Read Jinghpaw Hanson Version Bible ROMA 6 Bible Online

ROMA 6 - Jinghpaw Hanson Version Bible bible

ROMA 6

¹Dai rai yang gaw anhte kaning ngu tsun na ma? Chyeju law htam wa u ga, yubak hta e naw a hkan nga na kun?

²Shing n rai u ga. Yubak kaw na si hka nga ai ni anhte gaw, dai hta e kaning rai naw pra nga lu na ga ta?

³Dai hta kaga, Hkristu Yesu hta e baptisma hkam ai ni anhte nlang hte gaw, shi a si hkam ai hta baptisma hkam nga ga ai hpe, nanhte n chye nga myit ni?

⁴Dai re ai majaw, Hkristu gaw Kawa a hpung shingkang hte si mat ai ni kaw na hkrung sharawt la ai hkrum wu ai hte maren, anhte mung asak sumdam ningnan hta e rawt hkawm wa lu hkra, dai baptisma hkam ai hta e, anhte si hkam nna shi hte rau lup makoi ai hkrum saga ai.

⁵Kaning rai nme law, anhte a si hkam ai gaw shi a si hkam ai hte baw sha rai nga ai majaw, anhte nhpang sha tai nga ga yang gaw, bai hkrung rawt ai hta e mung, anhte shi hte nhpang rum na ga ai.

⁶Si mat ai wa gaw yubak hta na lawt pru nga ai majaw,

⁷yubak a mayam anhte naw n tai nga sa na, ngu nna yubak hkum gaw shaza kau ai hkrum u ga she, anhte a gawng shing-yan dingsa gaw shi hte rau wudang hta jen da hkam ai hpe, anhte chye nga ga ai.

⁸Si mat ai ni kaw na hkrung sharawt la hkrum ai Hkristu gaw, galoi mung bai n si lu na hte, si hkrung si htan gaw galoi mung shi hpe n madu lu na nu ai, anhte chye ga ai majaw,

⁹Hkristu hte rau si hkam ga yang gaw, anhte shi hte rau mung hkrung nga lu na ga ai, ngu nna anhte kamsham nga ga ai.

¹⁰Kaning rai nme law, shi a si hkam ai gaw, yubak a majaw kalang sha mi si hkam ai, rai nga ai; bai rawt hkrung ai chyawm gaw, Karai Kasang a man e ahkrung nga ai lam rai nga ai.

¹¹Dai hte maren nanhte mung, yubak hte si hka mat ai ni rai nga manit dai rai nna, Hkristu Yesu hta e Karai Kasang a man e ahkrung nga ai ni rai nga ga ai, ngu nna myit la mu.

¹²Dai re ai majaw, yubak a kayut ai lam madat mara ai du hkra, nanhte a si chye ai hkumhkrang hta e yubak hpe hkum up shangun myit;

¹³nanhte a daw shan ni hpe mung, n ding n hpring ai hpyen hking hpe zawn, yubak hpe hkum ap ya myit; si mat ai ni kaw na hkrung rawt lu ai ni zawn, Karai Kasang kaw tinang dai sak ya mu; nanhte a daw shan ni hpe mung, dinghpring ai hpyen hking shatai nna, Karai Kasang hpe sak ya mu.

¹⁴Kaning rai nme law, nanhte gaw jep ai tara npu e n rai, chyeju npu e rai nga myit dai majaw, yubak gaw nanhte a ntsa e madu lu na n rai.

¹⁵Dai rai yang gaw, kaning law? jep ai tara npu e n rai, chyeju npu e anhte rai nga ga ai majaw, yubak galaw na ga ni? Shing n rai u ga.

¹⁶Langai ngai kaw madat mara na nga, tinang dai shang nna mayam tai wa myit yang gaw, si hkrung si htan hkrum hkra yubak a ga rai timung, dinghpring ai lu la hkra madat mara ai lam rai timung, nanhte hkan madat nga myit yang gaw, de a mayam ni nanhte rai nga myit dai, n chye nga myit ni?

¹⁷Nanhte chyawm gaw yubak a mayam ni tai yu manit dai rai timung, nanhte hkam la hkrum ai sharin shaga ai lam hpe, sharawng ai myit hte madat mara manit dai majaw, Karai Kasang kaw a nga u ga:

¹⁸yubak kaw na shalawt dat ai hkrum nhtawm, dinghpring ai a mayam ni nanhte tai wa manit dai.

¹⁹Nanhte gawng shingma kya nga myit dai majaw, masha a hku hkan nna sha ngai tsun nngai: kaning rai nme law, n tara ai bungli galaw u ga, nanhte a daw shan ni hpe awu asin re ai hte n tara ai a mayam ni tai na, nanhte ap kau manit dai hte maren, chyoi pra ai lu la hkra, dinghpring ai a mayam ni tai na, nanhte a daw shan ni hpe ya e ap ya mu.

²⁰Yubak a mayam ni nanhte rai nga manit dai shaloi e, dinghpring ai hta na nanhte daw hka nga myit dai.

²¹Dai rai nna, dai aten e nanhte hpa akyu lu la nga myit ta? ya e nan kaya kahpa ai baw lu la nga myit dai: dai ni a chyahtum gaw si mat ai hkrai rai nga ai.

²²Ya chyawm gaw yubak kaw na shalawt dat ai hkrum nna, Karai Kasang a ali ama ni tai nga myit dai majaw, chyoi pra hkam na ngu ai akyu gaw, nanhte lu la myit dai: de a chyahtum madaw gaw htani htana asak rai nga ai.

²³Kaning rai nme law, yubak a shabrai gaw si mat ai rai nga ai; Karai Kasang a chyeju kumhpa chyawm gaw, anhte a Madu Hkristu Yesu hta e, htani htana asak rai nga ai.