Read Jinghpaw Hanson Version Bible KASA 28 Bible Online

KASA 28 - Jinghpaw Hanson Version Bible bible

KASA 28

¹Shing rai anhte, kaw lawt lu jang she, zunlawng dai Melite ngu ai zunlawng rai nga ai hpe, anhte chye gaw ai.

²Dai yang na karing karang masha ni anhte hpe grai wa matsan dum nna, marang a htu nga ai hte kashung ai majaw, wan wut nna, anhte nlang hte hpe hkap hkalum la mi ai.

³Shaloi Pawlu gaw hpun dingshan magawn la nna, wan mang hta bang dat wu yang, pu htum langai mi wan kahtet ai na jang pru wa nna, shi a lata hta kawa noi nga ai.

⁴Shing rai, Pawlu a lata pu htum noi goi lang nga ai hpe, dai karing karang masha ni mu ma yang, shanhte gaw, “Gaja nan, ndai wa gaw masha sat ai wa teng sam ai; hka na lawt lu timung, shi hkrung nga na hpe, Shingra tara e n hkraw wu hka,” nga nna shada tsun shajang ma ai.

⁵Pawlu chyawm gaw lapu dai hpe wan mang de ari bang kau nna, hpa tsin-yam mung n hkrum ai anga nga ai.

⁶Shanhte gaw, shi hkum bum wa na ra ai, dai n rai, ahkring sha kadawng si na ra ai, nga nna myit nga ma ai, rai timung, na na wa la yu nga yang, shi hta hpa mung n byin ai mu jang, shanhte myit bai galai nna, ndai wa gaw Hpara langai mi she rai nga ai, nga nna bai tsun ma ai.

⁷Ya, dai makau hkan e, Popli ngu ai zunlawng agyi wa a ga dachyawk ni nga shajang nga ai: dai wa gaw anhte hpe hkap hkalum la nna, masum ya tup jinghku myit hte manam daw mi ai.

⁸Dai shaloi e Popli a kawa gaw hkali hte daren machyi nna taw nga ai; Pawlu gaw dai wa kaw shang nna, akyu hpyi ai hte shi a lata mara ya nna, shi hpe shamai ya wu ai.

⁹Shing rai byin ai majaw, zunlawng na machyi ai ni kaga mung du ma ai rai nna, shamai shatsai lu la ma ai:

¹⁰shanhte mung, anhte hpe hkungga lara ai lam law law galaw nna, dai yang na li jawn pru wa jang, anhte hta ra ai made li hta bang ya dat ma ai.

¹¹Shing rai, shata masum lai jang, dai zunlawng e kashung ta shalai nna nga nga ai, Alesandru mare na, Hpara marun yan nau a sumla kap ai sanghpaw li hta anhte shang nna jawn pru wa ga ai.

¹²Surakusa mare de du yang, anhte dai yang e masum ya hkring nga ga ai.

¹³Dai kaw nna kawai jawn wa yang, anhte Regi mare de du ga ai: hpang shani e dingda nbung bung wa ai rai nna, ni ni shani hta Potioli mare de du ga ai;

¹⁴dai yang e anhte hpunau ni hte hkrum nna, sanit ya tup hkring nga na shanhte hpyi ma ai rai nna, anhte hkring nga ga ai: dai hpang Roma mare du ga ai.

¹⁵Dai mare na hpunau ni, anhte du na lam na nna, tau la na nga, Api gat hte Manam Jarawp masum du hkra sa ma ai; Pawlu shanhte hpe mu jang, Karai Kasang hpe shakawn kungdawn nna shalan shabran nga ai.

¹⁶Ya anhte Roma mare de du bang jang, Pawlu gaw shi hpe sin ai hpyen ma hte rau kaga hkrai rai nga na, ahkang lu la wu ai.

¹⁷Masum ya nhtoi lai ai hpang, Pawlu gaw dai yang na Yuda agyi salang ni hpe shaga la wu ai: shanhte du sa shajang ma yang, shi gaw shanhte hpe, “Hpunau ni e, nye a amyu hpe mung, ji wa ni a htung hking hpe mung, nhtan jashai nna, ngai hpa mung n galaw yu nngai; rai timung Yerusalem mare kaw nna, Roma masha ni a lata de bawng di ap kau ai, ngai hkrum nngai:

¹⁸Roma du ni chyawm gaw ngai hpe sagawn yu ngut jang, si ging ai mara ngai hta n mu ai majaw, ngai hpe raw dat mayu ma ai.

¹⁹Dai hpe Yuda masha ni mahtang n hkraw ai majaw, ngai kaning n chye di nna, Kehta kaw du na hpyi we ai: dai rai timung, nye a amyu hpe mara shagun shara rawng ai majaw n rai.

²⁰Shing rai, Israela amyu a myit mada ai lam a nhkan e, ndai hpri hkang hkyihkyang hte sharen ai ngai hkrum nngai majaw, ngai kaw mahtang sa tsun chyai na, ngai nanhte hpe shaga dat nngai,” ngu nna tsun mu ai.

²¹Shaloi shanhte gaw, “Na a lam, Yuda mung na laika mung anhte n lu ga ai; hpunau ni kadai mung na a lam n kaja ai shi sa tsun ma ai n rai.

²²Rai timung, ndai hka bra Hpung gaw, shara shagu hkan e ndang kau hkrum ai lam rai nga ai hpe, anhte chye ga ai majaw, nang myit ai hku mung anhte na mayu ga ai,” ngu nna htan mu ai.

²³Ya shanhte shi hte hkrum chyai na nhtoi madat da nhtawm, shi manam nga ai nta de masha law law wa sa hpawng nga ma ai: shaloi shi gaw, jahpawt kaw nna shana de du hkra, Mawshe a tara hte myihtoi ni a ga hta hkan nna, Karai Kasang a mungdan lam sakse hkam ai hte, Yesu a lam shanhte hpe shapraw shadan dan mu ai.

²⁴Shing nga tsun ai lam hpe nkau mi hta la ma ai; nkau mi chyawm gaw n kam n sham ma ai.

²⁵Shing rai shanhte shada myit n hkrum ma ai majaw, Pawlu gaw, shanhte hpe, “Chyoi pra ai Wenyi myihtoi Esaia a n-gup hte nanhte a nji nwa ni hpe tsun ai ga gaw teng la malit dai: dai gaw,

²⁶‘Amyu dai hpe sa tsun dan su, Nanhte na lana n chye na na mu ai; Yu layu e, n mu na mu ai, ngu su.

²⁷Kaning rai nme law, tinang myi hte mu lu nna, Tinang a na hte na la lu let, Tinang a myit masin hta chye na lu ai hte Ngai hpang de kayin wa na hpe; Ngai shanhte hpe n shamai lu hkra, Dai amyu gaw myit mak nga nna, Shanhte a na lahpang nga ai hte, Shanhte a myi pat nga malu ai,' nga ai, rai nga ai.

²⁸Dai re ai majaw, ndai Karai Kasang a hkye hkrang la ai lam, maigan amyu ni hpang de jaw dat nu ai rai nna, shanhte mahtang madat mara hta la na mara ai gaw, nanhte nan chye nga mu law,”

²⁹ngu nna dai ga hkaw mi tsun jat dat ai hpang, shanhte pru wa ma ai.

³⁰Dai kaw nna Pawlu gaw ni ning tup shi shap rawng ai nta hta nga nga let, shi kaw sa masa ni hpe hkap la nna,

³¹Karai Kasang a mungdan lam, hkaw dan ai hte, Madu Yesu Hkristu hte seng ai lam hpe nden ja ai myit hte sharin shaga nga nna, kadai mung shi hpe hkum shadang ai n rai.