Read Jinghpaw Hanson Version Bible KASA 5 Bible Online

KASA 5 - Jinghpaw Hanson Version Bible bible

KASA 5

¹Rai timung, Anani mying ai la wa hte madu jan Sahpira gaw, shan lu ai ga dachyawk dut nna,

²shan la myit hkrum ai hte, dai jahpu kau mi ip da nhtawm, kau mi sha kasa ni a lagaw nhpang e sa tawn da wu ai.

³Dai rai nna Petru gaw, “Anani e, Chyoi pra ai Wenyi hpe masu kau na hte, ga jahpu hta na kau mi ip da na gaw, hpa majaw Satan na a myit jahpring ya lu a ta?

⁴ga dai nga nga yang, na a arai nga ai n rai ni? dut kau ai hpang na mung, na a arai naw nga ai n rai ni? nang hpa rai dai hku maw n ta? masha hpe masu ai n rai, Karai Kasang hpe masu kau nu ai,” ngu wu ai.

⁵Dai ga na jang Anani gaw kadawng si mat ai: dai na ai ni yawng mayawng mung nachying hkrit kahpra mat ma ai.

⁶Shaloi shabrang ni rawt nna, shi a mang hpe ahkyen kayawp nhtawm, sa hpai lup kau ma ai.

⁷Dai hpang, ahkying masum daram na jang, madu jan mung, shing rai byin ai lam hpe n chye nna, shang wa ai.

⁸Bai Petru gaw, “Ga dachyawk dut ai, ndai hte sha re a ni? ngai e tsun dan e,” ngu wu yang, shi mung, “Rai sa, ndai hte hte sha dut ai re ai,” ngu wu ai.

⁹Shaloi Petru gaw, “Dai Madu a Wenyi hpe chyam yu na, nan hpa majaw ndai hku myit hkrum myit ta? Yu u, na a madu wa hpe lup kau ai ni a lagaw, dai chyinghka e du ra ai; nang hpe mung hpai kau na mara ai,” ngu wu ai.

¹⁰Shaloi jang shi mung kasa wa a lagaw nhpang e kadawng si mat ai: shabrang ni mung shang wa yu yang, dai numsha si taw nga ai hpe mu nna hpai sa wa nhtawm, madu wa makau e lup kau mu ai.

¹¹Dai rai nna, Hpung ting hte, dai lam na mana ni yawng, nachying hkrit kahpra mat wa ma ai.

¹²Ya kasa ni a lata hta lamik kumla hte mauhpa amu law law wa, mung masha ni a man e byin dan nga ai; dai ni nlang myit langai sha hte, Shawlumon mying ai jarawp hta nga nga ma ai.

¹³Masha gale kadai mung shanhte hte n kanawn wam ma ai: mung masha ni chyawm gaw, shanhte hpe sha-a ma ai rai nna

¹⁴kamsham ai numsha lasha hpung kaba, dai Madu kaw jat bang wa ma ai:

¹⁵dai rai nna, Petru lai sa wa yang, langai ngai a ntsa e shi a shingnip sha pyi hkra u ga, nga nna machyi makaw hkrum ai ni hpe, mare lam makau de hpai shapraw nhtawm yup ku ni hte panep ni hta, tawn da shajang ma ai.

¹⁶Dai hta kaga, Yerusalem grup yin ginwang hkan na mare ni kaw nna mung, masha law law wa machyi ai ni hte nat shang zingri hkrum ai ni hpe woi nna, du sa shajang ma ai; dai ni mung nlang hte shamai shatsai ai hkrum ma ai.

¹⁷Rai timung, hkinjawng agyi wa hte, shi a manang ni, Saduke ngu ai hpung masha nlang hte gaw, manawn ai myit hkrai chyat rai nga malu ai rai nna, rawt nhtawm

¹⁸kasa ni hpe rim la nna, mare na htawng hta rawng da mu ai.

¹⁹Rai timung, dai shana e Madu a lamu kasa gaw, htawng chyinghka ni hpaw kau ya nna, shanhte hpe shapraw dat let,

²⁰“Nanhte pru wa mu, nawku Htingnu e wa tsap nna, ndai asak hkrung ai lam hte seng ai ga yawng mayawng, shawa masha ni hpe tsun dan mu,” ngu dat wu ai.

²¹Ga dai na jang, jahpawt manap hpawa e dai Htingnu de shanhte shang wa nna sharin shaga nga ma ai. Hkinjawng agyi wa hte shi a manang ni mung sa du nna, tara agyi ni hte Israela kashu kasha ni a salang nlang hte hpe shaga jahpawng tawn nhtawm, kasa ni hpe shapraw la na htawng de masha shangun dat mu ai.

²²Ali ama ni chyawm gaw, htawng e kasa ni hpe n mu jang, bai wa nna,

²³“Htawng mung chyip chyip la nga ai, sin langa ni mung chyinghka shinggan e sin nga ma la ai; dai wa mi hpaw yu yang me, kata e kadai mung n nga nga la ai,” ngu nna wa tsun dan mu ai.

²⁴nawku Htingnu agyi wa hte hkinjawng agyi ni dai ga na jang, ndai lam hpa byin ai rai wa sai kun, nga nna grai myit ru ma ai.

²⁵Shaloi langai wa mi shang sa nna, “Yu mu, nanhte htawng e rawng da ai ni gaw, nawku Htingnu e tsap nna masha ni hpe sharin shaga nga ma ai,” ngu nna shanhte hpe tsun dan mu ai.

²⁶Dai rai nna hpyen du wa gaw ali ama ni hte sa nna, kasa ni hpe sa woi la mu ai; rai timung, aja awa n di wam mu ai; kaning rai nme law, shawa masha ni nlung hte kabai wa na hpe, hkrit da mu ai.

²⁷Shing di shanhte hpe woi la nna, salang hpawng a man e tawn da ngut jang, hkinjawng agyi wa gaw,

²⁸“Nanhte hpe, amying dai hte hpa mung hkum tsun, ngu nna anhte aja awa hkang da saga ai; ya yu mu, Yerusalem mare ting nanhte a sharin shaga lam pri di manit dai rai nna, dai wa a asai anhte a ntsa e mara ya na maw nga myit dai,” ngu nna shanhte hpe tsun wu ai.

²⁹Shaloi Petru hte kasa ni htan mu ai gaw, “Masha ga madat na hta, Karai Kasang a ga mahtang grau madat na ga ai.

³⁰Anhte a ji wa ni a Karai Kasang gaw, nanhte wudang hta jen da sat kau ai Yesu hpe, jahkrung sharawt dat nu ai.

³¹Israela amyu hpe myit malai lam hte mara raw ya ai lam hpaw ya na matu, Daru Magam hte Hkye hkrang la ai Madu shatai na nga, Karai Kasang gaw dai wa hpe, shi a hkra lata hte shagrau tawn nu ai.

³²Anhte mung ndai lam ni a sakse ni rai nga ga ai; shi a mungga madat mara ai ni hpe Karai Kasang jaw ya ai Chyoi pra ai Wenyi mung, dai hte a sakse rai nga ai,” ngu mu ai.

³³Dai ga na jang, shanhte a myit masin hta mala la hkra malu ai majaw, kasa ni hpe sat kau na pyi myit lu ma ai.

³⁴Rai timung, mung masha ni mahkra man e arawng lu ai tara sara Gamale ngu ai Hparishe langai mi, dai salang bawng hta rawt nna, kasa ni hpe hkring mi shapraw tawn shangun nhtawm,

³⁵tsun wu ai gaw, “Israela masha ni e, ndai ni hpe kaning di na gaw atsawm sha naw myit yu mu.

³⁶Kaning rai nme law, moi shawng de Htuda ngu ai wa, shi hkum hpe reng ai wa rai nngai, nga nna paw pru yang, marai mali tsa daram shi kaw hkan nang yu sai; shi hkum nan sat kau ai hkrum nna, shi a ga madat ai ni nlang kamawng mat ma masai.

³⁷Dai hpang, jahpan hti la ai aten hte yang, Galile masha Yuda paw pru nna, mung masha ni hpe shi hpang de lau la mu ai; shi mung hten byak hkrum nna, shi a ga madat ai ni nlang, bra mat wa masai.

³⁸Ya mung, ndai ni hpe hpa mi hkum gawn myit, ra mi rai mu ga; hpaji ndai hte, lam ndai rai timung, masha kaw na rai yang gaw, byak mat na ra ai:

³⁹Karai kasang kaw na rai yang chyawm gaw, nanhte hpya lu na n rai; Karai Kasang hpe daw ai tai na mahtang tsang ra ai, ngai tsun da made ga,” ngu mu ai.

⁴⁰Ga dai hpe shanhte myit htuk dum ma ai rai nna, kasa ni hpe shaga la nhtawm, kayat nna, Yesu a mying hte n sharin n shaga lu na lam hkang da ngut jang, dat dat ma ai.

⁴¹Shanhte chyawm gaw, Amying ningsang de a majaw she, kaya hkrum na gaw, ging nga ga ai, nga nna myit la ai majaw, kabu gara ai myit hte dai salang hpawng na pru wa ma ai.

⁴²Dai rai timung, shanhte shani shagu nawku Htingnu hta mung, nta hkan e mung, Yesu gaw Hkristu rai nga ai, nga nna a hkaw a tsun nga ma ai.