Read Jinghpaw Hanson Version Bible KASA 7 Bible Online

KASA 7 - Jinghpaw Hanson Version Bible bible

KASA 7

¹Shaloi hkinjawng agyi wa, “Dai hku rai nga n ni?” ngu nna san wu yang,

²Stehpan tsun mu ai gaw, “Hpunau ni hte wa ni e, madat mara yu mu: anhte a aji daju Abraham, Haran e garai n wa shingbyi, Mesopotami mung e naw rai nga yang, hpung shingkang rawng ai Karai Kasang gaw shi kaw dan pru nna,

³‘Na a mung, na amyu kaw na pru nhtawm, ngai madun na ra de ai mung de sa wa su,’ ngu nna, shi hpe tsun dan wu ai.

⁴Shaloi Hkalde a mung na shi pru nna, Haran mung e wa shingbyi nga ai; dai hpang, shi a kawa si mat jang, dai kaw nna ya nanhte nga nga ai ndai mung de, Karai Kasang shi hpe woi htawt wa wu ai:

⁵dai mung e, sali wunli ngu na, lagaw hkang daram pyi shi e n jaw wu ai; rai timung, shi hta kashu kasha myi man garai n mu kaw nna, lamu ga ndai, shi hpe mung, htawm hpang na shi a kashu kasha ni hpe mung, jaw na nga ga ndat tawn da wu ai.

⁶Dai hta kaga, Karai Kasang ndai lam hpe tsun ai gaw, shi a amyu matu ni masha tsasam a mung hta sa shingbyi nga nna, dai mung masha ni e yam sha na hte, mali tsa ning zingri zingrat hkrum na mara ai:

⁷shanhte e yam sha ai amyu hpe mung, ngai jeyang na mawe ai; shaloi shanhte pru wa nna, ndai yang e ngai hpe jaw jau lu na mara ai, nga nna Karai Kasang tsun sai.

⁸Matu gadoi jaw na lam hte seng ai ga shaka hpe mung shi e jaw dat wu ai; shaloi Isak hpe shaprat wu ai rai nna, matsat ya nhtoi hta matu gadoi ai lam jaw wu ai: Isak gaw Yaku hpe shaprat nna, Yaku gaw aji daju ni shi lahkawng hpe shaprat wu ai.

⁹Dai aji daju ni gaw Yawsep hpe manawn nna, Egutu mung de dut kau dat mu ai.

¹⁰Rai timung, Karai Kasang shi hte rau nga nga ai rai nna, tsin-yam tsindam yawng na shi hpe shaw la ai hte, Egutu hkawhkam Hpara-u a man e chyeju hte hpaji byeng-ya jaw wu ai majaw, dai hkawhkam gaw Egutu mung ting hte hpawn, shi a htingnu madu shangun wu ai.

¹¹Dai hte yang Egutu mung hte Hkanan mung ting hta hku wa kaba wa nna, kyin dut kaba du ra ai; anhte a aji daju ni mung lusha htum mat malu ai.

¹²Ya Egutu mung e mam nga nga ai lam Yaku na wu yang, shawng na lang hta, anhte a aji daju ni hpe shangun dat wu ai.

¹³Bai hpang na lang hta, Yawsep gaw shi a kahpu kanau ni hpe shi a lam tsun hpaw dan wu ai rai nna, Hpara-u mung Yawsep a baw sang lam chye ya wu ai.

¹⁴Dai shaloi Yawsep gaw kawa Yaku hte hpawn, nta masha yawng ngu ai, marai sanit shi manga hte hpe, shi hpang de woi la wu ai.

¹⁵Yaku mung Egutu mung de du yu wa nna, shi hkum hte anhte a aji daju ni yawng si mat wa masai;

¹⁶shanhte hpe Shehkem de la wa nna, Shehkem e nga ai Hamora a kashu kasha ni kaw na, Abraham gumhpraw manu hte mari da ai lup hta wa lup ma ai.

¹⁷Ya Karai Kasang Abraham hpe jaw da ai ga ndat hte seng ai aten du wa magang yang, Egutu mung ntsa e Yawsep hpe n chye ai hkawhkam paw pru ai prat du hkra, anhte a amyu masha ni Egutu mung e kaba wa nna law htam wa ma ai.

¹⁸

¹⁹Dai hkawhkam wa gaw, anhte a baw sang ni hpe hpaji hte manai nna, ma chyangai ni hpe n jahkrung da lu hkra kabai kau na lam hte, ji wa ni hpe zingri zingrat mu ai.

²⁰Dai hte yang Mawshe shangai ai rai nna, shi gaw Karai Kasang a man e ahpraw tsawm nga ai; shata masum kawa nta e bau maka nna,

²¹kabai kau ai hkrum jang, Hpara-u a shayi sha shi e shaw la nhtawm, shi a kasha shatai nna shapan da wu ai.

²²Mawshe mung Egutu hpaji yawng mayawng sharin la nna, mungga marai hte lata marai grai rawng ai wa rai nga ai.

²³Ya shi asak mali shi ning du magang yang, shi a kahpu kanau Israela kashu kasha ni hpang de kawan katsan yu na, myit pru nna sa wa ai.

²⁴Shaloi, zingri hkrum nga la ai wa langai mi hpe mu jang, dai wa hpe maga nna, zingri ai wa, Egutu masha hpe, matai htang let sat kau wu ai:

²⁵shi a lata hte kahpu kanau ni hpe, Karai Kasang hkye hkrang la ai lam hpaw ya nga ai gaw, shanhte chye na ma dawng, nga nna myit wu timung, shanhte chyawm gaw n chye ma ai.

²⁶Hpang shani e shada gasat nga ai gaw sa ang hkrup nna, shan hpe je mayu ai majaw, ‘Hkau yan e, hpunau shada she rai yang me, hpa rai shada zingri hkat nga myit ta?’ ngu nna nem wu yang;

²⁷htingbu wa hpe zingri ai wa mahtang, ‘Anhte a ntsa e du hte tara agyi tai na, nang hpe kadai san da a ta?

²⁸Mani e Egutu masha hpe sat kau ai zawn, ngai hpe mung sat kau mayu nga n ni?’ nga nna htan let shi hpe nawng kau wu ai.

²⁹Ga de a majaw Mawshe hprawng nna, Midian mung e sa manam nga let, dai yang e shadang sha lahkawng shaprat wu ai.

³⁰Dai kaw mali shi ning lai jang, Sina bum na nam mali e wan grung nga ai singwum hta, lamu kasa shi kaw dan pru ai.

³¹Mawshe gaw dai mu jang, dai shingran majaw shi mau nna, dai hpe yu yu na nga sit sa wa yang, dai Madu a nsen ngoi pru ai gaw,

³²“Ngai gaw, na nji nwa ni a Karai Kasang, Abraham, Isak, Yaku a Karai Kasang rai nga nngai,” nga ai. Mawshe chyawm gaw hkrit gari nna, n mada wam wu ai.

³³Bai, dai Madu gaw, “Na a kyepdin raw kau u; nang tsap ai shara chyoi pra ai ga rai nga ai.

³⁴Egutu mung na nye amyu a ru tsang ai hpe ngai gaja wa mu se ai; shanhte a madai ai nsen ngai na ni ai; shanhte hpe hkye la na ngai yu wa ring ngai; ya sa rit, ngai nang hpe Egutu mung de shangun dat de ga,” nga nna shi hpe tsun wu ai.

³⁵Dai rai nna, Nang hpe du hte tara agyi tai na, kadai san da a ta? nga nna shanhte ndang kau ai, dai Mawshe hpe, Karai Kasang gaw singwum e dan pru ai lamu kasa a lata hte, du hte hkye hkrang la ai wa shatai nna shangun dat nu ai.

³⁶Dai wa nan, Egutu mung e mung, Nawng hkyeng hta mung, nam mali hkan e mung, mali shi ning tup mauhpa hte lamik kumla amu madun let, shi a amyu masha ni hpe woi wa mu ai.

³⁷Dai Mawshe nan, ‘Nan hpu nan nau ni hta na, nanhte a matu ngai zawn re ai myihtoi langai mi Karai Kasang paw pru shangun ya na ra ai,’ nga nna Israela kashu kasha ni hpe tsun da ai wa mung, rai nga ai.

³⁸Nam mali e rai nga yang na shawa hpung hta, Sina bum e shi hte ga tsun ai lamu kasa hte, anhte a ji wa ni rau rai nga ai wa gaw, shi nan rai nga ai; anhte hpe ap ya na asak hkrung ai mungga hkap la ai wa mung, shi rai nga ai:

³⁹anhte a ji wa ni chyawm gaw shi a ga n madat mayu nna, shi hpe ndang kau let, Egutu mung hpe bai marit ai hte,

⁴⁰Arun hpe, ‘Anhte a shawng e sa wa na Hpara galaw ya mi; Egutu mung na anhte hpe shaw woi wa ai, ndai Mawshe hta hpa byin sai gaw anhte n chye saga ai,’ nga nna tsun ma ai.

⁴¹Dai nhtoi hte hta shanhte dumsu kasha sumla galaw nna, dai sumla hpe hkungga jaw let, tinang a lata hte galaw ai amu hta kabu gara nga ma ai.

⁴²Dai rai nna, myihtoi laika hta tsun ai gaw, ‘Israela amyu e; mali shi ning tup nam mali e lang ai hkungga hte kumhpa gaw, Ngai hpe jaw jau ai rai ni?

⁴³Nanhte nawku na matu galaw la ai sumla ngu ai, Molak sumla a sum hte, Rehpan Hpara a shagan hpe she, hpai hkawm myit dai: Dai majaw Babelon tawt hkra ngai nanhte hpe woi mat wa na made ai,' nga nna rawng ai; dai hte maren Karai Kasang gaw shanhte kaw na myi man kayin kau nna, sumsing lamu na zaw nawng zaw wa hpe nawku shangun na ap kau wu ai.

⁴⁴Nang mu ai kasi hte maren hkan galaw u, nga nna Mawshe hpe hkang dat ai hku galaw ai sakse sum hpe, dai nam mali e anhte a ji wa ni lu la ma ai rai nna;

⁴⁵Karai Kasang gaw ji wa ni a man na shachyut kau ya ai masha amyu ni a ninghtawn hta shanhte shang sha wa ai shaloi, dai prat na ji wa ni Yawshu hte rau dai hpe la shawn wa ma ai rai nna, Dawi a aprat du hkra rai nga ai:

⁴⁶Dawi chyawm gaw Karai Kasang a man e myi man pa ai rai nna, Yaku a Karai Kasang a matu nga shara tam na ahkang hpyi wu timung,

⁴⁷Shawlumon e she shi a matu nta gap wu ai.

⁴⁸Rai timung Tsaw Htum ai Wa gaw masha a lata hte sha gap ai nta hta rawng ai n rai; dai lam myihtoi wa htawn tsun ai gaw,

⁴⁹‘Sumsing lamu gaw nye a tingnyang, Ginding aga gaw nye a lagaw kabye lahkum rai nga ai: Kaning re ai nta nye a matu gap na myit ta? Ngai ban sa na shara kaning re ai shara rai na a ta?

⁵⁰Dai yawng hpe nye a lata hte hkrai galaw tawn ai n rai ni? Nga nna dai Madu tsun ai,’ nga ai.

⁵¹Du ja nna, masin hte ana hpe matu n gadoi ai ni e, nanhte galoi mung Chyoi pra ai Wenyi hpe hkap daw myit dai; nanhte a nji nwa ni galaw ai zawn, nanhte mung a galaw nga myit dai.

⁵²Nanhte a nji nwa ni n zingri yu ai myihtoi, kadai wa nga a ta? Dai Dingman ai Wa paw pru na lam htawn tsun ai ni hpe, shanhte sat kau ma ai; ya nanhte mung dai wa hpe ap kau ai ni, sat kau ai ni, rai nga myit dai;

⁵³lamu kasa a lata hte hpajang ai tara nanhte lu la myit timung, dai hpe hkan shatsup myit dai n rai,” ngu nna tsun mu ai.

⁵⁴Dai lam na lu jang shanhte a masin mala la achyaw malu ai majaw, Stehpan hpe wa udik let yu da mu ai.

⁵⁵Shi chyawm gaw Chyoi pra ai Wenyi hpring nna, lamu de azi yu wu yang, Karai Kasang a hpung shingkang hte Karai Kasang a hkra maga de Yesu tsap nga ai hpe, mu wu ai rai nna,

⁵⁶“Yu u, sumsing lamu hpaw malang nga ai hte, Karai Kasang a hkra maga de Masha Kasha tsap nga ai gaw, ngai mu se ai,” nga ai.

⁵⁷Shaloi shanhte gaw aja awa jahtau let, tinang a na pat kau nhtawm, lang lata rau shi hpang de htim nna,

⁵⁸mare shinggan de shapraw nhtawm, nlung hte jawm kabai mu ai: sakse ni mung, Shawlu mying ai shabrang wa a lagaw nhpang e, tinang a hpun palawng raw tawn ma ai.

⁵⁹Shing rai kabai nga ma yang Stehpan gaw akyu hpyi let, “Madu Yesu e, nye a wenyi hkap la ya e,” nga ai.

⁶⁰Bai, hput di let, “Madu e ndai mara shanhte hpe hkum shagun ya et,” nga nna nsen kaba hte jahtau wu ai: dai tsun ngut jang shi yup mat wa ai.