Read Jinghpaw Hanson Version Bible ROMA 9 Bible Online

ROMA 9 - Jinghpaw Hanson Version Bible bible

ROMA 9

¹Hkristu hta e tengman ai ga ngai tsun nngai, ngai n masu nngai;

²nye kraw lawang e yawn hkyen kaba hte tutnawng na atsu atsam ngai hkam nga nngai gaw, Chyoi pra ai Wenyi hta e nye a myit nsam gaw, ngai hte sakse hkam ya ai.

³Kaning rai nme law, nye a amyu baw re ai, nye a hpunau ni a matu mara, ngai hkum dai Hkristu hte hka nna dagam dala hkrum na hpe, hkam mayu hkra rai nga nngai:

⁴shanhte gaw Israela masha rai nga ma ai; kasha yin la ai akyu mung, dai hpung shingkang mung, ga shaka ni mung, tara jaw ai shingran mung, daw jau ai lam mung, ga ndat ni hpe mung, shanhte lu ma ai:

⁵ji wa ni gaw shanhte a ji wa ni rai nga ma ai rai nna, masha labau hku gawn yang, Hkristu gaw shanhte kaw na rai nga ai; shi gaw yawng mayawng a ntsa e htani htana e a nga ai Karai Kasang rai nga ai. Amen.

⁶Rai timung, Karai Kasang a mungga gaw kaman be be zawn tai wa sai n rai. Kaning rai nme law, Israela amyu yawng hte wa, Israela masha majing n rai ma ai:

⁷Abraham a aru arat re ai ni mung, yawng hte wa kashu kasha mai ngu na n rai. Isak hta mahtang, na a matu mara tai na ra ai, nga ai.

⁸Da ndai gaw ning rai nga ai: shinggyim hkum shan e shangai ai kashu kasha ni gaw, Karai Kasang a kashu kasha ni majing n rai ma ai; ga ndat hte seng ai kashu kasha ni chyu sha, matu mara majing re ai nawn da mu ai.

⁹Kaning rai nme law, Ladu hkrum jang ngai sa du nna Sara gaw shadang sha ba na ra ai, nga ai ga gaw, ga ndat rai nga ai.

¹⁰Dai hta n-ga, Rebeka mung anhte a wa Isak hte na-um nasin rai wa sayang,

¹¹Karai Kasang shakyet da nhtawm, lata la ai lam gaw, magam bungli hte n re ai sha, shaga la ai wa a majaw she grin wa u ga, kasha yan garai n shangai ai rai nna, kaja ai hte n kaja ai hpa garai n galaw ti pyi,

¹²Kaba ai wa mahtang kaji ai wa kaw mayam tai na ra ai, nga nna kanu hpe tsun dan wu ai.

¹³Dai hte maren, Yaku hpe ngai tsawra nna, Esaw hpe ngai n dawng n yawt nngai, nga nna ka da nga ai.

¹⁴Dai re ai majaw anhte kaning ngu tsun na ma? Karai Kasang kaw n ding n hpring nga ai rai ni? Shing n rai law.

¹⁵Kaning rai nme law, Ngai chyeju galaw mayu ai wa hpe chyeju galaw na we ai; ngai matsan dum mayu ai wa hpe matsan dum na we ai, nga nna Mawshe hpe tsun dan nu ai.

¹⁶Dai rai nna, lu la mayu ai wa a myit e rai lu ai n rai, gat shakut ai majaw mung rai lu ai n rai, dai gaw chyeju rawng ai Karai Kasang a myit majaw sha rai nga ai.

¹⁷Kaning rai nme law, Chyum laika gaw, Nang hta nye a atsam madun dan lu nna, ga ntsa ting e nye a amying gumhkawng wa u ga she, ngai nang hpe sharawt dat de ai, nga nna Hpara-u hpe tsun nga ai.

¹⁸Dai rai nna, kadai hpe mung, chyeju galaw mayu yang galaw nga ai, kadai hpe mung myit shaja mayu yang, shaja ya nga ai.

¹⁹Dai re ai majaw, Shi hpa rai ra baw naw shagun nga ai kun? shi a shawang myit hpe kadai wa ban hkum lu a ta? nga nna ngai hpe htan mayu nhten.

²⁰Ataw, Karai Kasang hpe nhkap ai wa e, nang gaw kadai wa mi rai nga n ta? Galaw da sai arai gaw, Hpa majaw nang ngai hpe ning di galaw n ta? nga nna shachyaw da ai wa hpe tsun na a ni?

²¹Di bu sama gaw kagam ga hpe madu lu nna, ga gumdin langai sha hta na, chyen mi hte reng ai di langai mi, bai chyen mi hte n reng ai di langai mi, galaw lu ai n rai ni?

²²Dai zawn Karai Kasang gaw, shi a pawt sindawng madun nna, shi a atsam hpe chye wa shangun mayu let, hten mat na matu hkyen da ai pawt ging ai di ni hpe galu kaba sumnung ai myit madun nna shakut sharang nga nga ai hte;

²³hpung shingkang a matu shawng e lajang da ai chyeju di ngu ai, Yuda ni hta sha n rai, maigan amyu ni hta na mung,

²⁴shaga la ai anhte hta e, shi a grau ai hpung shingkang hpe chye shangun mayu ai rai nga a yang gaw, hpa tsun shara nga a ta?

²⁵Dai hte maren Hosea laika hta mung shi ning nga tsun ai, “Nye a amyu n re ai hpe, nye a amyu ngai ngu nna, N tsaw n ra ai shayi sha hpe, tsawra ai ngu na we ai;”

²⁶Shing rai, “Nanhte nye a amyu n rai nga myit dai, nga nna shanhte hpe tsun dan ai shara, dai yang e pyi, Hkrung nga ai Karai Kasang a kasha ni ngu na marin dai,” nga ai.

²⁷Esaia mung Israela amyu a lam jahtau nna, Israela kashu kasha ni gaw nammukdara a zaibru zawn law ma timung, ngam nga ai kau chyen chyu sha hkye hkrang la ai hkrum na mara ai.

²⁸Kaning rai nme law, dai Madu gaw mungkan ting a ntsa e, shi a ga shadik na hte dai hpe shatup nna jahtum na ra ai, nga ai.

²⁹Dai hte maren, shawng e Esaia tsun da ai gaw, “Dai Madu Zeba-ut anhte hpe matu mara n shangam taw gaw, Sodom zawn anhte tai nna, Gomora hte bung na ga ai,” nga ai.

³⁰Dai re ai majaw anhte kaning ngu tsun na ma? Dinghpring ai lam n shachyut ai maigan amyu ni gaw, dinghpring ai hpe lep la ma ai; rai sa, kamsham ai hte lu la ai dinghpring ai hpe lep la ma ai:

³¹tara hte seng ai dinghpring ai lam hpe shachyut ma ai Israela amyu mahtang gaw, dai tara hpe n dep lu ma ai.

³²Hpa majaw law nga yang, kamsham ai hte n re ai sha, magam bungli hte sha hkan shachyut ma ai majaw n dep lu ma ai.

³³Shing rai, “Ahtu kataw na nlung hte, myit kataw shangun na lunghkrung hpe, Ziun hta e ngai tawn da se ai rai nna, Shi hpe kamsham ai wa gaw, kaya kahpa n hkrum na ra ai,” nga nna ka da nga ai hte maren, dai ahtu kataw na nlung hta e shanhte ahtu kataw nga ma ai.