawhkam Kehta a man e nang tsap lu na rin dai; yu u, nang hte rau ndai li hta jawn ai ni nlang, Karai Kasang nang hpe ap ya nit dai,’ nga nna ngai e tsun sai.

²⁵Dai re ai majaw, Hkau hte e, hkum tsang myit; ngai hpe tsun dan ai hte maren rai na ra ai, ngu nna, ngai Karai Kasang hpe kam nga nngai.

²⁶Rai timung, zunlawng langai ngai hta anhte mara na ga ai,” ngu nna shanhte hpe shalan wu ai.

²⁷Ya nhtoi shi mali ya shana du nna, anhte Adri nawng hta yawng kayin nga yang, yuptung hpawa e, hkarang kawng langai ngai de ni wa sam nga ai, nga nna li ma ni myit ma ai.

²⁸Shing rai, hka shadawn yu yang, lalam hkun sung ai chye ma ai; loi hkring rai jang, bai shadawn yu yang, lalam shi manga sha sung sai mu ma ai.

²⁹Dai re ai majaw, nlung hkin-gau hta ahtu hkra na hpe tsang ai rai nna, shanhte li mai de na hpri chyinghkyi mali jahkrat nhtawm, nhtoi htoi hkra ala nga ma ai.

³⁰Li ma ni dai sanghpaw li kau da nna hprawng na maw ai myit hte, li baw na chyinghkyi jahkrat na zawn di nna, li kaji hpe hka de shayu nga ma yang,

³¹Pawlu gaw hpyen du hte hpyen ma ni hpe, “Ndai ni li e n nga sayang me, nanhte lawt lu na mi n rai sai,” ngu nna tsun mu ai.

³²Shaloi hpyen ma ni gaw li kaji dun ai sumri ni sa dan kau nna, li kaji dai hpe jahka kau ya mu ai.

³³Ya nhtoi htoi wa jang, Pawlu gaw, shanhte mahkra hpe shat sha na lam woi awn let, “Nanhte lusha hpa mung n sha ai gaw, dai ni shi mali ya na wa manit dai:

³⁴dai re ai majaw, lusha lama ma sha mu; dai gaw nanhte a lawt na matu rai nga ai; nanhte hta gade a kara singgawng mi muk sum ga du na n rai,” ngu nna shanhte hpe shalan wu ai.

³⁵Shing nga tsun ngut ai hte muk la nna, shanhte mahkra a man e Karai Kasang a chyeju hpe shakawn kungdawn let, shi woi hkyep nna, woi sha wu ai.

³⁶Shaloi she nlang hte mung myit pyaw nna, shat sha shajang ma ai.

³⁷Dai li hta rawng ai masha yawng gaw, ni tsa e sanit shi kru rai nga ga ai.

³⁸Hkru hkra sha ngut jang, hkaulan mam hpe hka de kabai bang kau nna, li hpe shatsang mu ai.

³⁹Nhtoi leng rai yang, shara dai hpe shanhte n chye timung, zaibru jang shingjut langai mi mu mada nna, dai de du hkra hkang lu n hkang lu chyam yu na, bawng ma ai.

⁴⁰Shaloi hpri chyinghkyi ni hpe shanhte raw nna nammukdara e kau da mu ai; li hkang ai lasham sumri hpe mung raw nna, li baw de na dawnghkawn sumpan sharawt nhtawm, dai zaibru jang de hkang wa ma ai.

⁴¹Rai timung, zaini hkindawt langai mi kaw li wa chyat mat nna, li baw de n shamu lu ai hte, li mai de hka leng kayat ai majaw, agrawp mat wa ai.

⁴²Shaloi hpyen ma ni gaw, bawng ni hpung-yawt rap wa nna lawt mat na hpe tsang ai majaw, shanhte hpe sat kau na bawng ma ai.

⁴³Hpyen du wa chyawm gaw, Pawlu hpe hkye la mayu nna, shanhte a bawng ai lam hpe hkum kau nhtawm, hpung-yawt chye ai ni kadai mung, hka de yu nna, hkarang de shawng kaw wa mu ga, nga nna mung;

⁴⁴kaga ni gaw, nkau mi hpunpyen hte, nkau mi sanghpaw li a arai kaga ni hta, noi nna rap wa mu ga mung, hkang dat mu ai. Shing rai shanhte nlang hkarang de kaw wa nna lawt lu ma ai.