Read Jinghpaw Hanson Version Bible 1 KORINHTU 11 Bible Online

1 KORINHTU 11 - Jinghpaw Hanson Version Bible bible

1 KORINHTU 11

¹Ngai gaw Hkristu hta samnang ai zawn, nanhte mung nye a samnang ni tai nga mu.

²Nanhte gaw lam shagu hta e ngai hpe adum nga nna, ngai nanhte hpe dai matsun maroi ga madat da ai hte maren, nanhte hkan sharau myit dai majaw, ngai nanhte hpe shakawn made ai.

³Rai timung, lasha nlang hte a baw gaw, Hkristu rai nga ai, numsha a baw gaw lasha rai nga ai, Hkristu a baw chyawm gaw, Karai Kasang rai nga ai hpe nanhte chye myit ga, ngai ra nga nngai.

⁴Kadai lasha mung akyu hpyi yang, shing n rai, myihtoi ga tsun nga ai shaloi e, baw magap nga a yang gaw, tinang baw a arawng jahpoi nga ai.

⁵Kadai numsha mung, akyu hpyi yang, shing n rai myihtoi ga tsun nga ai shaloi e, baw n magap a yang gaw, tinang baw a arawng jahpoi nga ai; kaning rai nme law, dai lam gaw baw shangun ai hte langai sha nga ai.

⁶Numsha gaw baw n magap na rai yang, kara mung doi kau u ga; rai timung, kara doi na, shing n rai, baw shangun na gaw, numsha a matu arawng jahpoi ai lam rai nga yang gaw shi baw magap u ga.

⁷Lasha chyawm gaw, Karai Kasang a hkrang bung sumla hte hpung shingkang rai nga ai majaw, baw magap na n sut nga ai: numsha mahtang gaw, lasha a hpung shingkang rai nga ai.

⁸Kaning rai nme law, lasha gaw numsha kaw na n rai, numsha mahtang lasha kaw na rai nga ai:

⁹dai lasha mung, numsha a majaw hpan da wu ai n rai, numsha hpe mahtang, dai lasha a majaw hpan da wu ai.

¹⁰Dai re ai majaw, lamu kasa ni hpe tau yu nna, numsha gaw baw ntsa e ahkang kumla nga ai gaw, sut nga ai.

¹¹Rai timung, dai Madu hta e, lasha n lawm yang gaw numsha hpa n rai nga ai; bai, numsha n lawm yang gaw lasha mung hpa n rai nga ai;

¹²kaning rai nme law, numsha gaw lasha kaw na rai nga ai hte maren, lasha gaw numsha jaw e rai nga ai; dai hta n-ga yawng mayawng gaw Karai Kasang kaw nna rai nga ai.

¹³Nanhte gaw tinang myit aru yu mu: numsha gaw baw n magap ai, Karai Kasang hpe akyu hpyi yang, sut nga ai kun?

¹⁴Lasha gaw kara madat yang, shi a matu arawng hpoi ai lam rai nga ai gaw, hking madung hta nanhte hpe madun nga ai n rai ni?

¹⁵Numsha mahtang gaw kara madat yang, shi a arawng rai nga ai; kaning rai nme law, kara gaw shi a pahpun tai na matu, jaw da nu ai.

¹⁶Rai timung, marai langai ngai ndang kalang hkat mayu dam a yang gaw, anhte mung, Karai Kasang a Hpung ni mung, dai zawn re ai htung n nga ga ga ai.

¹⁷Ya dai hku tsun timung, nanhte gaw akyu jat na matu zuphpawng myit dai n rai, akyu yawm na hku sha zuphpawng myit dai majaw, ngai nanhte hpe shakawn da made ai n rai.

¹⁸Shawng na lam tsun yang, nanhte gaw dai Hpung hta e zuphpawng ai shaloi, nanhte hta e hka wa bra wa na lam rai nga ai, ngai na hkrup nngai rai nna, teng dam nhten ngai kam nngai.

¹⁹Kaning rai nme law, nanhte hta e tengman ai ni dan pru u ga, bra wa na lam pyi nanhte hta e byin lu na ra ai.

²⁰Dai re ai majaw, nanhte rau zuphpawng ai shaloi, dai Madu a shana shat sha na matu hpawng nga myit dai n rai:

²¹kaning rai nme law, sha nga myit yang, langai hte langai gaw tinang a shana shat shawng la sha nna, langai ngai gaw kawsi nga ai, langai ngai gaw tsabyi nang myit dai.

²²Ataw, sha na lu na matu tinang a nta n lu myit ni? shing n rai, nanhte Karai Kasang a Hpung hpe n gawn n sawn di nna, n lu n su ai ni hpe kaya jahkrum myit ni? Nanhte hpe ngai kaning ngu tsun na i? ngai nanhte hpe shakawn lu na kun? Ndai lam hta ngai nanhte hpe shakawn da na made ai, n rai.

²³Kaning rai nme law, ngai nanhte hpe ap da made ai gaw, dai Madu kaw na ngai hkam la se ai: dai gaw, Madu Yesu gaw ap kau hkrum ai shana e muk la nna,

²⁴shakawn ngut jang, ahkyep alep nhtawm, “Ndai gaw nanhte a matu mara nye a hkum rai nga li ai; ngai hpe adum nga na matu ndai galaw mu,” ngu nna tsun mu ai.

²⁵Dai hte maren, shana shat sha ngut jang, dai gawm hpe mung shi la nhtawm, “Ndai gawm gaw nye a asai hta gaw da ai ga shaka nnan rai nga ai; nanhte galoi mung lu yang, ngai hpe adum nga na matu ndai galaw mu,” ngu nna tsun mu ai.

²⁶Kaning rai nme law, nanhte galoi mung ndai muk sha nna ndai gawm lu nga myit yang, dai Madu a si hkam ai lam, shi bai du ai du hkra, nanhte tsun shana ya myit dai.

²⁷Dai rai nna, kadai rai timung n ging n dan ai hte dai Madu a muk sha nna gawm lu a yang gaw, dai Madu a hkum hte asai hpe shut kau da wu ai.

²⁸Dai majaw kadai wa mung tinang hkum hpe san dinglik yu nhtawm, dai muk hta e sha u ga, dai gawm hta na mung lu u ga.

²⁹Kaning rai nme law, sha nna lu ai wa gaw, dai hkum hpe n gawn ginhka a yang gaw, tinang dai tara dara na hku lu sha nga ai.

³⁰Dai re ai majaw nanhte hta law law wa n-gun n ja ai hte ana ahkya hkrum nna, tsawmra wa nsa hkyet mat manit dai.

³¹Anhte gaw tinang dai hpe gawn dinglik ga yang gaw, tara dara ai n hkrum na ga ai.

³²Tara dara ai hkrum ga yang mung, mungkan masha ni hte rau dawdan ai n hkrum u ga she, dai Madu a lata hte anhte sharin achyin ai hkrum ga ai.

³³Dai rai nna, nye a hpunau ni e, lu sha na matu nanhte zuphpawng nga myit yang gaw, shada da ala nga mu.

³⁴Nanhte a zuphpawng ai gaw tara dara hkrum na matu n rai u ga, masha langai ngai kawsi nga a yang gaw, nta e naw sha la u ga. Galoi rai tim ngai du yang she, naw ngam ai lam hte hpe ngai hkan shachyip na we ai.