Read Jinghpaw Hanson Version Bible ROMA 8 Bible Online

ROMA 8 - Jinghpaw Hanson Version Bible bible

ROMA 8

¹Dai re ai majaw ya gaw, Hkristu Yesu hta e nga ai ni a matu mara, dawdan shara n nga ai.

²Kaning rai nme law, Hkristu Yesu hta e jahkrung ya ai Wenyi a tara gaw, yubak a tara hta na rai timung, si mat ai tara hta na rai timung, ngai hpe shalawt dat ni ai.

³Jep ai tara nan shinggyim hkum shan majaw n-gun kya nna n shabyin lu ai gaw, hkum shan kaw hkan nang ai ni hta e n re ai sha, anhte Wenyi kaw hkan nang ai ni mahtang hta e, dai jep ai tara a ga matsun dik wa lu hkra,

⁴Karai Kasang gaw yubak a matu mara, yubak a hkumhkrang hte bung ai gawng shing-yan hte, shi hkum nan a Kasha hpe shangun dat ru ai rai nna, shinggyim hkum shan hta e yubak hpe dawdan wu ai.

⁵Kaning rai nme law, shinggyim hkum shan myit hkan ai ni gaw, hkum shan hte seng ai arai ni hpe myit nga ma ai; Wenyi hkan ai ni mahtang gaw, Wenyi a lam myit nga ma ai.

⁶Hkum shan myit gaw si mat ai lam rai nga ai; Wenyi a myit chyawm gaw, hkrung ai lam hte ngwipyaw ai lam rai nga ai.

⁷Dai hta kaga hkum shan myit gaw Karai Kasang a tara npu e n taw lu ai hte, dai hpe n madat lu ai majaw, Karai Kasang hpe n dawng n yawt ai myit sha rai nga ai;

⁸hkum shan myit hkan nang ai ni mung, Karai Kasang a myit awng shara n tai lu ma ai.

⁹Nanhte hta e chyawm gaw Karai Kasang a Wenyi rawng nga myit yang gaw, nanhte hkum shan myit hta e n rai, Wenyi hta e nan rawng nga myit dai. Langai ngai gaw Hkristu a Wenyi n rawng yang dai wa shi hte n seng nga ai.

¹⁰Hkristu gaw nanhte hta e nga nga a yang gaw, hkumhkrang gaw yubak a majaw si nga rai timung, wenyi mahtang dinghpring ai a majaw ahkrung nga ai.

¹¹Dai hta kaga, si mat ai ni kaw na Yesu hpe hkrung sharawt la ai wa a Wenyi gaw, nanhte hta e rawng nga a yang gaw, si mat ai ni kaw na Hkristu Yesu hpe hkrung sharawt la ai wa gaw, nanhte hta e rawng nga ai shi a Wenyi a lata hte nanhte a si chye ai hkumhkrang ni hpe mung, jahkrung ya na marin dai.

¹²Dai re ai majaw, hpunau ni e, hkum shan a myit hkan nang na matu, hkum shan a hka kap ai ni anhte rai nga ga ai n rai;

¹³kaning rai nme law, hkum shan hte seng ai asak sha hkrung nga myit yang gaw, nanhte si na rai nga myit dai; rai timung, Wenyi hte hkumhkrang a arawn alai ni hpe nanhte sat kau myit yang gaw, nanhte hkrung nga na marin dai.

¹⁴Karai Kasang a Wenyi e woi lakawn la ai hkrum mahkrum ni gaw, Karai Kasang a kashu kasha ni rai nga ma ai.

¹⁵Kaning rai nme law, bai hkrit kang na matu, mayam a wenyi hpe nanhte hkam la manit dai n rai; Aba, Wa e, nga nna jahtau chye ai, yin la ai kasha a wenyi hpe she, nanhte hkam la manit dai.

¹⁶Dai Wenyi nan anhte a wenyi hte hkrum nna, anhte Karai Kasang a kashu kasha ni rai nga ga ai hpe, sakse hkam ya ma ai.

¹⁷Kashu kasha rai nga ga yang gaw, sali wunli hkam la ai ni mung anhte rai nga ga ai; Hkristu hte rau hpung shingkang hkam la lu hkra, shi hte rau nni nkri hkrum nga ga yang gaw, Karai Kasang a sali wunli hkam la ai ni hte, Hkristu hte rum ai sali wunli hkam la ai ni, anhte rai nga ga ai.

¹⁸Kaning rai nme law, ndai aprat na tsin-yam tsindam gaw, anhte kaw e shadan shapraw na ra ai hpung shingkang hte shadawn n ging nga ai, ngai myit nga nngai.

¹⁹Nga yawng nga pra mung myit ndawt ai hte, Karai Kasang a kashu kasha ni a paw pru na ra ai hpe ala nga ma ai.

²⁰Dai nga yawng nga pra chyawm gaw, hten run lam npu e shagrit kau ai hkrum rai timung, tinang ra ai hku n re ai sha, nga yawng nga pra nan lala sharen da ngu ai hten mat ai kaw na shalawt dat ai hkrum nna,

²¹Karai Kasang a kashu kasha ni a pru lawt wa ngu ai hpung shingkang hta shang lu na, myit mada nga nna, dai hpe shagrit kau ai wa a majaw, shagrit kau ai hkam nga ai.

²²Dai hta kaga, nga yawng nga pra ting gaw ya du hkra rau madai nga nna, gadau gadap rai nga ma ai hpe, anhte chye ga ai.

²³Dai hta n-ga, Wenyi a chyeju nloi hpe hkam la sai ni anhte mung, anhte a kraw lawang hta e, anhte nan madai nga nna, anhte a hkumhkrang a htingrai htingrat ai lam ngu ai, kasha yin la na chyeju hpe, a la nga ga ai.

²⁴Kaning rai nme law, myit mada ai hte anhte hkye hkrang la ai hkam la saga ai; rai timung, mu lu ai arai hpe myit mada ai, ngu ai n rai nga ai; mu lu ai mahtang hpe kadai myit mada nga a ta?

²⁵N mu lu ai mahtang hpe myit a mada nga ga yang gaw, anhte dai hpe shakut sharang ai hte a la nga ga ai.

²⁶Dai hte maren, dai Wenyi mung anhte a gawng run gawng tsang ai hpe lanu lahku ya nga ai: kaning rai nme law, akyu hpyi mai ai hte maren anhte n chye hpyi nga ga timung, dai Wenyi nan n-gup n hkawn lu ai kraw madai ai hte, anhte a matu hpyi htinglu ya mi ai;

²⁷kraw lawang e sawk yu ai wa chyawm gaw, Wenyi a myit hpa rai nga ai gaw chye ya nga ai: kaning rai nme law, Karai Kasang ra ai hte maren, chyoi pra ai ni a matu mara shi hpyi htinglu ya nga ai.

²⁸Dai rai nna, shakyet tawn da ai hte maren, shaga la ai hkrum ai ni ngu ai, Karai Kasang hpe tsawra ai ni a matu mara, yawng mayawng mai kaja hkra jawm byin wa sai, anhte chye ga ai.

²⁹Kaning rai nme law, shi a Kasha gaw kahpu kanau lanlak hta e alat ningshawng tai u ga, shawng nna chye tawn da ai ni hpe, shi a Kasha a gawng shing-yan hte bung na matu, shi shanhte hpe shawng nna san tawn da mu ai:

³⁰shawng nna san tawn da sai ni hpe mung shi shaga la mu ai; shaga la manu ai ni hpe mung, shi dinghpring shangun mu ai; dinghpring shangun manu ai ni hpe mung, hpung shingkang lu shangun mu ai.

³¹Dai rai yang gaw, ndai hte hta anhte hpa tsun na ga ta? Karai Kasang gaw anhte a maga e nga nga a yang gaw, anhte hpe hpyen ai maga de kadai wa mi nga lu na a ta?

³²Shi kasha lala hpe lahpawt lama n di ai sha, anhte mahkra a matu mara shi hpe ap ya ai wa gaw, shi hte nawng yawng mayawng anhte hpe jaw na, n rai ni?

³³Karai Kasang a lata la ai ni hpe kadai wa mi mara shagun lu na a ta? Karai Kasang gaw dinghpring shangun ai wa rai nga ai.

³⁴Dawdan lu ai wa gaw, kadai wa mi rai nga a ta? Si hkam nna, rai sa, si hkam ai hta n-ga, si mat ai ni kaw na hkrung sharawt la ai hkrum nhtawm, Karai Kasang a hkra lata e rai nga let, anhte a matu mara hpyi htinglu ya ai wa, Hkristu Yesu nan rai nga ai.

³⁵Hkristu a tsawra ai hta na anhte hpe kadai wa mi jahka kau lu na a ta?

³⁶“Na a jaw e anhte shani shagu sat kau ai hkrum ga ai, Sat na san da ai sagu hpe zawn, anhte hpe nawn da mi ai,” nga nna ka da nga ai hte maren, tsin-yam tsindam atsu atsam, zingri zingrat ai, hku hku hpang gara ai, singgu krin ai, shoihpa hkrithpa hte ri nhtu hkrum yang she, jahka kau lu na mi ni?

³⁷N rai law, anhte hpe tsawra nga ai wa a majaw, ndai yawng hte hpe anhte grau nna hkap dang kau lu ai ni rai ga ai.

³⁸Kaning rai nme law, si timung prawn timung, lamu kasa rai timung, tawa magam rai timung; ya e nga ai arai htawm hpang e du na arai hte, hpung atsam rai timung;

³⁹lahta tang na arai lawu tsang na arai hte, hpan da mada kaga hpa rai timung, anhte a Madu Hkristu Yesu hta e Karai Kasang a tsawra ai hta na, anhte hpe n jahka kau lu na mi ai, ngu nna ngai myit hkut nga nngai law.