Read Jinghpaw Hanson Version Bible KASA 4 Bible Online

KASA 4 - Jinghpaw Hanson Version Bible bible

KASA 4

¹Shing rai, shan gaw shawa masha ni hpe shaga nga yang, hkinjawng agyi ni, nawku Htingnu sin ai agyi wa hte Saduke ni katu pru nna

²shawa masha ni hpe sharin shaga nga let, Yesu a marang e si mat sai ni bai hkrung rawt wa na lam tsun ma ai majaw, shanhte grai myit ru da mu ai rai nna,

³kasa yan hpe rim la nhtawm, ya shana rai wa sai majaw, jahpawt du hkra htawng hta bang da mu ai.

⁴Rai timung, mungga na la ai ni law law wa, kamsham ma ai rai nna, kamsham ai lasha yawng hkying manga daram rai nga ma ai.

⁵Hpang jahpawt e, shanhte a du agyi ni, salang ni hte laika ka ai sara ni, Yerusalem mare hta hpawng nga ma ai:

⁶hkinjawng agyi Anna hte nawng, Kayahpa, Yawhan, Alesandru hte hte, hkinjawng agyi a amyu ni kadai mung, dai yang lawm nga ma ai.

⁷Shaloi kasa yan hpe shanhte a ka-ang e shadun da nna, “Taw, nan gaw, hpa atsam, gade a amying hte ndai amu galaw myit ta?” ngu nna san mu ai.

⁸Shaloi Petru, Chyoi pra ai Wenyi hpring nga ai rai nna, shanhte hpe tsun mu ai gaw, “Mung masha ni a du agyi salang ni e,

⁹ndai chyahten labye wa hpe madun ai chyeju lam a majaw, dai wa hpe kaning di shamai ai nga nna, dai ni an deng ai hkrum na rai yang gaw,

¹⁰nanhte nlang hte Israela amyu yawng hpe chye la shangun made ga: nanhte wudang hta jen da sat kau nna, Karai Kasang chyasi ni kaw na jahkrung sharawt la ai, Nazaret wa Yesu Hkristu a amying ningsang hta, ndai wa nanhte a man e amai atsai tsap nga ai.

¹¹Dai Yesu gaw, nanhte nta gaw ai ni lata kau ai nlung rai nga timung, ningjut jahtum na nlung bai rai wa sai.

¹²Shi hta shaje hkye krang la ai lam n nga sai; anhte hkye hkrang la kaw du lu na matu, sumsing lamu a npu, shinggyim masha ni hta jaw ya ai amying ningsang shaje, kanang mung n nga sai,” ngu nna htan wu ai.

¹³Shanhte chyawm gaw, Petru yan Yawhan a nden ja ai myit mu nna, shan gaw laika n chye ai, yu maya masha rai nga ma ai hpe chye ma ai majaw, mau nga ma ai; rai timung, shawng de Yesu hte rau shan nga yu ai gaw, shanhte dum ma ai:

¹⁴dai hta kaga, mai tsai ai wa mung, shan hte rau tsap nga ai hpe, shanhte mu ma ai rai nna, ndang shara hpa mi n mu mu ai.

¹⁵Rai timung, shan hpe dai salang hpawng na shapraw tawn nhtawm, shanhte shada bawng ma ai gaw,

¹⁶“Ndai yan hpe kaning di na rai nga ga ta? shan a lata hte dan hkung ai lamik kumla langai mi byin wa sai gaw, Yerusalem e nga ai ni nlang a man e dan dan pra pra rai wa sai rai nna, anhte mung ndang shara n mu sagaw ai.

¹⁷Rai timung, dai lam, mung masha ni hta grau nna n gara wa u ga, ya kaw nna amying dai gang nna kadai hpe mung, n tsun dan na hku, shan hpe daru jet kau gaw,” nga ma ai.

¹⁸Shing rai shan hpe shaga nhtawm, Yesu a amying gang nna hpa mung n tsun, n sharin lu na hku, hkang da ma ai.

¹⁹Petru yan Yawhan chyawm gaw, “Karai Kasang a ga madat na hta, nanhte a ga mahtang madat yang, Karai Kasang a man e mai n mai gaw, nanhte she dawdan yu mu.

²⁰An chyawm gaw, mu la, na la sai lam ni hpe n tsun ai, n nga lu ga ai,” ngu nna shanhte hpe bai htan mu ai.

²¹Shaloi shanhte gaw, mung masha ni hpe tau yu let, shan hpe ari jaw na lam n mu mu ai majaw, shan hpe bai daru nna dat dat mu ai; kaning rai nme law, dai byin ai amu majaw, masha nlang Karai Kasang hpe shagrau sha-a ma ai.

²²Dai hta n-ga, dai lamik kumla byin ai shamai hkrum ai wa gaw, asak mali shi ning jan sai, rai nga ai.

²³Shing rai raw dat hkrum jang, shan gaw tinang a hpung manang ni hpang de wa nna, hkinjawng agyi ni hte salang ni, shan hpe ahkrim ai ga mahkra tsun dan mu ai.

²⁴Dai na jang shanhte gaw myit langai sha hte Karai Kasang hpang de tinang a nsen shaja nna, “Sumsing lamu hte ginding aga, nammukdara hte dai hte hta nga manga hpan tawn da ai Madu e;

²⁵Nang na a mayam, anhte a wa Dawi a n-gup hta, Chyoi pra ai Wenyi hte tsun da ndai gaw; ‘Maigan amyu ni hpa majaw n-yun bu nna, Masha amyu ni hpa majaw lila maw nga ma hka?

²⁶Dai Madu hte shi a Hkristu hpe tai na, Ga ntsa hkawhkam ni rawt nna, Du salang ni rau hpawng nga ma ai,' nga ai.

²⁷Gaja wa teng teng, na a lata, na a myit hpaji hte tau hpang da ai hku, byin wa lu hkra, nang namman chya ai, na a chyoi pra ai wa Shangun ma Yesu hpe tai na nga,

²⁸ndai mare hta e Herod yan Pontu Pilat, maigan amyu ni hte Israela amyu masha ni du hkra jawm hpawng nga ma ai.

²⁹Ya yang Madu e, shanhte a daru ahkrim ai ga hpe dum ya mi; machyi makaw mai tsai hkra, na a lata ladawn nna, na a chyoi pra ai Shangun ma Yesu a amying hte lamik kumla, mauhpa amu byin nga ai hta,

³⁰na a mayam ni, na a mungga hpe nden ja ai myit hte tsun dan nga lu hkra, karum ya mi law,” nga nna hpyi ma ai.

³¹Shing rai akyu hpyi ngut jang, shanhte hpawng nga ai shara gaw gari ashun wa nna, nlang hte hta Chyoi pra ai Wenyi hpring wa ai hte, Karai Kasang a mungga hpe nden ja ai myit hte tsun dan wa ma ai.

³²Dai kamsham ai shawa hpung ting gaw myit mang langai sha rai nga ma ai: kadai mung tinang lu ai arai hpe nye a, n nga ai sha, yawng mayawng hpe jawm lang ma ai.

³³Kasa ni mung, dai Madu Yesu a bai hkrung rawt ai lam hpe atsam kaba hte sakse hkam ma ai rai nna, shanhte mahkra ntsa e chyeju kaba nga malu ai.

³⁴Shanhte hta kadawn ai masha langai mi muk n nga ma ai; kaning rai nme law, ga dachyawk lu ai ni, nta lu ai ni kadai mung, dai dut nna, lu la ai gumhpraw hpe,

³⁵kasa ni a lagaw nhpang e sa tawn da ma ai; dai rai nna, kadawn ai wa kadai hpe mung rap shara nna, karan jaw karan ya mu ai.

³⁶Dai shaloi, Barnaba ngu nna, kasa ni e mying hkawt shamying ai, Kupru mung na Lewi masha Yawsep mung, shi lu ai ga dachyawk dut nna, lu la ai gumhpraw hpe kasa ni a lagaw nhpang e sa tawn da wu ai:

³⁷Barnaba ngu ai ga lachyum gaw shalan shabran ai a kasha ngu ai, rai nga ai.