Read Jinghpaw Hanson Version Bible KASA 6 Bible Online

KASA 6 - Jinghpaw Hanson Version Bible bible

KASA 6

¹Ya, sape ni law htam wa ai nhtoi hte yang, Heleni ngu ai ni hta na gaida jan ni hpe, shani shagu na galaw lu galaw sha ai amu hta shadawng tawn ai nhkan e, dai Heleni ni gaw Hebre masha ni hpe, aput angun nga ma ai.

²Shaloi dai kasa shi lahkawng hte gaw sape hpung ting hpe shaga la nna, “Anhte wa Karai Kasang a mungga hpe kau da rap rai nna, sha ku amu hpajang nga na gaw, n htuk ga ai.

³Dai majaw, hpunau ni e, nanhte hta na sari rawng nna, Chyoi pra ai Wenyi hte hpaji byeng-ya hta myit kup ai masha marai sanit lata tawn mu; dai ni hpe ndai amu madu shangun na matu, anhte san da nme ga.

⁴Anhte chyawm gaw, akyu hpyi ai amu hte mungga hkai dan ai amu hta, htep lahti shatsup nga na ga ai,” ngu nna tsun mu ai.

⁵Ga dai hpe hpung ting na ra ma ai rai nna, makam masham tsup ai hte, Chyoi pra ai Wenyi hpring ai Stehpan ngu ai wa hte, Hpilip, Prokoru, Nekanora, Timun, Parmena hte Antioki mare na Proselutu hpung na Nikola hte hpe lata la nna,

⁶kasa ni a man e shadun tawn da mu ai; shanhte akyu hpyi ngut jang, shanhte hpe lata mara jaw da mu ai.

⁷Karai kasang a mungga mung, galu kaba wa ai rai nna, Yerusalem mare hta sape ni nachying law htam wa ai hte, hkinjawng ni ga daga mung, dai makam masham lam madat mara nga ma ai.

⁸Ya Stehpan gaw chyeju hte n-gun atsam hpring nga ai rai nna, mung masha ni a man e mauhpa amu hte lamik kumla kaba madun dan mu ai.

⁹Shaloi, Shanglawt ngu ai ni a tara jawng hte seng ai ni hte, Kureni, Alesandru, Kiliki hte Asi ngu ai tara jawng hte seng ai ni nkau mi rawt nna, Stehpan hte ndang kalang hkat ma ai.

¹⁰Rai timung, shi tsun wa ai hpaji ga hte Wenyi hpe shanhte n dang lu ma ai.

¹¹Shaloi shanhte gaw, “Ndai wa Mawshe hte Karai Kasang hpe shatan ai ga tsun nga ai gaw, anhte na saga ai,” nga nna tsun na masu ai sakse tam tawn ma ai.

¹²Shing rai shanhte gaw mung masha ni hte, agyi salang ni, laika ka ai sara ni hpe masin sharawt ya nna, shi hpe sa rim la nhtawm, salang hpawng a man e woi tawn mu ai:

¹³sakse masu ni hpe mung jashawn dat mu ai rai nna, shanhte gaw, “Dai wa, ndai chyoi pra ai shara hte jep ai tara hpe jahpoi ai ga n sim n sa a tsun nga ai:

¹⁴Nazaret na Yesu ngu ai wa gaw, shara ndai hpe hpya kau nna, anhte hpe Mawshe jaw da ai tara a htung hking hpe galai kau na rai nga ai, nga nna shi nan tsun ai ga anhte na saga ai,” ngu nna tsun mu ai.

¹⁵Shaloi dai hpawng shingra e dung nga ai ni nlang, shi hpe jawm azi yu mu yang, shi a myi man lamu kasa myi man zawn rai nga lu ai gaw, shanhte mu ma ai.