Read Jinghpaw Hanson Version Bible ROMA 11 Bible Online

ROMA 11 - Jinghpaw Hanson Version Bible bible

ROMA 11

¹Dai rai nna, ngai tsun nngai gaw, Karai Kasang shi a amyu hpe kau da nu hka? Shing n rai law. Ngai mung Israela masha rai nga nna, Abraham a aru arat hte Ben-yamin a baw sang rai nga nngai.

²Karai Kasang gaw shawng nna chye tawn da sai, shi a amyu hpe kau da nu ai n rai. Dai hta kaga, Elia gaw Karai Kasang a man e Israela masha ni hpe mara madi nna,

³Madu e, na a myihtoi ni hpe shanhte sat kau manu ai; na a tawn hkungri ni hpe shanhte htu kadawng kau manu ai; ngai chyu sha ngam nga nna, shanhte nye a asak hpe mung tam ma ai, nga nna, shi a lam Chyum laika hta rawng nga ai ga hpe nanhte n chye nga myit ni?

⁴Dai shingran ga chyawm gaw shi hpe kaning nga htan a ta? Bala a man e lahput garai n hput di ai lasha hkying sanit hte gaw, nye a matu ngai shangam da se ai, nga ai.

⁵Dai hte maren, ndai aprat e mung, chyeju hte seng ai lata la ai lam a majaw, kau chyen mi naw ngam nga ai.

⁶Dai gaw chyeju hte rai nga a yang gaw, magam bungli majaw n rai; bungli hte rai yang gaw, chyeju lam chyeju n rai nga ai.

⁷Dai rai yang gaw, kaning law? Israela masha ni gaw, tinang tam ai lam hpe n dep ma ai; lata la hkrum ai ni mahtang gaw dep ma ai:

⁸gale chyawm gaw, Ya du hkra pyi, hpam nga ai wenyi mung, n mu lu na myi hte n na lu na ana mung, Karai Kasang shanhte hpe jaw da manu ai, nga nna ka da nga ai hte maren, myit shanuk ya ai hkrum nu ai.

⁹Dawi mung, “Shanhte a sha ku tinang a matu dawnggawng hte mahkam, Myit kataw shara hte madawng hkrum na lam tai u ga;

¹⁰Myi n mu lu hkra shanhte a myi sin mak malu ga, Shanhte a marung hpe tutnawng htingkung nga shangun nga u,” nga ai.

¹¹Dai rai nna ngai tsun nngai gaw, Israela masha ni kazut taw nan hkra ahtu kataw hkrup ma sani? Shing n rai law, Shanhte hpe manawn shangun mu ga she, shanhte a ahtu kataw ai lam a jaw e, hkye hkrang la ai gaw maigan amyu ni kaw du wa sai.

¹²Dai hta kaga shanhte a ahtu kataw ai gaw mungkan ga a sutgan, shanhte a sum mat ai gaw maigan amyu ni a sutgan tai wa a yang gaw, shanhte a hkum sumhpa gaw grau nna, akyu shabyin na n rai ni?

¹³Dai rai nna nanhte maigan masha ni hpe ngai tsun made ai gaw: maigan amyu ni a kasa ngai rai nga nngai rai timung, nye a baw sang nkau mi hpe hkye hkrang la lu hkra,

¹⁴shanhte hpe manawn shangun lu mawe yang gaw, nye a kasa aya hpe ngai shagrau sha-a nga nngai.

¹⁵Kaning rai nme law, shanhte hpe kau da ai lam, mungdan ga a htinglu htinglai ya ai lam tai wa a yang gaw, shanhte hpe bai hkap la ai lam gaw, si mat ai kaw na hkrung wa ai hte bung nga na n rai ni?

¹⁶Dai hta kaga, shawng nawng ai muk shadung gaw chyoi pra nga a yang gaw, de a muk tawng ting chyoi pra nga ai; ru pawt chyoi pra nga a yang gaw, lakung lakying ni mung chyoi pra nga na ma ai.

¹⁷Rai timung, lakung lakying nkau mi gyi kau ai hkrum nna, tsanlun chyalam ngu ai nang mahtang gaw, dai ni hta shachyaw ai hkrum ndai hte, tsanlun ru a asau hta bawk jaw lawm ai wa tai n yang gaw, lakung lakying ni a ntsa e gumrawng gumtawng hkum rai et.

¹⁸Gumrawng gumtawng nga n yang gaw, nang dai ru hpe gun ndai n rai, dai ru mahtang gaw nang hpe gun da ndai.

¹⁹Rai timung, Ngai hpe shachyaw na, lakung lakying ni gyi kau ai hkrum ma ai, nga nna nang tsun mayu nhten.

²⁰Rai taw, rai u ga; shanhte gaw n kam n sham ai majaw gyi kau ai hkrum ma ai, nang mahtang gaw makam masham hte ngang hkang nga ndai. Myit hkum kaba et, hkrit kang nga u:

²¹kaning rai nme law, Karai Kasang gaw lakung lakying majing hte hpe n lahpawt yang gaw, nang hpe mung lahpawt lama di na ndai n rai.

²²Dai re ai majaw, Karai Kasang a chyeju hte masin ja ai hpe myit yu mu. Kataw nga ai ni a ntsa e masin ja nga ai rai nna, Karai Kasang a chyeju hta e nang naw nga nga n yang gaw, shi a chyeju na ntsa e rai nga ai, dai n rai taw gaw, nang mung krum kau ai hkrum na rin dai.

²³Shanhte mahtang, tinang a n kam n sham ai hta n nawng mat malu yang gaw, bai shachyaw ai hkrum lu na mara ai: Karai Kasang gaw, shanhte hpe bai shachyaw na di lu nga ai.

²⁴Kaning rai nme law, tsanlun chyalam majing hta na nang hpe dan la nna, htung n nga timung, tsanlun kaja hta shachyaw n yang gaw, lakung lakying majing rai nga ai shanhte gaw, tinang a tsanlun hpun madung hta grau nna shachyaw ai hkrum na mara ai, n rai ni?

²⁵Dai rai nna, hpunau ni e, nanhte tinang a hpaji n machyu myit ga, ndai sung htum ai lam hpe nanhte n chye nga na, ngai n ra nngai; dai gaw, maigan amyu ni garai n shang hkum ai du hkra, Israela masha nkau mi myit shanuk kau ai hkrum ma ai, nga ai:

²⁶shing rai Israela masha ni nlang hte gaw hkye hkrang la ai hkrum na ma ai: dai hte maren, “Ziun kaw na Mawai la ai wa paw pru nhtawm, Tara n hkungga ai hpe Yaku hta na lat kau na ru ai;

²⁷Shanhte a yubak yeng seng kau ai shani e, Dai gaw shanhte hte nye a ga shaka rai nga ai,” nga nna ka da nga ai.

²⁸Shaloi, dai kabu gara shiga a lam yu yang, nanhte a matu mara, shanhte hpyen ni tai wa masai; rai timung, lata la ai lam hpe yu yang, ji wa ni a gawp e, shanhte tsawra hkrum ai ni rai nga ma ai.

²⁹Karai Kasang a chyeju kumhpa ni hte shaga la ai lam chyawm gaw, myit dawm la shara n nga lu ai.

³⁰Kaning rai nme law, nanhte gaw shawng e Karai Kasang hpe n madat n mara myit timung, shanhte a n madat mara ai a majaw, ya e chyeju hkam la lu myit dai hte maren;

³¹nanhte hkam la ai chyeju hte shanhte mung ya e chyeju hkam la lu mu ga, shanhte gaw ya e n madat n mara nga ma ai.

³²Karai Kasang chyawm gaw, nlang hte hpe chyeju madun dan lu hkra, nlang hte hpe n madat n mara ai hta ban hkum da mu ai.

³³Karai Kasang a n taw n tsang ai hpaji byeng-ya hte chye chyang ai myit gaw, gade wa sung nga a hka! kadai n sawk ya lu ai shi a jeyang ai hku, kadai n gawn ya lu ai shi a ningsang magam lam ni gaw, mau n ma rai nga ai.

³⁴Kaning rai nme law, dai Madu Du a myit hpe kadai dang chye a ta? shi hte bawng ai bawmung kadai wa rai nga a ta?

³⁵Chyeju htang ai hkrum lu hkra, kadai wa shi hpe shawng e sak ya sata?

³⁶Arai yawng mayawng hte gaw, shi kaw nna, shi a majaw, shi a matu mara pra nga ai. Shi kaw e htani htana hpung shingkang anga nga u ga law. Amen.