Read Jinghpaw Hanson Version Bible ROMA 16 Bible Online

ROMA 16 - Jinghpaw Hanson Version Bible bible

ROMA 16

¹Kenhkrea hpung na hpungtau rai nga ai anhte a kajan Hpobe hpe ngai nanhte hpang de jashawn dat ya nngai:

²chyoi pra ai ni a ging dan ai hku hkan nna, dai Madu hta e shi hpe hkap hkalum la nhtawm, hpa lam rai timung shi ra ai hte maren, shi hpe tawn nga mu; kaning rai nme law, shi hkum nan masha law law wa hpe mung, ngai hpe mung, tau ga sai.

³Ngai hte rau Yesu Hkristu a amu shingtau ai Priska yan Akula hpe shakram ya mi;

⁴shan gaw nye a asak a matu tinang du baw shatawng kau manu ai rai nna, ngai hkrai sha n rai, maigan na Hpung ni yawng hte mung, shan hpe shakawn ga ai: shan a nta e shanu ai Hpung hpe mung shakram ya mi.

⁵Asi mung e Hkristu a matu shawng si ai asi rai nga ai, ngai tsawra ai Eponetu hpe shakram ya mi.

⁶Nanhte a matu mara grai wa shakut sharang yu sai Mari hpe shakram ya mi.

⁷Nye a baw sang re ai, ngai hte rau htawng rawng yu ai Androniku yan Yuni hpe shakram ya mi: dai yan gaw kasa ni hta e arawng lu ma ai rai nna, nye a shawng e Hkristu hta e de lu ma ai.

⁸Dai Madu hta e ngai tsawra ai Ampliatu hpe shakram ya mi.

⁹Anhte hte rau Hkristu a amu shingtau ai Orban hte, ngai tsawra ai Staku hpe shakram ya mi.

¹⁰Hkristu hta e jet rai nga ai Apele hpe shakram ya mi. Aristobulu a nta na ni hpe shakram ya mi.

¹¹Nye a baw sang wa Herodion hpe shakram ya mi. Narkiso a nta na dai Madu hta de ai ni hpe shakram ya mi.

¹²Dai Madu a bungli gun hpai ai Truhpena hte Truhpawsa hpe shakram ya mi. Dai Madu hta e grai wa shakut sharang ai, tsawra ai Persi hpe shakram ya mi.

¹³Dai Madu hta e lata la ai Ruhpu hte, shi hte an a kanu hpe mung shakram ya mi.

¹⁴Asunkritu, Hpelegu, Herme, Patroba, Herma hte, shanhte hte rau nga ai hpunau ni hpe shakram ya mi.

¹⁵Hpilogu hte Yulia, Nerea hte shi a kajan hpe mung, Olumpa hte shanhte hte rau nga ai chyoi pra ai ni yawng hte hpe shakram ya mi.

¹⁶Nanhte shada da chyoi pra ai pup hte shakram ya mi. Hkristu hta de ai Hpung ni yawng hte gaw, nanhte hpe shakram dat ma ai.

¹⁷Bai, hpunau ni e, nanhte hkam la ai sharin shaga ai lam hpe nhtan shai let, shabra sharun ai hte myit kataw shara shabyin ai ni hpe joi yu nna, shanhte hpe koi gam nga myit ga, ngai nanhte hpe shadum dat made ai.

¹⁸Kaning rai nme law, shing re ai ni gaw, anhte a Madu Hkristu hpe n daw jau ai wa, tinang kan a matu sha tsang ma ai rai nna, naw kaja nga ai ni a myit hpe ga sau ga pyaw hte hkalem kau ma ai.

¹⁹Nanhte a madat mara ai myit chyawm gaw masha nlang kaw chyam wa sai: dai re ai majaw nanhte a matu ngai kabu gara nga nngai; rai timung, nanhte gaw mai kaja lam hta hpaji byeng-ya, n kaja lam hta san seng ai myit rawng nga myit ga, ngai naw ra nga nngai.

²⁰Ngwipyaw ai a npawt Karai Kasang gaw, gade n na yang, nanhte a lagaw npu e Satan hpe kabye arin na ra ai. Anhte a Madu Yesu a chyeju gaw nanhte hte rau anga nga u ga law,

²¹Nye a shingdep shingtau wa Timohti hte, nye a baw sang rai nga ai Luki, Yasun hte Sosipata hte gaw nanhte hpe shakram dat ma ai.

²²Ndai laika ka ai wa, ngai Tertiu mung, dai Madu hta e nanhte hpe shakram dat nngai.

²³Ngai hpe mung, Hpung ting hpe mung, manam daw ai madu Geu gaw nanhte hpe shakram dat ai. Dai mare na gumhpraw dek up ai wa Erastu hte, hpunau Kuartu yan gaw nanhte hpe shakram ma ai.

²⁵Amyu baw shagu makam masham a madat mara ai lu la hkra, htani htana Karai Kasang a matsun maroi ga majaw, myihtoi laika ni a jaw e kajai gara pri rai nga ai, chyi nma hpri nhpra e kyem da nhtawm,

²⁶ya e shadan dat ai sung ai shingran ga hku hkan let, nye a kabu gara shiga hte, Yesu Hkristu a lam hkaw dan ai ga hte maren, nanhte hpe shadaw shangang ya lu ai,

²⁷langai sha ngu ai, hpaji rawng htum ai Karai Kasang kaw, Yesu Hkristu a marang e, htani htana e hpung shingkang anga nga u ga law. Amen.