Read Jinghpaw Hanson Version Bible 1 KORINHTU 12 Bible Online

1 KORINHTU 12 - Jinghpaw Hanson Version Bible bible

1 KORINHTU 12

¹Hpunau ni e, dai wenyi kumhpa a lam nanhte n chye na ai nga na hpe, ngai n ra nngai.

²Nanhte gaw maigan ni naw rai nga ai shaloi e, shalen la hkrum kadup ai hte maren, n chye shaga ai sumla ni hpang de nanhte woi la hkrum nga myit dai gaw, nanhte nan chye nga myit dai.

³Dai rai nna, Karai Kasang a Wenyi hte tsun ai wa kadai rai timung, Yesu gaw “ga sangam hkrum sha u ga” nga nna n tsun lu ai hte, Chyoi pra ai Wenyi e sha n rai yang gaw, “Yesu gaw Madu rai nga ai” kadai mung n tsun lu ai gaw, ngai nanhte hpe shachye shachyang made ai.

⁴Ya, chyeju kumhpa amyu myu nga timung, dai Wenyi gaw langai sha rai nga ai;

⁵gun hpai na bungli lam amyu myu nga nna, dai Madu gaw langai sha rai nga ai;

⁶magam atsam shapraw na lam amyu myu nga timung, yawng mayawng hta e arai yawng mayawng hpe shabyin ai Karai Kasang gaw langai sha rai nga ai.

⁷Shing rai Chyeju akyu pru u ga she, langai hte langai hpe Wenyi a shapraw shadan ai lam jaw shajang manu ai.

⁸Kaning rai nme law, langai mi hpe, dai Wenyi a jaw e, hpaji mungga; kaga wa hpe dai Wenyi a jaw e chye chyang ai mungga;

⁹kaga wa hpe dai Wenyi a jaw e makam masham; kaga wa hpe, dai Wenyi langai sha a jaw e, machyi makaw shamai shatsai na chyeju;

¹⁰kaga wa hpe lamik kumla galaw dan na ahkang; kaga wa hpe myihtoi htoi na ahkang; kaga wa hpe wenyi ni hpe chye ginhka na ahkang; kaga wa hpe ga amyu myu chye tsun na ahkang; kaga wa hpe ga amyu myu a ga lachyum shapraw dan na ahkang, jaw shajang mu ai:

¹¹dai lam yawng hte chyawm gaw, dai Wenyi langai sha e nan shabyin wu ai rai nna, shi myit ra ai hte maren, langai hte langai hte hpe karan kachyan shagu mu ai.

¹²Dai hta kaga, dai hkumhkrang gaw langai sha rai nga nna, daw shan law law lu ai hte, dai hkumhkrang a daw shan ni yawng hte gaw law law rai nga timung, hkumhkrang langai sha tai nga ai hte maren, Hkristu mung dai zawn rai nga ai.

¹³Kaning rai nme law anhte yawng mayawng, Yuda ni hte Heleni ni rai timung, mayam ni hte shanglawt ni rai timung, hkumhkrang langai sha tai na matu, Wenyi langai sha hta e baptisma hkam saga ai rai nna, nlang hte gaw Wenyi langai hta sha jawm dagrawng saga ai.

¹⁴Dai hkumhkrang chyawm gaw, daw shan langai sha nga ai n rai, law law wa rai nga ai.

¹⁵Dai lagaw mahtang gaw, Ngai lata n rai nngai majaw hkum hte n seng nngai, nga nna tsun a yang gaw, de a majaw hkum hte n seng ai, n rai.

¹⁶Bai dai ana gaw, Ngai myi n rai nngai majaw hkum hte n seng nngai, nga nna tsun a yang gaw, de a majaw hkum hte seng ai, n rai.

¹⁷Hkum ting gaw myi rai nga a yang gaw, na lu na lam kanang nga na a ta? na lu na lam hkrai rai nga a yang gaw, manam lu na lam kanang nga na a ta?

¹⁸Ya chyawm gaw, Karai Kasang gaw shi ra ai hte maren, daw shan ni langai hte langai hte hpe dai hkumhkrang hta shachyaw tawn mu ai.

¹⁹Bai, yawng mayawng daw shan langai sha rai nga a yang gaw, hkumhkrang gaw kanang nga na a ta?

²⁰Ya chyawm gaw daw shan law law nga timung, hkumhkrang langai sha rai nga ai.

²¹Myi gaw, Nang lata hpe ngai n ra de ai, nga nna n tsun lu ai; abaw mung, Nan lagaw yan hpe ngai n ra made ai, nga nna n tsun lu ai.

²²Dai hta n-ga, hkumhkrang na n-gun grau n ja nsan ai daw shan ni gaw lawm ra nga ai:

²³hkumhkrang na arawng grau n lu nsan ai daw shan ni hpe anhte grau nna arawng jahpun ai hte, anhte a n htap ai daw chyen ni gaw, grau nna htap nga ai;

²⁴htap chyalu rai nga ai daw chyen ni mahtang gaw, dai lam n ra nga ai: dai hkumhkrang hta nru nra n byin ai sha, daw shan ni shada da myit tsang hkat nga mu ga she,

²⁵Karai Kasang gaw dai hkumhkrang hpe shabung shapre nna, arawng grit ai daw shan ni hpe grau nna arawng jaw mu ai.

²⁶Shing rai daw shan langai mi nji nmu hkrum yang, daw shan nlang hte gaw rau machyi dum ma ai; daw shan langai mi shagrau ai hkrum yang, daw shan nlang hte gaw rau kabu gara nga ma ai.

²⁷Ya nanhte gaw Hkristu a hkumhkrang rai nga ai hte, langai hte langai de a daw shan ni rai nga myit dai.

²⁸Karai Kasang chyawm gaw nkau mi hpe dai Hpung hta e, langai ngu na hta kasa ni, lahkawng ngu na hta myihtoi ni, masum ngu na hta sara ni, dai hpang e lamik kumla galaw ai ni, dai hpang e machyi makaw shamai shatsai na chyeju lu ai ni, shingdep shingtau ai ni, salang bawmung ni hte ga amyu myu chye tsun ai ni, san tawn da manu ai.

²⁹Yawng hte wa kasa rai nga ai kun? yawng hte wa myihtoi rai nga ai kun? yawng hte wa sara rai nga ai kun? yawng hte wa lamik kumla galaw lu ai kun?

³⁰yawng hte wa machyi makaw shamai shatsai na chyeju lu nga ai kun? yawng hte wa ga amyu myu chye tsun nga ai kun? yawng hte wa ga amyu myu a ga lachyum chye shapraw nga ai kun?

³¹Nanhte gaw grau htum ai chyeju kumhpa ni hpe tsam mari marit nga mu. Dai hta n-ga grau htum ai lam langai mi ngai nanhte hpe naw madun na made ai.