Read Jinghpaw Hanson Version Bible KASA 8 Bible Online

KASA 8 - Jinghpaw Hanson Version Bible bible

KASA 8

¹Shawlu mung shi hpe sat kau ai amu hta awlaw lawm nga ai. Dai shani e Yerusalem mare na Hpung gaw zingri zingrat kaba hkrum wa ai rai nna, kasa ni hta kaga, gale nlang hte gaw, Yuda mung, Samari mung, shara magup hkan e bra mat wa ma ai.

²Rai timung, tara hkungga ai masha Stehpan hpe makoi mayang nna, shi a majaw hkrap ngu hkrap ngoi kaba di mu ai.

³Shawlu chyawm gaw, nta shagu shang nna, numsha lasha hpe ahkyit karawt la nhtawm, htawng hta sharen da ai hte, dai Hpung hpe hpya sharun da mu ai.

⁴Bra hkawm mat wa ai ni chyawm gaw, mungga hkaw dan let htawt hkawm nga ma ai.

⁵Shaloi Hpilip gaw Samari mare de sa wa nna, Hkristu a lam hkaw tsun dan wu ai.

⁶Shi tsun dan ai lam na ai hte, shi madun ai lamik kumla mu ma yang, masha wunawng wuwa myit langai sha hte shi a ga madat mara nga ma ai.

⁷Kaning rai nme law, nat shung ai ni law law hta na, n seng ai nat ni jahtau marawn let pru mat shajang ma ai; hkum katsing si ai ni hte lagaw hten ai ni law law mung, mai mat shajang ma ai.

⁸Dai rai nna, dai mare hta kabu gara lam kaba rai nga ai.

⁹Rai timung, Simun mying ai wa langai mi, shawng e dai mare hta lakle amu dan nna, shi hkum hpe, “Ngai gaw kang ai wa rai nngai,” nga nna Samari masha ni hpe shamau mu ai:

¹⁰masha kaji kaba yawng mung, “Ndai wa gaw, Galu kaba ngu ai, Karai Kasang a atsam rai nga ai,” nga nna shi a ga madat ma ai.

¹¹Dai wa gaw, na na wa shi a lakle amu hte shanhte hpe shamau mu ai majaw, shi hpe kam ya ai rai ma ai.

¹²Rai timung, Karai Kasang a mungdan hte Yesu Hkristu a amying ningsang hte seng ai kabu gara shiga lam, Hpilip hkaw dan ai hpe, kamsham ma yang, numsha lasha baptisma hkam la shajang ma ai.

¹³Simun shi mung kamsham nna, baptisma hkam la ngut jang, Hpilip kaw hkan nang nga ai: lamik kumla hte mauhpa amu kaba ni shi mu jang, mau mahka mat nga ai.

¹⁴Samari masha ni, Karai Kasang a mungga hta la ma ai hpe, Yerusalem e nga ai kasa ni na ma yang, shanhte gaw Petru yan Yawhan hpe shangun dat mu ai:

¹⁵shan mung du jang, dai masha ni Chyoi pra ai Wenyi lu la na matu akyu hpyi ya mu ai:

¹⁶kaning rai nme law, shanhte hta na gade a ntsa e mung, Chyoi pra ai Wenyi garai n yu wa ai; Madu Yesu a amying hta baptisma a hkam ai sha, naw rai nga ma ai.

¹⁷Dai rai nna kasa yan shanhte a ntsa e lata mara ya jang, shanhte dai Chyoi pra ai Wenyi hkam la lu ma ai.

¹⁸Kasa yan a lata mara ai hte Wenyi hkam la lu ai hpe Simun mu jang, shi gumhpraw sa sak nna,

¹⁹“Gade a ntsa e rai timung ngai lata mara jang, dai wa Chyoi pra ai Wenyi lu la na matu, dai baw ahkang ngai e mung jaw mi,” ngu nna hpyi wu ai.

²⁰Petru chyawm gaw, “Karai Kasang a kumhpa hpe gumhpraw hte lu la na re ai, nga nna myit ndai majaw, na a gumhpraw gaw nang hte rau hten bya mat u ga,

²¹Na a myit Karai Kasang a man e n ding nga lit dai majaw, ndai lam hta nang hpa mung lawm lu ndai n rai.

²²Dai majaw, na n hkru ai lam hpe myit malai lu u; na a kraw hta myit mang kau ai lam hpe, mahkoi raw dat kau ya dam nhten, shi Madu kaw hpyi nem u.

²³Ladu nan ahkut nna n hkru ai hte, n ding n man ai hta ahkang achyang nga ndai gaw, ngai mu da de ai,” ngu nna shi hpe tsun wu ai.

²⁴Shaloi Simun gaw, “Nan tsun ai lam hpa mung ngai kaw n du u ga, nye a matu mara nan lala dai Madu kaw hpyi ya mi,” ngu nna htan wu ai.

²⁵Shan chyawm gaw, dai Madu a mungga lam sakse hkam nna hkai dan ngut jang, Samari kahtawng law law hkan e dai kabu gara shiga hkaw dan let, Yerusalem mare de bai wa ma ai.

²⁶Ya, Madu a lamu kasa Hpilip hpe tsun wu ai gaw, “Rawt u; Yerusalem kaw nna Gaza de hprang ai lam pru hkra, dingda de tawk sa wa su,” ngu wu ai; lam dai gaw nam mali lam rai nga ai.

²⁷Shaloi shi rawt nna sa wa ai; ya yu mu, Ehtiopi mung up ai hkawhkam jan Kandake a man e ahkang kaba lu nna, shi a sutgan yawng sin ai, unuk re ai, Ehtiopi masha langai mi, nawku na nga, Yerusalem de sa wa sai:

²⁸ya shi bai wa nna, shi a leng hta dung let, myihtoi Esaia laika hti nga ai.

²⁹Shaloi Wenyi gaw Hpilip hpe, “Sa sit, dai leng de rau rai u,” ngu wu ai.

³⁰Hpilip mung gat sa wa nna, myihtoi Esaia laika hti nga ai na wu yang, “Nang hti ai lam hpe chye na da wu ni?” ngu nna san wu ai.

³¹Dai wa gaw, “Htai ya ai mi n nga yang, ngai kaning rai chye na na rai ta?” nga nna htan nhtawm, shi kaw rau lung dung na, Hpilip hpe saw wu ai.

³²Shi hti ai laika a ga gaw ndai rai nga ai, “Sat na matu sagu hpe zawn, shi hpe dun sa wa nu ai; Sagu kasha gaw mun rep ai wa a man e atsin sha nga ai zawn, Shi mung n shaga ai sha nga ai.

³³Shagrit kau ai hkrum nga ai hta, shi dawdan ai kaw na lawt lu wu ai: Rai timung shi asak hpe ga ntsa na dawm kau ya wu ai majaw, Shi a baw sang ni a lam, kadai gawn dan lu na rai ta?” nga ai.

³⁴Shaloi dai Unuk wa gaw Hpilip hpe, “Rai taw, dai myihtoi wa gaw kadai hpe sha-ang nna tsun ai rai ta? shi hkum hpe tsun ai rai kun? shing n rai, kaga wa a lam tsun ai rai kun?” ngu nna san wu ai.

³⁵Shaloi Hpilip ga tsun hpaw nna, dai laika hta ga sharawt nhtawm, Yesu hte seng ai kabu gara shiga, shi hpe hkai dan wu ai.

³⁶Shing rai sa wa ma yang, hka nga ai kaw du jang, dai Unuk wa gaw, “Yu u, nang e hka nga nga ai; ngai baptisma hkam na, hpa hkum shara nga a ta?” ngu wu ai.

³⁷(Hpilip gaw, “Na a myit mahkra hte nang kamsham nit yang gaw hkam la mai ai,” ngu wu ai. Shi mung, “Yesu Hkristu Karai Kasang a kasha rai nga ai gaw, ngai kamsham ni ai,” ngu nna htan wu ai)

³⁸Shaloi shi a leng jahkring na tsun nhtawm, shan lahkawng hka de yu wa nna, Hpilip gaw Unuk wa hpe baptisma jaw wu ai.

³⁹Hka na lung wa ma yang, dai Madu a Wenyi Hpilip hpe woi mat wa nna, Unuk wa mung shi sa wa ai lam de kabu gara let bai wa wu ai rai nna, shi e bai n mu wu ai.

⁴⁰Hpilip chyawm gaw, Azutu mare e wa du ai rai nna, dai mung ga sa wa yang, Kesare mare du hkra mare shagu hkan e dai kabu gara shiga hkai dan wu ai.