Read Jinghpaw Hanson Version Bible KASA 9 Bible Online

KASA 9 - Jinghpaw Hanson Version Bible bible

KASA 9

¹Shawlu chyawm gaw, Madu a sape ni hpe jahkrit shama ai hte sat kau na nga, masin naw rawt bu nga ai rai nna, hkinjawng agyi kaw sa nhtawm,

²ndai lam hkan ai, numsha lasha mu mamu hpe rim la nna, Yerusalem de dun wa lu hkra, Damasku mare na tara jawng ni hpe, jaw dat na ahkang laika hpyi gun wu ai.

³Ya sa wa yang, Damasku mare de shi ni magang wa sai rai nna, akajawng sha lamu de na nhtoi shi a grup e htoi tu pru wa ai:

⁴shi mung, ga e kadawng taw mat ai hte, “Shawlu, Shawlu, nang ngai hpe hpa rai zingri nga n ta?” nga nna shi hpe tsun ai nsen na wu ai.

⁵Shaloi shi gaw, “Madu e, nang kadai rai nga n ta?” ngu nna san wu yang, Madu gaw, “Nang zingri zingrat ai Yesu rai nga nngai:

⁶rai timung, rawt u, mare de shang wa u; nang galaw lu na lam nang hpe tsun dan shangun na we ai,” nga nna htan wu ai.

⁷Shi hte rau sa ai manang ni gaw, dai nsen na timung, kadai hpe mung n mu ma ai majaw, mau let tsap nga ma ai.

⁸Shaloi Shawlu rawt nna, myi hpaw yu wu yang, hpa mung n mu lu ai rai nna, shi hpe lata e dun let, Damasku mare de woi shang wa mu ai.

⁹Ya shi gaw masum ya tup myi n mu nna, n lu n sha ai nga nga ai.

¹⁰Ya Damasku mare e Anani mying ai sape langai mi nga ai rai nna, Madu gaw shingran hta, “Anani e,” ngu wu ai. Shi mung, “Madu e, nang nga nga nngai,” ngu nna htan wu ai.

¹¹Dai Madu bai tsun wu ai gaw, “Rawt u, Lam Ding ngu ai mare lam de sa nna, Yuda nta e, Tarshu masha Shawlu hpe sa tam su; yu u, shi akyu hpyi nga ai rai nna,

¹²Anani mying ai wa shang sa nna, shi myi bai hpaw ya n ga nga, shi a ntsa e lata mara da ya ai hpe, shingran hta mu nu ai,” ngu wu ai.

¹³Anani chyawm gaw, “Madu e, dai wa gaw Yerusalem e, na a chyoi pra ai ni hpe n hkru ai hku gade wa galaw ai gaw, ashi law law ngai na se ai;

¹⁴ndai yang e mung, na a mying ningsang hpyi gang ai ni yawng mayawng hpe gyit dun la na nga, hkinjawng agyi ni kaw na ahkang lu la sai rai nga ai,” ngu nna htan wu ai.

¹⁵Madu mung, “She sa su; dai wa gaw, maigan amyu ni hte hkawhkam ni a man e mung, Israela amyu masha ni a man e mung, nye a amying gun hpai na matu, nye a ngu nna san tawn da ai malai rai nga ai:

¹⁶kaning rai nme law, nye mying majaw gade wa matsan tsin-yam hkrum na gaw, ngai shi hpe madun na we ai,” ngu wu ai.

¹⁷Shaloi Anani du sa nna, dai nta de shang nhtawm, Shawlu a ntsa e lata mara let, “Hpunau Shawlu e, nang myi bai mu lu nna, Chyoi pra ai Wenyi hpring lit ga nga, nang sa wa ai lam e, nang hpe shadan dan ai Madu Yesu gaw, ngai e shangun dat ni ai,” ngu wu yang,

¹⁸Shawlu a myi hta na asep zawn re ai alawan gaw hkrat mat nna, shi myi bai mu lu ai; shaloi shi rawt nna, baptisma hkam la wu ai:

¹⁹lusha mung sha nna, n-gun awai la wu ai. Dai hpang Shawlu gaw Damasku na sape ni hte rau tawng marang mi kanawn nga let,

²⁰Yesu gaw Karai Kasang a kasha rai nga ai, nga nna shaloi jang tara jawng ni hta hkaw dan nga ai.

²¹Shi a ga na ai ni nlang mau mahka let, “Ndai wa gaw Yerusalem e amying ndai gang ai ni hpe sharun shabya ai wa rai nga ai, n rai ni? ya ndai de mung, dai baw ni hpe gyit la nna, hkinjawng agyi ni hpang de wa ap na maw ai hte sa du ra hka,” nga nna tsun shajang ma ai.

²²Shawlu chyawm gaw n-gun ja wa nna, Yesu gaw Hkristu nan rai nga ai lam pra pra madun dan ai hte, Damasku e nga ai Yuda ni hpe shamak kau mu ai.

²³Ya nhtoi tsawmra wa na jang, Yuda masha ni shi hpe sat kau na bawng ma ai: rai timung, shanhte a maw ai lam hpe Shawlu chye wu ai.

²⁴Shi hpe sat kau lu hkra, shani shana mare chyinghka ni hta hkap nga ma ai.

²⁵Shi a sape ni chyawm gaw, shana e shi hpe woi la nna, ka hta mare bunghku kaw nna shayat dat mu ai.

²⁶Dai hpang Yerusalem de du wa jang, sape ni hte kanawn na maw wu ai; rai timung, shi sape rai sai hpe n kam ma ai majaw, nlang hte shi hpe hkrit da mu ai.

²⁷Barnaba chyawm gaw shi hpe kasa ni hpang de woi wa wu ai rai nna, Shawlu shi dai Madu hte lam e kaning rai hkrum nna, dai Madu e shi hpe tsun ai ga na lu ai mung, Damasku mare hta Yesu a mying gang nna nden ja ai myit hte hkaw dan ai lam mung, shanhte hpe hkai dan mu ai.

²⁸Shing rai Yerusalem mare e shi shanhte hte rau pru pru shang shang rai nga let,

²⁹Madu a mying ningsang gang nna, nden ja ai myit hte hkaw tsun nga ai; Heleni ngu ai ni hte mung shi ndang hkat nga ai rai nna, shanhte gaw shi hpe sat kau na maw ma ai.

³⁰Dai lam hpunau ni chye jang, shi hpe Kesare de sa dat nna, Tarshu de shangun dat mu ai.

³¹Dai hte yang, Yuda mung, Galile mung hte Samari mung shara magup hkan e nga ai Hpung gaw, shadaw shangang ai lu la nna, angwi apyaw rai nga ai; dai Madu hpe hkrit hkungga ai hte, Chyoi pra ai Wenyi a shalan shabran ai lam ni hta hkawm sa let, shanhte law htam wa ma ai.

³²Dai shaloi e Petru gaw shara magup hkan e kawan hkawm wa let, Luda mare e nga ai chyoi pra ai ni kaw mung sa du ai.

³³Dai yang e hkum katsing si nna, matsat ning tup yup shara na n rawt lu ai Ainea mying ai masha langai mi hpe mu hkrup wu ai.

³⁴Shaloi Petru gaw, “Ainea e, Yesu Hkristu nang hpe shamai nit dai: rawt u, na hpun panep lajang u,” ngu nna shi hpe tsun wu ai: shaloi jang shi rawt wa lu ai.

³⁵Luda hte Sharon e nga nga ai ni nlang hte mung shi hpe mu nna, Madu hpang de kayin bang wa ma ai.

³⁶Ya, Yopa mare hta Tabihta mying ai numsha sape langai mi nga ai; mying de a ga lachyum gaw Dorka ngu ai rai lu ai: dai numsha gaw kaja ai bungli hte alu jaw ya ai lam hta, myit tsup ai jan rai nga ai.

³⁷Dai hte yang shi machyi nna si mat sai; mang kashin nna, ntsa gawk e sharawn da ma ai.

³⁸Luda gaw Yopa mare hte ni nga ai rai nna, Petru dai yang nga ai lam sape ni na ma yang, shanhte marai lahkawng shangun dat nna, “Anhte kaw sa na hkum hkring et,” ngu nna hpyi dat mu ai.

³⁹Shaloi Petru rawt nna, dai yan hte rau hkan sa wa ai. Shi du jang ntsa gawk de woi shawn mu ai rai nna, gaida jan ni nlang hkrap let shi a makau e tsap nna, shanhte hte rau naw nga yang, Dorka chywi ai palawng ni, nba ni, madun let nga nga ma la ai.

⁴⁰Petru chyawm gaw nlang hte hpe shapraw kau ai; shing rai dai mang de kayin let, “Tabihta e, rawt u,” ngu wu ai. Shaloi dai jan myi hpaw nna, Petru hpe mu jang, rawt dung nga ai.

⁴¹Petru mung lata ladawn nna gang sharawt nhtawm, chyoi pra ai ni hte gaida jan ni hpe shaga la nna, shi hpe chyahkrung ap ya wu ai.

⁴²Dai lam hpe Yopa ginwang ting na ma ai rai nna, law law wa, dai Madu hpe kamsham ma ai.

⁴³Shing rai Petru gaw, Simun ngu ai shanhpyi sama wa hte rau, nhtoi tsawmra na hkra, Yopa mare hta nga nga ai.