Read Jinghpaw Hanson Version Bible ROMA 12 Bible Online

ROMA 12 - Jinghpaw Hanson Version Bible bible

ROMA 12

¹Dai re ai majaw, hpunau ni e, nanhte a hkumhkrang hpe, hkrung nga ai, chyoi pra ai hte, Karai Kasang kaw sharawng awng ai hkungga matu nawng ya na, Karai Kasang a chyeju hte ngai nanhte hpe shadut shahkat dat made ai: dai gaw nanhte a myit masin a daw jau ai lam rai nga ai.

²Dai hta kaga, ndai dinghta ga a myit n hkan dagraw ai sha, Karai Kasang a mai kaja ai, sharawng awng ai hte hkum tsup re ai myit mang lam hpe nanhte chye ginhka lu myit ga, myit nnan lu la na hku arawn asam galai nga mu.

³Dai rai nna, kadai mung tinang hkum hpe shadawn sharam ai hta nau wa n rai dum ai sha, Karai Kasang gaw langai hte langai hpe makam masham ren di nna karan jaw ai hte maren, mai myit ai lam chyu sha myit nga n ga, ngu nna ngai hpe jaw ai chyeju hte, nanhte kaw na langai hte langai hte hpe, ngai tsun dat nngai.

⁴Kaning rai nme law, hkumhkrang langai sha hta nna, daw shan law law rai nga ai rai nna, daw shan ni yawng gaw asung langai sha hta n shang lu ai hte maren,

⁵law law rai nga ga ai anhte mung, Hkristu hta hkumhkrang langai sha tai nna, langai hte langai shada da a daw shan ni rum nga ga ai.

⁶Shing rai anhte hpe karan jaw ai chyeju majaw, langai hte langai gaw chyeju kumhpa kaga ga lu la ga ai hte maren, myihtoi htoi ga yang gaw, anhte a makam masham ang ai hte maren htoi ga;

⁷hpungtau rai yang gaw, hpungtau bungli hpe gun hpai ga; sharin achyin re ai wa gaw, sharin achyin ai amu hpe,

⁸shadum jahprang chye ai wa gaw, shadum jahprang ai amu hpe, shachyen u ga; alu jaw ai wa gaw n daw n hta jaw u ga; up hkang ai wa gaw, kasang kalang hte up nga u ga; matsan dum chye ai wa gaw, kabu gara ai myit hte galaw u ga.

⁹Tsawra ai myit hta sawt ai n lawm u ga; n hkru n hkra ai hpe matsat nga mu, mai kaja ai hta manoi nga mu.

¹⁰Hpunau hpe tsawra ai hta, shinggyim nau na myit shada da rawng nga mu; hkungga lara ai hta shada da shagrau hkat mu;

¹¹shakut sharang ai hta kadawn kanawn hkum rai myit; wenyi hta alet nga mu; dai Madu a bungli hpe a galaw nga mu;

¹²myit mada let kabu gara nga mu; nni nkri hkrum yang, myit hkum kaji nga mu; akyu hpyi ai hta htep lahti tut rai nga mu;

¹³chyoi pra ai ni a ra ai lam a matu mara gam jaw nga mu; manam daw ai lam hta sharau nga mu.

¹⁴Nanhte e zingri zingrat ai ni hpe shaman ya mu; shaman ya mu, dagam dala hkum rai myit.

¹⁵Kabu gara re ai ni hte rau kabu gara nga mu; hkrap ngu hkrap ngoi re ai ni hte rau hkrap ngu hkrap ngoi nga mu.

¹⁶Langai hte langai shada da myit shara mu; arawng lam n tam ai sha, arawng n lu ai ni hte mazum hkau nga mu. Tinang hkum hpe hpaji rawng ai zawn, hkum nawn nga myit.

¹⁷N kaja ai a majaw, n kaja ai hku kadai hpe mung hkum tai mu, Masha yawng mayawng a man e htaphtuk ai ningli madun na, myit yu nga mu.

¹⁸Nanhte rai lu myit dai daram, masha nlang hte hte myit hkrum nna hkau chyap nga mu.

¹⁹Tsawra ai ni e, tinang nan matai hkum htang mu; Karai Kasang a pawt sindawng na hpe ala nga mu: kaning rai nme law, dai Madu tsun ai gaw, Matai htang na ahkang ngai chyu lu nngai, ngai tai na we ai, nga nna ka da nga ai.

²⁰Dai hta n-ga, nang hpe hpyen ai wa kawsi nga a yang, shi hpe shat jaw u; hpang gara nga a yang, lu na jaw u: dai lam galaw n yang gaw, shi a baw ntsa e grung nga ai wan n-ga nang sumpum da na wu ai.

²¹N hkru n hkra ai gaw nang hpe n dang kau u ga; mai kaja ai hte n hkru n hkra ai hpe dang kau u.