Read Jinghpaw Hanson Version Bible ROMA 14 Bible Online

ROMA 14 - Jinghpaw Hanson Version Bible bible

ROMA 14

¹Kamsham ai hta n-gun n ja ai wa hpe hkap hkalum la mu: rai timung, myit mang hparan ai lam hpe dinglik yu na matu, hkum rai myit.

²Langai ngai gaw lusha amyu myu mai sha na kam nga ai, n-gun n ja ai wa mahtang gaw nam law nam lap sha nga ai.

³Amyu myu sha ai wa gaw, n sha ai wa hpe hkum hkya u ga; n sha ai wa mung, sha ai wa hpe hkum jeyang u ga; kaning rai nme law, Karai Kasang gaw shi hpe hkap hkalum la sai.

⁴Masha wa a shangun ma hpe jeyang ai wa e, nang gaw kaning san ai wa rai nga n ta? Tinang a madu a man e shi myi man pa na re ai, shing n rai, n pa na re ai; gaja wa shi pa na re ai; dai Madu gaw shi hpe shapa ya lu nga ai.

⁵Marai langai ngai gaw nhtoi gale hta lani ni hpe shagrau wu ai; bai, langai ngai gaw, nhtoi shagu maren rai nga ai, myit da wu ai: langai hte langai gaw tinang myit shatawng shadik nga u ga.

⁶Nhtoi hpe ginhka yu ai wa gaw, dai Madu a lam majaw ginhka yu nga ai: sha ai wa gaw, Karai Kasang hpe shakawn kungdawn nga ai majaw, dai Madu hpe dum let sha nga ai; n sha ai wa mung, dai Madu hpe dum let n sha nga ai rai nna, Karai Kasang hpe shakawn kungdawn nga ai.

⁷Kaning rai nme law, anhte hta kadai rai timung, tinang hkum a matu mara sha hkrung nga ai n rai; kadai rai timung, tinang hkum a matu mara sha si wa ai n rai;

⁸Hkrung nga yang gaw, dai Madu a lam anhte hkrung nga ga ai; si wa yang mung, dai madu a lam anhte si wa ga ai. Dai re ai majaw, hkrung timung si timung, dai Madu hte anhte seng nga ga ai.

⁹Kaning rai nme law, si mat ai ni hte hkrung nga ai ni hpe madu nga lu hkra, Hkristu gaw si hkam nna bai hkrung rawt wa sai.

¹⁰Nang chyawm gaw, hpa majaw na nhpu nnau wa hpe jeyang nga n ta? bai, na nhpu nnau wa hpe hpa majaw n gawn n sawn rai nga n ta? Anhte yawng mayawng hte gaw, Karai Kasang a tara tingnyang a man e du tsap na ra ga ai.

¹¹Kaning rai nme law, “Dai Madu gaw, Ngai ahkrung nga ai hte maren, nye a man e lahput shagu hput di nna, Shinglet shagu Karai Kasang kaw tawngban lu na re ai, nga ai,” nga nna ka da nga ai.

¹²Dai rai nna, anhte langai hte langai, tinang dai tinang lam a jahpan, Karai Kasang kaw dan na ra ga ai.

¹³Dai re ai majaw, anhte shada da hpa n jeyang saga; kadai rai timung, tinang hpunau a matu ahtu kadawng shara hte myit kataw shara n tawn da na lam she, jeyang nga mu.

¹⁴Hpa rai timung, tinang a npawt nhpang sa gawn yu yang, awu asin re ai mi n nga ai gaw, Madu Yesu hta e ngai chye nga nna myit dik nga nngai: rai timung, langai ngai gaw lama ma hpe awu asin re ai, nga nna myit nga a yang gaw, dai arai gaw shi a matu awu asin rai nga lu ai.

¹⁵Kaning rai nme law, lusha shahpa majaw na a nhpu nnau a myit n pyaw nga a yang gaw, nang tsawra ai lam hta naw hkawm nga ndai n rai. Hkristu gaw shi a matu mara si hkam ya nu ai majaw, na a lusha shahpa e shi hpe hkum jahten et.

¹⁶Shing rai nanhte a mai kaja ai bungli gaw, shatan nhkan hkum hkrum shangun u ga.

¹⁷Kaning rai nme law, Karai Kasang a mungdan gaw, sha sha, lu lu rai na hku n re ai sha, Chyoi pra ai Wenyi e, dinghpring ai, ngwipyaw ai hte kabu gara ai, rai nga ai.

¹⁸Dai hku hkan nna Hkristu a bungli gun hpai ai wa gaw, Karai Kasang a man e sharawng awng ai hkrum nna, masha a man e mung awlaw ai hkrum nga ai.

¹⁹Dai re ai majaw, ngwipyaw ai lam hte, shada da sharin hkang na lam hpe, anhte hkan shachyut nga ga.

²⁰Lusha shahpa nhkan e Karai Kasang a bungli hpe hkum sharun shabya kau et. Yawng mayawng hte gaw san seng ai hkrai rai nga ai; rai timung kataw ai myit hte sha ai wa a matu, mara rai nga ai.

²¹Shan sha na hte tsabyi lu na rai timung, na nhpu nnau hpe myit kataw shangun na lam hpa rai timung koi gam kau na gaw, mai kaja nga ai.

²²Nang hta rawng ai makam masham gaw, nang nan Karai Kasang a man e rawng nga n ga: ginhka lata ai lam hta tinang hkum dai jeyang shara n nga ai wa gaw, a nga ai.

²³Mahkoi myit rawng ai wa madaw sha a yang gaw, dawdan ai hkrum nga ai; kaning rai nme law, makam masham hte shi sha nga ai n rai: makam masham hte n seng ai hpa rai timung, yubak sha rai nga ai.