Read Jinghpaw Hanson Version Bible ROMA 3 Bible Online

ROMA 3 - Jinghpaw Hanson Version Bible bible

ROMA 3

¹Dai rai yang gaw, Yuda wa kaning rai grau nga a ta? matu gadoi hkam ai mung, hpa akyu nga a ta?

²Lam shagu hta akyu grai nga ai. Shawng na mahtang, Karai Kasang a shingran ga shanhte hkam la lu ma ai.

³Rai taw gaw? shanhte hta na nkau mi n kam n sham dam ma yang gaw, shanhte a n kam n sham ai gaw, Karai Kasang a sadi sahka hpe shabai lu na kun?

⁴Shing n rai law: “Na a ga hta nang dinghpring nga n ga hte, Tara dara na du yang, nang awng wa n ga,” nga nna laika hta rawng nga ai hte maren, masha yawng masu matsa ai ni tai wa timung, Karai Kasang gaw tengman nga u ga.

⁵Ya, anhte a n ding n hpring ai gaw, Karai Kasang a dinghpring ai hpe shapraw shadan dat a yang gaw, anhte kaning ngu tsun na rai ta? pawt bu ari jaw ai Karai Kasang gaw n ding n hpring na, n rai ni? (shing nga ai gaw, masha a hku hkan nna sha tsun nngai;)

⁶shing n rai law; rai dam yang, Karai Kasang gaw mungkan ga hpe kaning rai tara dara lu na rai ta?

⁷Bai, nye a masu matsa ga hte Karai Kasang a tengman ai lam grau nna arawng sadang jat wa a yang gaw, yubak kap ai wa zawn jeyang ai hpe, ngai hpa rai naw hkrum nga n ta?

⁸Mai kaja ai pru u ga n kaja ai galaw ga, nga nna nkau mi anhte hpe shatan nhkan let deng ma ai hte maren, galaw mai na n rai ni? shing nga ai ni mahtang gaw dawdan ging ma ai.

⁹Shaloi kaning kun? Anhte je jan nga ga ni? N rai law; kaning rai nme law, Yuda ni rai timung, Heleni ni rai timung, yawng yubak kap ai ni rai nga ma ai hpe, anhte shawng de kadeng dan saga ai.

¹⁰Laika hta mung, “Dinghpring ai wa n nga ai, langai mi pyi n nga ai.

¹¹Chye chyang ai wa n nga ai, Karai Kasang hpe tam ai wa mung n nga ai;

¹²Yawng dam mat wa masai, Shanhte rau hpawn asung n shang ai ni tai mat ma ai. Kaja ai amu kadai mung n galaw ma ai, Gaja wa, langai mi muk n galaw nga ai.”

¹³“Shanhte a mayu gaw hpaw nga ai lup rai nga malu ai; Shanhte a shinglet hkalem chye nga ai, Pu htum a tuk shanhte a nten npu e rawng nga ai;

¹⁴Shanhte a n-gup matsa mawa hte kajet kaje hkrai hpring nga malu ai;

¹⁵Asai shapraw na shanhte a lagaw larau nga ai hte,

¹⁶Shanhte a lam gaw jahten shaza ai hte nni nkri rai nga ai rai nna,

¹⁷Ngwipyaw ai lam hpe shanhte n chye ma ai:

¹⁸Karai Kasang hpe hkrit kamyin ai lam, shanhte a myi man e n rawng malu ai,” nga nna ka da nga ai.

¹⁹N-gup yawng mayawng hpe sha-ip kau lu nna, mungkan ting hte gaw Karai Kasang a man e mara rawng ai tai nga mu ga, jep ai tara hta tsun matsun hte, jep ai tara npu e nga ai ni hpe a tsun nga ai gaw, anhte chye nga ga ai:

²⁰kaning rai nme law, dai jep ai tara hte yubak lam hpe chye ginhka lu ai majaw, jep ai tara a magam bungli hku hte shi a man e kadai mung dinghpring ai kaw n du lu ma ai.

²¹Ya chyawm gaw, dai jep ai tara n lawm timung, jep ai tara hte myihtoi ni a laika sakse hkam ya ai Karai Kasang a dinghpring lu ai lam langai mi dan pru wa sai;

²²dai gaw Yesu Hkristu hta kamsham ai a majaw, kamsham ai ni nlang hte a matu mara Karai Kasang a dinghpring lu ai lam rai nga ai: lachyen lahka chyawm gaw hpa mung n nga lu ai.

²³Kaning rai nme law, yawng yubak galaw ma ai hte, Karai Kasang a arawng sadang hpe dumhprut kau nna,

²⁴jahpu n ya ai sha, shi a chyeju hte, Yesu Hkristu a htingrai htingra ya ai a gawp e, dinghpring ai gaw du lu na ma ai.

²⁵Karai Kasang gaw myit sharang nga nna moi shawng na yubak mara ni hpe shalai dat kau ai majaw, shi a dinghpring ai lam hpe shadan dan u ga;

²⁶rai sa, ndai prat e shi a dinghpring ai lam hpe shadan dan na hte, Yesu hta kamsham ai wa hpe dinghpring shangun let, shi hkum nan dinghpring nga u ga she, Yesu a asai hta kamsham na marang e, shi gawng malai hkungga tai na, Karai Kasang gaw shi hpe shapraw dat wu ai.

²⁷Dai rai yang gaw, gumrawng shara kanang nga a ta? Dai gaw ban shadang mat sai. Gara tara hte ban shadang mat a ta? magam bungli tara hte rai kun? n rai law, kamsham ai tara hte ban shadang mat sai.

²⁸Kaning rai nme law, tara a magam bungli n lawm ai sha, kamsham ai hte sha masha gaw dinghpring lu ai, anhte sawn nawn ga ai.

²⁹Dai n rai yang gaw, Karai Kasang gaw Yuda ni a Karai Kasang sha rai nga a ni? maigan ni a Karai Kasang mung shi rai nga ai, n rai ni?

³⁰Rai sa, matu gadoi hkam ai ni kamsham ai hte, matu gadoi n hkam ai ni kamsham ai a marang e, dinghpring shangun ai Karai Kasang gaw langai sha rai nga a yang gaw, maigan ni a Karai Kasang mung, shi rai nga ai.

³¹Dai rai yang gaw, kamsham ai hte anhte dai jep ai tara hpe gum-yu shatai kau sagaw ni? shing n rai law; anhte dai tara hpe shangang shagrin ga ai.