Read Jinghpaw Hanson Version Bible KASA 3 Bible Online

KASA 3 - Jinghpaw Hanson Version Bible bible

KASA 3

¹Ya Petru yan Yawhan gaw, ahkying jahku na akyu hpyi ai ladaw hta, nawku Htingnu de lung wa ma ai.

²Shaloi e, kanu a hkritung nna lagaw hten ai masha langai mi hpe hpai sa nna, Htingnu de shang wa ai ni kaw na hpyi sha u ga nga, Tsawm pra mying ai Htingnu chyinghka makau e shani shanang sa tawn da da di mu ai.

³Petru yan Yawhan dai Htingnu de shang wa nga ma ai hpe, shi mu nna hkap hpyi nga ai.

⁴Petru yan Yawhan chyawm gaw shi hpe jawm azi yu nna, “An hpe mada yu mi,” ngu wu ai.

⁵Shan kaw lama ma lu la na myit mada let, shan hpe galaw yu nga ai.

⁶Petru chyawm gaw, “Aja, gumhpraw gaw ngai n lu nngai, rai timung, ngai lu ai nang hpe jaw de ga: Nazaret wa Yesu Hkristu a amying ningsang hte rawt hkawm wa u,” nga nna tsun let,

⁷shi a hkra lata jum nna dun sharawt wu ai: shaloi jang, shi a lagaw hkarutum ni n-gun rawng wa lu ai.

⁸Alawan rawt tsap let shi hkawm sa wa yu nhtawm, hkawm sa let, gumlawt let, Karai Kasang hpe shakawn nna, shan hte rau Htingnu de shang wa ai.

⁹Shi hkawm sa wa nga ai hte Karai Kasang hpe shakawn kungdawn nga ai gaw, masha yawng mu lu ma ai:

¹⁰dai wa gaw nawku Htingnu a Tsawm pra chyinghka makau e dung nna, hpyi sha ai wa rai nga ai hpe shanhte matsing da mu ai rai nna, shi hta byin wa ai lam majaw, mau mahka nna myit yu kahpra nga ma ai.

¹¹Dai wa gaw Petru yan Yawhan kaw kanan nang nga yang, shawa masha ni gaw mau mahka let, Shawlumon ngu ai jarawp de, shanhte kaw gat ru bang wa ma ai.

¹²Petru dai mu jang, shawa masha ni hpe, “Israela masha ni e, ndai wa a lam hpe hpa rai mau myit ta? an lala a myit tsup ai hte ndai wa hpe hkawm sa lu shangun ai zawn rai nna, an hpe hpa rai azi yu nga myit ta?

¹³Abraham, Isak hte Yaku a Karai Kasang ngu ai, anhte a ji wa ni a Karai Kasang gaw, shi a Shangun ma Yesu hpe hpung shingkang shapraw ya nu ai: nanhte chyawm gaw shi hpe ap kau myit dai rai nna, Pilat du wa, shi hpe dat kau na myit da sayang, nanhte mahtang shi a man e dai wa hpe ndang kau myit dai.

¹⁴Dai chyoi pra ai hte dinghpring ai wa hpe nanhte ndang kau nna, masha sat ai wa hpe mahtang hpyi la nhtawm,

¹⁵asak Madu hpe sat kau myit dai; Karai Kasang chyawm gaw, chyasi ni hta na shi hpe jahkrung sharawt la nu ai: anhte mung dai lam a sakse ni rai nga ga ai.

¹⁶Shi a amying ningsang hpe kamsham ai a marang e, shi a amying nan, ndai nanhte mu chye ai wa hpe n-gun shaja nu ai; rai sa, shi kaw na makam masham gaw, ndai wa hpe, nanhte yawng a man e, hkum hkum shamai tawn nu ai.

¹⁷Ya rai timung, hpunau ni e, nanhte hte nanhte a du gyi ni dai lam hpe n chye nna galaw kau ai rai nga ai gaw, ngai chye nga nngai.

¹⁸Dai gaw, Karai Wa a Hkristu nni nkri hkrum na re ai, nga nna myihtoi ni yawng a n-gup hte tau tsun shangun ai Karai Kasang shi nan, ning re ai lam hte shadik nu ai.

¹⁹Dai re ai majaw, dai Madu kaw na ngwipyaw ai aten ladaw du ru ga hte,

²⁰Yesu ngu ai, nanhte a matu san da ya ai Hkristu hpe, shi shangun dat ya ru ga, nanhte a yubak raw mat na matu, myit malai lu nna kayin wa marit;

²¹moi chyaloi nhkoi nna nga nga ai, shi a chyoi pra ai myihtoi ni a n-gup hta, Karai Kasang tsun da sai lam hte maren, nga yawng danghta hpe nnan bai gram ai prat du hkra, sumsing lamu gaw dai wa hpe hkap la da nga na, rai nga ai.

²²Mawshe nan tsun da ai mung, Dai Madu Karai Kasang gaw, ngai zawn re ai myihtoi, nanhte a nhpu nnau ni hta na, nanhte a matu paw pru shangun ya na ra ai: dai wa tsun matsun nanhte madat mara lu na rai myit dai.

²³Kadai wa dai myihtoi a ga hpe n madat yang, dai wa gaw tinang amyu hta na sumri dan kau ya ai hkrum lu na rai nga ai, nga ai.

²⁴Rai sa, Samuela kaw nna, shi a hpang e hkan paw pru nna htawn tsun tsun re ai myihtoi yawng hte gaw, nhtoi ndai hpe lakap nna mung tau tsun wa masai.

²⁵Nanhte mung dai myihtoi ni a kashu kasha ni rai nga myit dai hte, Karai Kasang Abraham hpe, Na amyu matu a marang e ga ntsa amyu mahkra gumring gumrat chyeju hkam la shajang na mara ai, nga nna nanhte a nji nwa ni hte tawn da ai ga shaka a kashu kasha ni mung, rai nga myit dai.

²⁶Nanhte hta hkum shagu hpe tinang a shut hpyit ai lam hta na kayin wa lu shangun na hte, nanhte hpe shaman ya n ga nga, Karai Kasang gaw shi a Shangun ma hpe paw pru shangun ai hta, nanhte hpang de shawng shangun dat ya sai,” ngu nna tsun mu ai.